Magdalena

პარტნიორებისთვის ცოტა ხნის წინ გამართულ ღონისძიებაზე Intel-ის წარმომადგენლებმა განაცხადეს, რომ გასული სამი წლის განმავლობაში კომპანიამ შეძლო პროცესორების მიწოდების მოცულობის ორჯერ გაზრდა, თუმცა პერსონალური კომპიუტერების რეალიზაციის მოცულობა მხოლოდ ერთნახევარჯერ გაიზარდა. კომპონენტების სხვა მწარმოებლები ამ რბოლაში ჩამორჩებიან Intel-ს, ხოლო საკმარისი პროცესორების არსებობა ბაზრის გაჯერებისთვის ვერ აგვარებს ლეპტოპების დეფიციტის პრობლემას. Wi-Fi მოდულები, კონტროლერები, LCD პანელები და ბატარეები იწარმოება იმაზე მცირე რაოდენობით, ვიდრე ბაზარი მოითხოვს. Intel ძალისხმევას არ იშურებს, რათა მოაგვაროს ეს პრობლემები, თუმცა მისი შესაძლებლობები შეუზღუდავი არ არის. ცოტა ხნის წინ ცნობილი გახდა, რომ Intel-მა კომპონენტების დეფიციტთან ბრძოლის მიზნით საკუთარი ფინანსები ჩადო მათ წარმოებაში. AMD აპირებს ანალოგიურად მოქცევას და დამკვეთების სიმძლავრეების გაფართოების დაფინანსებას. https://bit.ly/3vCpRRG

Arcane Research-ის ანალიტიკოსებმა დაასახელეს Ethereum-ის ფასის ზრდის მიზეზები და დარწმუნებით აღნიშნეს, რომ Altcoin-ების სეზონი უკვე გაჩაღდა. მათი დაკვირვებით, Bitcoin-ის დომინირების ინდექსი 2018 წლის შემდეგ პირველად ჩამოვდა 50%-იან ნიშნულს ქვემოთ. წლის დასაწყისიდან მოწყოლებული მაჩვენებელი 71%-დან 47%-მდე შემცირდა. Bitcoin-ის დომინირების ინდექსი. წყარო: Arcane Research. Altcoin-ების საერთო კაპიტალიზაცია ოთხ თვეში 420%-ით - 222 მლრდ აშშ დოლარიდან 1.16 ტრილიონ აშშ დოლარამდე გაიზარდა. ბაზარზე არსებული ამჟამინდელი სიტუაციის მიზეზებს შორის ანალიტიკოსებმა დაასახელეს მზარდი ინტერესი DeFi-სივრცის მიმართ. ეს გამოიხატა დეცენტრალიზებული ფინანსური პროექტების მრავალი ტოკენისა და კაპიტალიზაციის სიდიდით მეორე კრიპტოვალუტის ფასების ზრდაში. ტრანზაქციებზე Ethereum-ის ქსელში არსებული მაღალი საკომისიოების არსებობის გამო პოპულარული გახდა ალტერნატიული DeFi-პლატფორმების მონეტები - Solana და Binance Coin. ასევე აღნიშვნას იმსახურებს Dogecoin-ზე ატეხილი აჟიოტაჟი. ექსპერტებმა პარალელები გაავლეს 2017 წლის ხარულ ბაზართან, როდესაც Bitcoin-ის ფასის კონსოლიდაციის პერიოდებს თან ახლდა Altcoin-ების ფასების აქტიური ზრდა. მათ ინვესტორებს მოუწოდეს ყურადღებით შეისწავლონ აქტივები შეძენამდე და მოერიდონ საეჭვო პროექტების ტოკენებს. ანალიტიკოსები დარწმუნებულნი არიან, რომ Ethereum-ის რეკორდები დიდწილად განპირობებულია სპოტ-ბაზრების გავლენით. მათ მიუთითეს ფიუჩერსების მიმართ ღია ინტერესის და კრიპტოვალუტის კაპიტალიზაციის თანაფარდობის შემცირებაზე. Ethereum-ის კურსის ამჟამინდელი აღმასვლა წინა მსგავსი ეტაპებისგან განსხვავებულია, რომელთა დროსაც იგი სპეკულაციურ კომპონენტს შეიცავდა. ამჟამად მაჩვენებელი 2.6%-მდე შემცირდა, რაც 2.5-ჯერ აღემატება Bitcoin-ის ანალოგიურ ნიშნულს (1.8%). Ethereum-ის ფიუჩერსების ღია ინტერესის დინამიკა და ამ მაჩვენებლის თანაფარდობა კაპიტალიზაციასთან. წყარო: Arcane Research. შეგახსენებთ, Ethereum-კონტრაქტებზე მოკლევადიანი პოზიციების ლიკვიდაციის მოცულობა ახალ მაქსიმუმზე განახლდა კურსის 3500 აშშ დოლარამდე ზრდის ფონზე. https://bit.ly/3h8BlZ8

მარტში ცნობილმა ანალიტიკოსმა Ming-Chi Kuo-მ გააზიარა ინფორმაცია, რომლის თანახმად 2023 წელს შესაძლოა გაყიდვაში გამოვიდეს დასაკეცი iPhone 8-დუიმიანი ეკრანით. ამჟამად მან ინვესტორებს გაუგზავნა ჩანაწერი, რომლის თანახმად დასაკეცი iPhone-ების რაოდენობა ორი წლის შემდეგ 15-20 მილიონი ეგზემპლარი იქნება. ამგვარი სმარტფონის დიზაინისა და მახასიათებლების შესახებ ამ ეტაპზე ცნობილი არაფერია. დაუდასტურებელი ინფორმაციით, დრეკადი OLED პანელების ექსკლუზიური მომწოდებელი კომპანია Samsung იქნება. ადრე ანალიტიკოსი აცხადებდა, რომ ეკრანის დიაგონალი 7.5-სა და 8 დუიმს შორის ვარირებდა, ამჯერად კი მან დაადასტურა საკუთარი პროგნოზი. კომპანია Samsung ლიდერია დრეკადი სმარტფონების გამოშვების მოცულობის მხრივ, თუმცა განვითარებული ეკოსისტემისა და აპლიკაციების წყალობით Apple-ს შეუძლია სამომავლოდ მოწინავე პოზიციის დაკავება. სავარაუდოდ, გასულ წელს კომპანია Foxconn-მა Apple-ისთვის უკვე შექმნა დრეკადი სმარტფონის ორი პროტოტიპი. ერთ-ერთი მათგანი გავდა Samsung Galaxy Z Fold-ს, მეორე - Galaxy Z Flip-ს. პირველ ვარიანტს აქვს 6.2-დუიმიანი ეკრანი, რომელიც იშლება და იზრდება 7.6-დუიმამდე. მეორე მათგანის ეკრანის ზომა გახსნილ მდგომარეობაში 6.7 დუიმია. არსებობს ალბათობა, რომ Apple აირჩევს Galaxy Z Flip-ის მსგავს დაკეცვის სისტემას. ჩანაწერში მოცემული იყო, რომ დრეკადი სმარტფონები ამჟამად გვევლინება, როგორც სმარტფონისა და პლანშეტის გამაერთიანებელი პროდუქტი. ანალიტიკოსის აზრით სამომავლოდ ამგვარი მოწყობილობები გახდება უფრო მრავალფეროვანი და შეძლებენ ლეპტოპების შევიწროებასაც კი. Apple-ს თავისი პროგრამული და აპარატული უზრუნველყოფის მჭიდრო ინტეგრაციის წყალობით უპირატესობა ექნება მსგავსი მოწყობილობების სხვა მწარმოებლებთან შედარებით. https://bit.ly/3uguVLy

იაპონურმა კომპანია Sony-მ Discord-თან დადო პარტნიორული შეთანხმება, რომლის ფარგლებში მოხდება გეიმერებს შორის პოპულარული სერვისის ინტეგრირება PlayStation-ში 2022 წლის დასაწყისისთვის. ამ სიახლის შესახებ ცნობები გამოჩნდა Sony-ს ოფიციალურ ბლოგში. „ჩვენ მუდმივად ვეძებთ ახალ მეთოდებს, რომლებიც მთელი მსოფლიოს გეიმერებს საშუალებას მისცემს იკონტაქტონ ერთმანეთთან, დაამყარონ ახალი მეგობრული ურთიერთობები და შექმნან ქომიუნითი, აგრეთვე ერთმანეთს გაუზიარონ შთაბეჭდილებები და მოგონებები. ამ საქმიანობის ფარგლებში ჩვენ მოხარულნი ვართ Discord-თან თანამშრომლობით, რომელსაც ყოველთვიურად მსოფლიოში 140 მილიონი ადამიანი იყენებს“ - ნათქვამია Sony-ს შეტყობინებაში. ასევე ითქვა, რომ Sony-მ მცირე ინვესტიცია ჩადო Discord-ში, თუმცა თანხის რაოდენობა არ ხმაურდება. არსებული ცნობებით დეველოპერებმა უკვე დაიწყეს საკომუნიკაციო სერვისის ინტეგრირება PlayStation-ში, შედეგის შეფასებას მომხმარებლები მომდევნო წელს შეძლებენ. უნდა აღინიშნოს, რომ სერვისი Discord აგრეთვე ხელმისაწვდომი იქნება Sony-ს საფირმო მობილურ აპლიკაციაში. „ჩვენი მიზანია, რომ მომდევნო წელს გაერთიანდეს Discord-ისა და PlayStation-ის შესაძლებლობები კონსოლებსა და მობილურ მოწყობილობებზე, რათა მომხმარებლებმა შეძლონ დრო გაატარონ კომფორტულად, გაერთონ, იკონტაქტონ და ითამაშონ ერთად“ - აცხადებს Sony. https://bit.ly/3vG0oa4

უძველესმა კრიპტობირჟა Bitstamp-მა განაცხადა, რომ ემზადება შეერთებული შტატების ბაზარზე ექსპანსიისთვის. სავაჭრო პლატფორმის ინფორმაციის მიხედვით აშშ-ში მცხოვრებ მომხმარებელთა რიცხვი 570%-ით გაიზარდა მიმდინარე წლის პირველი ოთხი თვის განმავლობაში. ანგარიშის თანახმად, პირველ კვარტალში მართვის ქვეშ არსებული აქტივების ღირებულება გაიზარდა 281%-ით, ამერიკელი მომხმარებლების აქტივობამ კი იმატა 348%-ით. Bitstamp-ში აღნიშნეს, რომ ცდილობენ ითანამშრომლონ აშშ-ის ისეთ წამყვან ფინანსურ კომპანიებთან, როგორებიცაა Nasdaq და Silvergate Bank, რათა შეიქმნას „უკეთესი საბაზრო ინფრასტრუქტურა“ კასტოდიალური მომსახურებებითა და რეგულირებადი დერივატივებით. შეგახსენებთ, 2020 წლის დეკემბერში Bitstamp-მა ამერიკელი მომხმარებლებისთვის გააუქმა XRP ტოკენებით ვაჭრობის შესაძლებლობა Ripple-ის მიმართ SEC-ის პრეტენზიების ფონზე. https://bit.ly/2Rrw98g

კომპანია NVIDIA გეგმავს მიმდინარე თვის ბოლოს დააანონსოს GeForce RTX 3080 Ti და GeForce RTX 3070 Ti გრაფიკული ამაჩქარებლები. უახლესი მონაცემებით, NVIDIA 2 ივნისს მოხსნის აკრძალვას GeForce RTX 3080 Ti-ზე მიმოხილვების გამოქვეყნების შესახებ. GeForce RTX 3070 Ti-ს მიმოხილვები დაიწყება 9 ივნისს. ახალი დაფების გაყიდვის დაწყების თარიღის შესახებ ჯერ არაფერი ცხადდება, მაგრამ, როგორც წესი, ვიდეო დაფები საცალო ვაჭრობაში გადის მიმოხილვების გამოქვეყნების აკრძალვის მოხსნის დღეს, ან მის მეორე დღეს. დაგეგმილი ანონსის შესახებ ცნობები გააზიარეს რესურსებმა VideoCardz და Overclocking.com გრაფიკული პროცესორების მწარმოებელთა პარტნიორების ინფორმაციაზე დაყრდნობით. ასევე მითითებულია, რომ NVIDIA-მ დაიწყო GA10X-XX2 სერიის GPU-ზე დაფუძნებული Ampere ვიდეო დაფების მიწოდება. ამ ჩიპების განსაკუთრებული მახასიათებელია მაინინგის ინტეგრირებული შემზღუდველი. ცნობილია, რომ ახალი დაფები ხელმისაწვდომი გახდება უახლოეს კვირაში. მითითებულია, რომ NVIDIA აპირებს ორი უახლოესი თვის განმავლობაში განაახლოს GeForce RTX 30-სერიის ყველა ვიდეო დაფა ახალი GPU-ით, რომელთა შემადგენლობაში მოცემული იქნება მაინინგის აპარატული შემზღუდველი. GeForce RTX 3080 Ti და GeForce RTX 3070 Ti მოდელები წარმოდგენილი იქნება პირდაპირ ამ სისტემით. ამ ვიდეო დაფებმა თავიდანვე მიიღეს ახალი პროცესორები - GA102-225 და GA104-400, შესაბამისად. GeForce RTX 3080 Ti დაფის საფუძვლად გამოყენებულია GPU - 10240 CUDA ბირთვით (სტანდარტულ GeForce RTX 3080 მოდელში მათი რიცხვი 8704-ია). ვიდეო დაფა აღჭურვილია 12 გბ GDDR6X ვიდეომეხსიერებით, რაც მხოლოდ 2 გბ-ით არის მეტი სტანდარტულ GeForce RTX 3080-თან შედარებით. თუმცა უფრო ფართო, 384-ბიტიანი სალტის წყალობით ახალი დაფის მეხსიერების სიჩქარე გაზრდილია 152 გმ/წმ-ით და შეადგენს 912 გბ/წმ-ს. GeForce RTX 3070 Ti დაფის შემადგენლობაში გამოყენებულია გრაფიკული პროცესორი 6144 CUDA ბირთვით (სტანდარტულ მოდელში 5888 CUDA ბირთვია). ვიდეო დაფას აქვს 8 გბ GDDR6X მეხსიერება. მოცულობა იგივეა, რაც სტანდარტული GeForce RTX 3070-ს შემთხვევაში, თუმცა ახალ დაფაში უფრო ჩქარი, GDDR6X სტანდარტის მეხსიერებაა წარმოდგენილი და მისი წყალობით სიჩქარე 608 გბ/წმ-ს შეადგენს. https://bit.ly/3nIVhDe

ინტერნეტ-წყაროების ინფორმაციით, კორპორაცია Intel გამოსაშვებად ამზადებს ახალ, NUC-სერიის მცირე ფორმ-ფაქტორის კომპიუტერს კოდური დასახელებით - Atlas Canyon. კომერციულ ბაზარზე მოწყობილობა გამოვა სახელწოდებით - NUC 11 Essential. კომპიუტერში გამოყენებული იქნება Jasper Lake თაობის პროცესორი. ეს შესაძლოა იყოს ჩიპი Pentium Silver J6005 (NUC11ATKPE), Celeron J5105 (NUC11ATKC4) ან Celeron J4505 (NUC11ATKC2). პირველ ორ მათგანში მოცემულია ოთხი ბირთვი, მესამეში - ორი. მრავალნაკადიანი ტექნოლოგია მხარდაჭერილი არ არის. მოწყობილობას ექნება DDR4-2933 სტანდარტის ოპერატიული მეხსიერების მხარდაჭერა მოცულობით 16 გბ-მდე. სისტემა შესაძლოა აღჭურვილი იყოს PCIe x4 ან SATA 3.0 ინტერფეისის მქონე M.2 2280 SSD-ით. აღჭურვილობაში შევა Wi-Fi 6 და Bluetooth 5.2 უსადენო კავშირების ადაპტერები, აგრეთვე ქსელური კონტროლერი Gigabit Ethernet. ხელმისაწვდომი იქნება კონექტორები HDMI 2.0b და DisplayPort 1.4, ოთხი პორტი USB 3.1 Type-A და ორი პორტი USB 2.0, აგრეთვე სტანდარტული აუდიოკონექტორი ყურსასმენისა და მიკროფონისთვის. ცნობილია მოწყობილობის გაბარიტები - 135 × 115 × 36 მმ. 2.5-დუიმიანი მყარი დისკის დაყენების შესაძლებლობა გათვალისწინებული არ არის. NUC 11 Essential-ის გაყიდვა დაიწყება მომდევნო წლის პირველ კვარტალში. მოწყობილოს საორიენტაციო ფასი ამჟამად უცნობია. https://bit.ly/3b26MR9

რესურსი Videocardz აცხადებს, რომ მომდევნო თვის შუა პერიოდში NVIDIA დაიწყებს მაინინგის აპარატული შეზღუდვის მქონე RTX 30 ვიდეო დაფების მიწოდებას. GAxx2-ზე დაფუძნებული ახალი GPU-ები გავლენას არ მოახდენს გეიმინგში ვიდეო დაფის შესაძლებლობებზე, სამაგიეროდ შეამცირებს Ethereum-ის მოპოვების სიჩქარეს. იმის გასაგებად, ძველი თუ ახალი GPU აქვს მომხმარებლის ვიდეო დაფას, შესაძლებელია კრიპტოვალუტის მაინინგის გამოყენება, ან თავად გრაფიკულ პროცესორზე მითითებული ნიშნის ნახვა. ერთადერთი ვიდეო დაფა, რომელსაც ზემოთხსენებული სიახლე არ შეეხება, არის RTX 3090, რაც ნაკლებად მნიშვნელოვანია, რადგან მას იშვიათად იყენებენ მაინინგისთვის მაღალი ფასის გამო. თუკი შეზღუდვა მართლაც ეფექტური აღმოჩნდება, თვალსაჩინოდ შემცირდება მაინერების სურვილი - შეიძინონ გეიმერული ვიდეო დაფები. ამის ნაცვლად ისინი გადაერთვებიან მაინინგზე სპეციალიზებულ ვიდეო დაფებზე, რომელთაც NVIDIA გამოსაშვებად ამზადებს. NVIDIA-ს ფინანსური დირექტორის პროგნოზების თანახმად დეფიციტის პრობლემა გადაიჭრება მიმდინარე წლის ბოლოს და კომპანია მას ხელს შეუწყობს. https://bit.ly/3xy1eaU

მიმდინარე წლის ბოლოს ბრიტანეთის ხელისუფლება ავტომობილებს ნებას მისცემს გადაადგილდნენ თვითმართვის რეჟიმში საზოგადოებრივ გზებზე. ეს ცნობა ვრცელდება ქვეყნის ტრანსპორტის სამინისტროს მიერ გამოქვეყნებულ ინფორმაციაზე დაყრდნობით. ჯერჯერობით საუბარი არ ეხება სრულფასოვანი ავტოპილოტის გამოყენებას. მის ნაცვლად მძღოლებს უფლება ექნებათ გადაადგილდნენ მოძრაობის ზოლის ავტომატური შენარჩუნების გააქტიურებული სისტემით (ALKS), რაც განსაკუთრებით აქტუალურია მაგისტრალებზე მოძრაობის დროს. მნიშვნელოვანია აღინიშნოს, რომ ALKS-ის გამოყენებით გზავრობისას მძღოლებს არ მოეთხოვებათ მუდმივად ადევნონ თვალყური გზას ან ხელი საჭეზე ეჭიროთ. ამავე დროს, მძღოლები მზად უნდა იყვნენ, რომ ბორტ-კომპიუტერისგან მიღებული მოთხოვნიდან 10 წამის განმავლობაში მართვა საკუთარ თავზე აიღონ. იმ შემთხვევაში, თუკი მძღოლი არ მოახდენს ხელით მართვის დაწყების შესახებ სისტემის მოთხოვნაზე რეაგირებას, ავტომობილი გაააქტიურებს ავარიულ სიგნალიზაციას, ნელ-ნელა შეამცირებს სიჩქარეს და გაჩერდება საბოლოოდ. აღსანიშნავია, რომ სისტემა ALKS უზრუნველყოფს სატრანსპორტო საშუალებების ერთ ზოლში გადაადგილებს 60 კმ/სთ სიჩქარის დიაპაზონში. ექსპერტების აზრით ამ ტექნოლოგიის გამოყენება მნიშვნელოვნად შეამცირებს ავტომაგისტრალებზე ავარიების რაოდენობას „ადამიანური ფაქტორის“ გამორიცხვის ხარჯზე. https://bit.ly/3vxGwWN

კომპანია Samsung Electronics-მა ღონისძიება Unpacked 2021-ის ფარგლებში დააანონსა პორტატული კომპიუტერები Galaxy Book Pro და Galaxy Book Pro 360, რომლებშიც გამოყენებულია ოპერაციული სისტემა Windows 10 Home/Pro და მე-11 თაობის Intel Core პროცესორები. ორივე მოწყობილობა წარმოდგენილი იქნება ზომაში ორ-ორ ვარიანტად - 13.3 და 15.6-დუიმიანი დისპლეებით. ყველა შემთხვევაში გამოყენებულია Full HD ფორმატის მატრიცა გაფართოებით 1920 × 1080 პიქსელი. Galaxy Book Pro 360 მოდელის ეკრანი ბრუნავს 360 გრადუსით, რაც საშუალებას იძლევა მოწყობილობა გამოყენებულ იქნას პლანშეტის სახით. დისპლეიზე მოქმედება შესაძლებელია თითის ან საფირმო S Pen-ის გამოყენებით. მოდიფიკაციის მიხედვით ლეპტოპებში გამოყენებულია Intel Core i7, i5 და i3 პროცესორები ინტეგრირებული გრაფიკით. Galaxy Book Pro 15 მოდელში ასევე დასაშვებია დისკრეტული NVIDIA GeForce MX450 ვიდეო დაფის დაყენება. კომპიუტერებს აქვთ LPDDR4x ტიპის 32 გბ-მდე ოპერატიული მეხსიერება, NVMe SSD 1 ტბ მოცულობით, 720p ვებ-კამერა, Wi-Fi 6 (802.11ax 2x2) და Bluetooth 5.1 უსადენო კავშირების ადაპტერები, აგრეთვე AKG აუდიოსისტემა. Galaxy Book Pro ლეპტოპებში გათვალისწინებულია 4G/LTE მოდული ქსელთან მიერთებისთვის, ტრანსფორმერ Galaxy Book Pro 360 მოდელებს კი აქვთ 5G კავშირის მხარდაჭერა. ლეპტოპი Galaxy Book Pro გამოვა შემდეგ ფერებში: Mystic Blue, Mystic Silver და Mystic Pink Gold და მისი ფასი 1000 აშშ დოლარი იქნება. Galaxy Book Pro 360 მოდელი ხელმისაწვდომია ფერებში - Mystic Navy, Mystic Silver და Mystic Bronze და გაიყიდება 1200 აშშ დოლარად. https://bit.ly/3dZs8jW

კრიპტობირჟა Binance-ს სურს შექმნას საკუთარი პლატფორმა NFT ტოკენებით ვაჭრობისთვის, რის შესახებ მითითებულია სერვისის ვებ-გვერდზე. პლატფორმის ამოქმედება დაგეგმილია მიმდინარე წლის ივნისისთვის. ანონსის თანახმად კომპანია მიზნად ისახავს შექმნას მსოფლიოში უდიდესი NFT ტოკენების ბირჟა. მასზე გაიყიდება სხვადასხვა ციფრული კოლექცია, რომლებიც დაკავშირებულია მუსიკასთან, სპორტთან, თამაშებთან და სხვა სფეროებთან. „ჩვენ ვცდილობთ შევქმნათ ყველაზე მიმზიდველი გარემო უნიკალური შეთავაზებებითა და ექსკლუზიური თანამშრომლობით. ეს ყველაფერი გაერთიანდება კარგად დაპროექტებულ და ადვილად აღქმად ციფრულ პლატფორმასთან, რათა მთელი მსოფლიოს მხატვრები, კრიპტოვალუტების ენთუზიასტები და შემქმნელები გააერთიანოს“ - ნათქვამია Binance-ის განცხადებაში. ტოკენების შეტანისას კომპანია მომხმარებლისგან მიიღებს სიმბოლურ თანხას 1%-ის ოდენობით, თუმცა სამომავლოდ ნამუშევრის ავტორი 1%-ს მიიღებს თავის ნამუშევართან დაკავშირებული თითოეული ტრანზაქციიდან. დიდ აუქციონებზე NFT-ტოკენების შესყიდვის შემთხვევაში გამყიდველი თანხის 90%-ს მიიღებს, დანარჩენი 10% დარჩება პლატფორმას ორგანიზებისა და შუამავლობის ანაზღაურების სახით. ბოლო წლების განმავლობაში არაურთიერთჩანაცვლებადი ტოკენების პოპულარობა მეტად გაიზარდა. სერვის NonFungible.com-ის თანახმად მიმდინარე წლის პირველ კვარტალში NTF-ის ჯამურმა ბრუნვამ 2 მლრდ აშშ დოლარს მიაღწია. ამ თანხაში არ შედის Mike Winkelmann-ის, ასევე ცნობილი Beeple-ს სახელით, ნამუშევარი, რომელიც რეკორდულ 69 მლნ აშშ დოლარად გაიყიდა. https://bit.ly/2R6mZhe

კომპანია Amazon-მა წარადგინა ახალი თაობის პლანშეტები Fire HD 10: სერიაში შევიდა საბაზისო ვერსია და გაუმჯობესებული მოდიფიკაცია Plus პრეფიქსით. ბავშვებისთვის კი შემოთავაზებულია ვერსია Fire HD 10 Kids. Fire HD 10 და Fire HD 10 Plus მოდელებს აქვთ 10.1-დუიმიანი დისპლეი 1920 × 1200 პიქსელი გაფართოებითა და 224 PPI პიქსელების სიმჭიდროვით. ოფციურად მიერთებადი კლავიატურა საშუალებას იძლევა გაჯეტები გარდაიქმნას პატარა ლეპტოპებად. მოწყობილობაში გამოყენებულია რვაბირთვიანი პროცესორი 2.0 გჰც ტაქტის სიხშირით. Fire HD 10 მოდელის შემთხვევაში ოპერატიული მეხსიერების მოცულობა 3 გბ-ს შეადგენს, Fire HD 10 Plus-ის კი - 4 გბ-ს. პლანშეტები დაკომპლექტებულია 32 ან 64 გბ ფლეშ-მეხსიერებით, მეხსიერების სანახი სივრცის გაფართოება შესაძლებელია microSD ბარათის მეშვეობით. მოცემულია 2-მეგაპიქსელიანი ფრონტალური და 5-მეგაპიქსელიანი უკანა კამერა. მოწყობილობებზე ხელმისაწვდომია USB Type-C პორტი და 3.5-მილიმეტრიანი აუდიოკონექტორი. პლანშეტების ზომაა 247 × 166 × 9.2 მმ, წონა - 468 გრამი. სრულად დამუხტული ბატარეისას ავტონომიური მუშაობის დროდ გამოცხადებულია 12 საათი. Fire HD 10 Plus მოდელს დამატებით გააჩნია უსადენო დამუხტვის მხარდაჭერა. რაც შეეხება Fire HD 10 Kids ვერსიას, იგი დაკომპლექტებულია სპეციალური დამცავი ქეისით, ღირებულებაში შედის Amazon Kids+-ის წლიური გამოწერა საბავშვო კონტენტზე წვდომისთვის. მოწყობილობის მახასიათებლები Fire HD 10-ის ანალოგიურია. Fire HD 10 და Fire HD 10 Plus პლანშეტების ფასი იწყება 150 და 180 აშშ დოლარიდან, შესაბამისად. Fire HD 10 Kids ვერსიის ღირებულება კი 200 აშშ დოლარს შეადგენს. https://bit.ly/3dYmhvu

გასული წლის ბოლოს Apple-მა წარადგინა ARM არქიტექტურაზე დაფუძნებული პირველი პროცესორი Mac-კომპიუტერებისთვის. მას ეწოდა Apple M1. ამჟამად ის შედის უახლესი თაობის MacBook Air-ის, MacBook Pro-ს, Mac Mini-ს, iMac-ისა და iPad Pro-ს შემადგენლობაში. კომპანია დასვენებას არ აპირებს და უკვე მეორე თაობის პროცესორებს ამზადებს. გამომცემლობა Nikkei Asia გვაცნობებს, რომ სამრეწველო წარმოება უკვე დაწყებულია. მიწოდება დაიწყება ივლისში, ახალ პროცესორებზე მომუშავე Macbook ლეპტოპები კი წლის მეორე ნახევარში გამოჩნდება. ამის შემდეგ ჩიპები შევა სხვა Mac-კომპიუტერებისა და Apple-ის ბევრი მოწყობილობის შემადგენლობაში. მწარმოებელი კვლავ იქნება ტაივანური კომპანია TSMC. იგი გამოიყენებს 5-ნანომეტრიან N5P ტექნოპროცესს. ვინაიდან ეს არის სისტემა ჩიპზე, მასში განთავსდება ცენტრალური და გრაფიკული პროცესორი, ასევე ხელოვნური ინტელექტის ალგორითმების დამუშავების ბლოკი. ამრიგად, კომპანია აგრძელებს Intel-ის პროცესორებისგან ჩამოშორებას ARM-არქიტექტურის სასარგებლოდ. ჯერჯერობით ისეთი კომპიუტერების უმეტესობა, როგორებიცაა iMac, iMac Pro და Mac Pro, კვლავ Intel-ის ჩიპებზე მუშაობს. საკუთარი წარმოების პროცესორებზე სრულად გადასვლაში Apple ორი წლის დახარჯვას აპირებს. https://bit.ly/3aLB7n0

მაინინგისადმი გაძლიერებული ინტერესი და მთელი რიგი კრიპტოვალუტების კურსის ზრდა იპყრობს არა მხოლოდ კეთილსინდისიერი, არამედ ბოროტმოქმედი მაინერების ყურადღებასაც, რომლებიც ცდილობენ მოგება არაკეთილსინდისიერი მეთოდებით ნახონ: ისინი ინსტრუმენტების სახით იყენებენ უსაფრთხოებაში არსებულ ხვრელებსა და მომხმარებლების გულუბრყვილობას, აზიანებენ მოწყობილობებს ზიანისმომტანი პროგრამებით და შედეგად ფარულად მოიპოვებენ კრიპტოვალუტას. ზიანისმომტანი მაინინგის შემთხვევებმა დააფიქრა არა მხოლოდ ანტივირუსების, არამედ აპარატული უზრუნველყოფის მწარმოებლებიც, რასაც მოწმობს Intel-ისა და Microsoft-ის თანამშრომლობა ამ სფეროში: როგორც Intel-ის ოფიციალური ვებ-გვერდი გვაცნობებს, Defender for Endpoint ავტივირუსმა გაფართოებული შესაძლებლობები შეიძინა ისეთი ტიპის ზიანისმომტანი პროგრამის აღმოსაჩენად, რომელიც მოწყობილობის რესურსებს იყენებს კრიპტოვალუტების ფარულად მოპოვებისთვის. ამიერიდან Microsoft Defender for Endpoint, Intel Threat Detection Technology-ს გამოყენებითა და მანქანური სწავლების შესაძლებლობებით შეძლებს გამოიყენოს ცენტრალური პროცესორის სიმძლავრე საფრთხის აღმოჩენის მიზნით. ამასთან, კომპანიები ამტკიცებენ, რომ ეს ფუნქცია არ შეასუსტებს სისტემის წარმადობას, საჭიროების შემთხვევაში შესაძლებელია დამატებით საქმეში ჩაერთოს ინტეგრირებული გრაფიკული ქვესისტემა. ფოტოს წყარო: Intel IDC-ის უსაფრთხოების საკითხების ვიცე-პრეზიდენტ ფრენკ დიკსონის თქმით, აპარატული დონის დაცვა საშუალებას მისცემს Intel-ზე დაფუძნებულ სისტემებს იყვნენ უფრო დაცული, ვიდრე AMD-ის, Apple-ისა და კიდევ რამდენიმე კომპანიის პროდუქტებზე დამყარებული მოწყობილობებია. საფრთხეების გამოვლენის ტექნოლოგიის მხარდაჭერა მავნე მაინინგისგან დაცვის ჩათვლით ხელმისაწვდომია მე-10 თაობიდან დაწყებული Intel Core და vPro პლატფორმებისათვის. https://bit.ly/3dU50n7

TSMC მსოფლიოს წამყვანი ლითოგრაფიული კომპანიაა და ეს სტატუსი უახლოესი 4-5 წლის მანძილზე არ შეიცვლება. Apple M1 ჩიპსეტში გამოყენებული 5-ნანომეტრიანი EUV ტექნოპროცესი ამჟამად მსოფლიოში ყველაზე მოწინავეა, რაც შედარებულია Intel-ის სამომავლო 7-ნანომეტრიან ტექნოპროცესთან, რომელიც დაახლოებით 2 წელში გამოვა. TSMC გეგმავს თითქმის 30 მლრდ აშშ დოლარის დახარჯვას მიმდინარე წელს საკუთარი მოწინავე ტექნოლოგიური პროცესების შესაძლებლობების გასაფართოვებლად. მათ შორისაა N7, რომელიც გამოიყენება AMD Ryzen 5000 პროცესორებში, PS5/XBox S/X კონსოლებსა და სმარტფონების ჩიპსეტების უმეტესობაში. რაც შეეხება N5 ტექნოპროცესს, წლის ბოლოს TSMC გეგმავს საწარმოო სიმძლავრის თვეში 120-125 ათას ფირფიტამდე გაფართოებას, რაც ისეთ მსხვილ დამკვეთებს, როგორებიცაა AMD, MediaTek და Qualcomm, საშუალებას მისცემს მიიღონ მეტი შეკვეთილი პროდუქცია. TSMC N4 (4-ნმ) ტექნოპროცესი, რომელიც N5-ის გაუმჯობესებული ვერსიაა, წარმოდგენილი იქნება მომდევნო თაობის iPhone-ის ჩიპებში 2022 წლის მეორე კვარტალში, პირველი N3 (3-ნმ) პროდუქცია კი, როგორც მოსალოდნელია, მასობრივ წარმოებაში ჩაეშვება 2022 წლის მეორე ნახევარში. N4-ზე გადასვლის წინ კომპანია TSMC გეგმავს კიდევ ერთ გარდამავალ ეტაპს, სახელწოდებით N5P, რომლის წარმოების დაწყება უახლოეს დროშია მოსალოდნელი. N5P ტექნოპროცესის წყალობით ჩიპების ტაქტის სიხშირე გაიზრდება 5%-ით ან შემცირდება ენერგომოხმარება 10%-ით. შედარებისთვის, N5 ტექნოპროცესი იყო 30%-ით ენერგოეფექტური N7-თან შედარებით, ანუ 15%-ით უფრო სწრაფი იმავე დატვირთვისას, სიმჭიდროვის 1.8-ჯერ მატებით. რაც შეეხება N3 ტექნოპროცესს, მისი გამოყენებით TSMC ცდილობს ენერგოეფექტურობის გაზრდას 25-30%-ით, ან წარმადობის მატებას 10-15%-ით N7-დან N5-ზე გადასვლის ანალოგიური სიმკვრივის პირობებში. მოსალოდნელია, რომ ლოგიკური სიმკვირის ზრდა 1.7-ჯერზე ოდნავ ნაკლები იქნება. ისევე, როგორც N4-ის შემთხვევაში, პირველი N3 ჩიპების წარმოებაც დაგეგმილია 2021 წლის მეორე ნახევრისთვის, მასიური წარმოება კი უნდა დაიწყოს 2022 წლის მეორე ნახევარში. ამჟამად 7-ნანომეტრიანი ტექნოპროცესი შეადგენს ტაივანური ლითოგრაფიული წარმოების ძირითად ნაწილს, თუმცა 5-ნანომეტრიანი ტექნოლოგიის წილი გაიზრდება 20%-მდე მიმდინარე წელს, ასევე მოსალოდნელია 35-40%-იანი ზრდა მომავალ წელს. ასევე განიხილება უფრო მაღალი წარმადობის ტექნოპროცესები, მათ შორის 2- და 1-ნანომეტრიანი ტექნოლოგიები, რომლებშიც გამოყენებული იქნება GAA ტექნოლოგიის უპირატესობა. მათი წარმოების ვადების შესახებ ცნობილი არაფერია, თუმცა Fab 12 უკვე აწარმოებს კვლევებს ხსენებული მიმართულებებით. https://bit.ly/2Pt8oMk

Auto Shanghai 2021 ავტოსალონზე კომპანია Audi-მ წარადგინა ორი სიახლე: Q4 E-tron და A6 E-tron. ბოლო მათგანი ჯერჯერობით მხოლოდ კონცეპტის სახით არსებობს, თუმცა შეიძლება გახდეს მეორე სერიული ავტომობილი არქიტეტურით - Premium Platform Electric. ამ ელექტრომობილის გამორჩეული მახასიათებელია „ჭკვიანი“ ფარები, რომლებიც იმავდროულად წარმოადგენენ მაღალი გაფართოების პროექტორებს. ელექტრომობილის თითოეულ საბურავზე დამონტაჟებული იქნება 469 ცხენის ძალა სიმძლავრის ძრავი, რაც საშუალებას იძლევა 100 კმ/სთ სიჩქარე მიღწეულ იქნას 4 წამში. 100-კილოვატიანი ბატარეა უზრუნველყოფს 700 კმ-მდე სვლის მარაგს, თუმცა მომხმარებლებისთვის ხელმისაწვდომი იქნება შედარებით ეკონომიური ვერსიაც. დამუხტვის დროს მფლობელი არ მოიწყენს - აკუმულატორი 5-დან 80%-მდე იმუხტება მხოლოდ 25 წუთში, ხოლო თუ ეს პროცესი მაინც ხანგრძლივად მოგეჩვენებათ, ასეთ შემთხვევაში შესაძლებელია მანქანის გასართობი ფუნქციის გამოყენება. სადემონსტრაციო ვიდეო შეგიძლიათ ნახოთ ბმულზე: https://bit.ly/3xn2r4N წინა ფარები ციფრული მატრიცულია და დაფუძნებულია მილიონი მიკროსკოპული სარკის ბაზაზე ჩამკეტი სისტემითა და წამში 5 ათასი სიხშირით. შედეგად შესაძლებელი ხდება მათი მეშვეობით უახლოეს კედელზე პროეცირდეს მაღალი გაფართოების გამოსახულება - მაგალითად, ვიდეოთამაში. რა თქმა უნდა, გამოსახულების ხარისხი იდეალური არ არის, თუმცა მფლობელი სმარტფონის გამოყენებით შეძლებს თამაშით გართობას, სანამ ბატარეა დაიმუხტება. ამგავრი ინოვაციის ძირითადი ამოცანაა მფლობელის ამბიციების რეალიზება და სატრანსპორტო საშუალების ექსკლუზიურობის დემონსტრირება. არა მხოლოდ წინა, ასევე უკანა სასიგნალო ფარები, ასევე კომპაქტური შუქდიოდური პროექტორები გვერდებზე პროეცირებენ სივრცეში და გზაზე სხვადასხვა მანათობელ სიგანლებს, შეტყობინებებსა და ნიშნებს. მაგალითად, სისტემა მგზავრებს ჩასხდომის წინ მიესალმება და გაუნათებს კარის ღიობს, ან შეახსენებს ველოსიპედისტებს გზაზე, რომ დისტანცია უნდა დაიცვან. https://bit.ly/32OgQsF

ჩინურმა კომპანია Bitmain-მა გამოუშვა Antminer E9-ის თიზერი, რომელიც უზრუნველყოფს Ethereum-ის მაინინგის 3 გჰეშ/წმ-მდე სიჩქარეს, რაც 32 ცალი NVIDIA GeForce RTX 3080 ვიდეო დაფის ეკვივალენტურია. გაყიდვის დაწყების თარიღი მითითებული არ არის, თუმცა ცნობილია რომ ეს მალე მოხდება. კრიპტოვალუტების მოპოვებისთვის ვიდეო დაფების გამოყენება ხელს უწყობს მწარმოებელ კომპანიებს გამოუშვან წარმოუდგენელი რაოდენობის მაღალი წარმადობის ამაჩქარებლები, თუმცა ამავე დროს მძიმე დარტყმას აყენებს გეიმინგ სისტემების ტრადიციულ ბაზარს. პრობლემის გადაჭრა გულისხმობს არა მხოლოდ ხელოვნურ შეზღუდვებს, არამედ ასევე უფრო ეფექტური სპეციალიზებული სისტემების შექმნას, რითიც არიან დაკავებულნი არა მხოლოდ NVIDIA და AMD, ასევე ისეთი კომპანიები, როგორიცაა Bitmain. Antminer E9 Ethereum-ის გამომთვლელი მოდულები წარმოადგენს სპეციალური დანიშნულების ინტეგრირებულ სქემას (ASIC). მსგავსი გადაწყვეტილებები არ გამოირჩევა უნივერსალურობით, თუმცა უფრო ეფექტურად უმკლავდებიან იმ სპეფიციკურ ამოცანებს, რისთვისაც არიან განკუთვნილნი და, შესაბამისად, უფრო იაფია თანაბარშედეგიანობის მხრივ. დღესდღეობით Antminer E9 ყველაზე სწრაფი ASIC-მაინერია და აღემატება Linzhi Phoenix Ethash ASIC-საც კი, რომლის სიჩქარეა 2.6 გჰეშ/წმ. თუკი კრიპტოენთუზიასტები ახალ მოწყობილობას გამოიყენებენ, შეიძლება უარი თქვან NVIDIA Ampere-ზე და, შესაძლოა, გეიმერებმა ბოლოსდაბოლოს შეძლონ ვიდეო დაფების ყიდვა გონივრულ ფასად. ჯერჯერობით Bitmain-ს არ გაუსაჯაროებია Antminer E9-ს დეტალები წარმადობისა და ენერგომოხმარების გარდა - 2556 ვტ (0,85 ჯ/მჰეშ). ამრიგად, Antminer E9 მოდელი Phoenix-ზე სწრაფიც არის და ენერგოეფექტურიც. შედარებისთვის, Phoenix მოიხმარს 3000 ვატს. ეს ნიშნავს იმას, რომ Antminer E9 35.5%-ით უფრო ეფექტურად მოიხმარს ელექტროენერგიას. ცხადია, რომ 32 GeForce RTX 3080 ვიდეო დაფის ეკვივალენტური სიმძლავრის მქონე მაინერი იაფი ვერ იქნება. Linzhi Phoenix მაინერი იყიდება 11 300 - 13 700 აშშ დოლარად. დიდი ალბათობით, ახალი Antminer-ის ფასი 15 ათას აშშ დოლარზე მეტი იქნება, თუმცა ორჯერ ძვირიც რომ ღირდეს, მაინც ეფექტური მოწყობილობა იქნება. შედარებისთვის, GeForce RTX 3080 ვიდეო დაფა ამჟამად ღირს 2500 აშშ დოლარი და მეტი, შესაბამისად, 32 ამგვარი ამაჩქარებლის შეძენა (ფერმის სხვა კომპონენტების გარეშე) კოლოსალური თანხა - 80 ათასი აშშ დოლარი ჯდება და მაინერები მიდიან კიდეც ამ მსხვერპლზე. ფაქტია, კომპლექსური ASIC-მაინერები მიუწვდომელია ყველა მაინერისთვის, თუმცა მარტივი მათემატიკა ამტკიცებს, რომ ისინი კრიპტოვალუტების მოპოვების მომავალია. ამავე დროს, გასარკვევია, შეძლებს თუ არა Bitmain თავისი სისტემების მასიურ წარმოებას ელექტრონული კომპონენტების გლობალური დეფიციტის ფონზე. NVIDIA-მ მომხმარებლების თხოვნის საფუძველზე მარტში გამოუშვა სპეციალიზებული ამაჩქარებლები Cryptocurrency Mining Processor (CMP), რომლებიც Ethereum-ის მოპოვებაზეა ორიენტირებული. მაგალითად, Palit-ის წარმოების NVIDIA CMP 30HX იყიდება 724 აშშ დოლარად და მისი მაჩვენებლებია 26 მჰეშ/წმ და 125 ვატი ენერგომოხმარება. CMP-ს არ აქვს ვიდეოგამშვებები და ამიტომ მხოლოდ მათემატიკური თანაპროცესორის როლს ასრულებს. ცოტა ხნის წინ NVIDIA-მ განაახლა CMP-ის გაყიდვების პროგნოზი პირველი კვარტლისთვის, რამაც მოლოდინს გადააჭარბა - ის გაიზარდა სამჯერ 150 მლნ აშშ დოლარამდე. https://bit.ly/3nmzNfx

კრიპტოვალუტების მოპოვებისას NVIDIA Ampere ვიდეო დაფების შესანიშნავი წარმადობა და ეფექტურობა მათ მაინერების ძირითად სამიზნედ აქცევს. ვიდეო დაფები, რომლებმაც მაინც მოახერხეს მაღაზიების თაროებზე და არა მაინინგ-ფერმებში მოხვედრა, დაბალი ფასით არ გამოირჩევა - მათი ღირებულება სარეკომენდაციო ფასზე მნიშვნელოვნად მაღალია. ზოგი ყიდულობს ვიდეო დაფებს რამდენჯერმე გაზრდილი ფასით, ბევრი კი ფიქრობს, რომ როდესაც Ethereum-ის კონსენსუსის ალგორითმი Proof-of-Work-იდან Proof-of-Stake-ზე შეიცვლება, ვიდეო დაფები მეორად ბაზარზე გამოჩნდება დაბალ ფასად. დიდი ალბათობით ეს არ მოხდება, მაინერები სხვა კრიპტოვალუტაზე გადაერთვებიან. ხოლო თუ მეორად ბაზარზე დაფები მაინც მოხვდება, ჩნდება სამართლიანი კითხვა: რა მდგომარეობაში იქნება ისინი. ამ კითხვაზე პასუხის მიღება შესაძლებელია, თუ ვნახავთ დამწვარი GeForce RTX 3080 დაფის რამდენიმე ფოტოს. საიდუმლოს არ წარმოადგენს, რომ ახალი GeForce RTX 30 სერია საკმაოდ ცხელი გამოვიდა, განსაკუთრებით კი ფლაგმანები GDDR6X მეხსიერებით. უნდა ითქვას, რომ ფლაგმანური მოდელებიც ყოველთვის არ ხასიათდება მაღალი ხარისხის თერმობალიშებით, რაც არაერთხელ დადასტურდა მფლობელების მიერ. მაინინგის დროს ვიდეო ბარათები ცხელდება მაქსიმალურ ლიმიტამდე და ეს იწვევს სამწუხარო შედეგებს. სავარაუდოდ, ამ შემთხვევაში აალება მოხდა ვიდეომეხსიერების პერიფერიაზე. https://bit.ly/3tRq43f

DDR5 მეხსიერების სერიული წარმოება საბოლოოდ იკრებს ძალას. DDR5 სტანდარტი გამოყენებული იქნება მომავალ Intel (Alder Lake) და AMD (Raphael) პლატფორმებში, რომელთა გამოშვება სავარაუდოდ მიმდინარე წლის ბოლოს მოხდება. ჩინურმა კომპანია Jiahe Jinwei-მა განაცხადა, რომ მიიღო DDR5 მეხსიერების პირველი მოდულები თავისი საწარმოო ხაზიდან. ამჟამად მეხსიერების მოდულები სერიულად იწარმოება და მოსალოდნელია, რომ ისინი გაყიდვაში მიმდინარე წლის ბოლოს გამოვა Intel-ისა და AMD-ს სამომავლო პლატფორმებთან ერთად. არსებობს ინფორმაცია, რომ Intel აპირებს საკუთარ თავზე აიღოს მომავალი თაობის მეხსიერების გამავრცელებლის მთავარი როლი თავის პლატფორმა Alder Lake-ში, რომელიც Z690 ჩიპსეტზე დაფუძნებული დედა დაფისგან შედგება. მოცემულ DDR5 მოდულებს თუ შევხედავთ, შესამჩნევია, რომ ისინი წარმოდგენილია ორი მოდელით. ერთი - მწვანე ფერის PCB-ით, რომელიც მოწოდებულია უშუალოდ ჩინური მწარმოებლისგან, მეორეს კი შავი PCB აქვს. ორივე მოდელის ყველაზე თვალსაჩინო მახასიათებელია ინტეგრირებული PMIC (კვების მართვის მოდული). იგი მუდმივ ძაბვას (5 ვოლტი) მიიღებს უშუალოდ დედა დაფისგან და გადასცემს DRAM-ს უფრო ეფექტურად DDR4 მოდულებთან შედარებით. კვების კომპონენტების DIMM მოდულში გადატანა ამცირებს ცვეთასა და ხმაურს, ამავდროულად ოვერქლოქინგის უფრო მეტ შესაძლებლობას იძლევა. DDR5 მეხსიერების მოდულების ამ კონკრეტულ პარტიას აქვს 4800 მჰც სიხშირე და 1.1 ვოლტი ძაბვა. ტაიმინგების მაჩვენებლებია CL40-40-40, თითოეული DIMM მოდულის მოცულობაა 16 გბ, თუმცა იწარმოება ორმხრივი მოდულებიც 32 გბ მოცულობით. DDR5 მოდულს აგრეთვე აქვს ჩაშენებული ECC, ხასიათდება უფრო დაბალი ენერგომოხმარებითა და გაცილებით მაღალი სტაბილურობით DDR4 მოდულებთან შედარებით. სამომავლოდ გამოვა კიდევ უფრო სწრაფი მეხსიერების მოდულებიც, ზოგიერი მწარმოებლის მიერ გამოცხადებული სიჩქარე 10 ათას მჰც-ს აღემატება. როგორც ტესტირებებიდან ჩანს, მოსალოდნელია, რომ DDR5 მოდულში წარმადობა ორ ჯერზე მეტად გაიზრდება DDR4-თან შედარებით. ყველაზე სწრაფი თანამედროვე DDR4 მოდულები 7 გჰც-ზე ოდნავ მაღალ სიჩქარეს აღწევენ აჩქარებისას, ამიტომ 10 გჰც არ უნდა წარმოადგენდეს დიდ პრობლემას მომდევნო თაობის მეხსიერების მოდულებისთვის. https://bit.ly/3xrfzG3

კრიპტო ბირჟა Coinbase Pro-მ გახსნა დეპოზიტები Stablecoin USDT-ისთვის Tether-იდან. აქტივის ლისტინგი მოხდება 26 აპრილს. პირველ ეტაპზე პლატფორმა მხარს დაუჭერს ERC-20 სტანდარტს Ethereum-ის ბლოკჩეინზე იურისდიქციებში, სადაც წარმოდგენილია Coinbase, ნიუ-იორკის შტატის გამოკლებით. ბირჟა დაიწყებს USDT-ით ვაჭრობას წყვილებში Bitcoin-თან, Ethereum-თან, Stablecoin USD Coin-თან, ევროსთან, აშშ დოლარსა და ბრიტანულ ფუნტთან ლიკვიდურობის მოთხოვნების დაცვით. ”USDT ჯერ არ არის ხელმისაწვდომი Coinbase.com-ზე ან ჩვენს მობილურ აპლიკაციებში. თუ მხარდაჭერა დაემატება, ჩვენ გავაკეთებთ ცალკე განცხადებას, ”- აღნიშნეს პლატფორმის წარმომადგენლებმა. მანამდე კრიპტობირჟა Bitfinex-მა და Tether-მა შეთანხმება დადეს ნიუ-იორკის გენერალურ პროკურატურასთან 850 მლნ აშშ დოლართან დაკავშირებული ფინანსური ოპერაციების საკითზე. კომპანიებმა არ აღიარეს დარღვევის ფაქტი, თუმცა დათანხმდნენ შტატისთვის 18.5 მლნ აშშ დოლარის გადახდას. https://bit.ly/3vhgQh2

რესურს HKEPC-მა ტაივანური მწარმოებლის ცნობებზე დაყრდნობით განაცხადა, რომ ვიდეო დაფა GeForce RTX 3080 Ti ოფიციალურად გამოვა 26 მაისს, პირველი მიმოხილვა კი - ერთი დღით ადრე. უნდა აღინიშნოს, რომ NVIDIA GeForce RTX 3080 Ti დაფის გამოშვებას ბევრად ადრე აპირებდა და თანაც უფრო მაღალი წარმადობის კონფიგურაციით, თუმცა თარიღი შეიცვალა GDDR6X მეხსიერების ჩიპების დეფიციტის გამო, კონფიგურაცია კი ოდნავ გაუარესდა AMD-ის მხრიდან სუსტი კონკურენციის გამო. შეფერხება ასევე დაკავშირებულია მაინინგის შეზღუდვის მიზნით ცვლილებების შეტანის აუცილებლობასთან. გარდა ამისა, მწარმოებელმა დაადასტურა, რომ GeForce RTX 3070 Ti ივნისის დასაწყისში იქნება წარმოდგენილი. მისი PCB ნომერია PG141 SKU 10. GA104-400 გრაფიკულ პროცესორში გამოყენებულია 6144 CUDA ბირთვი ისევე, როგორც მობილურ ვიდეო დაფა RTX 3080-ში. ვიდეომეხსიერების მოცულობა არ შეცვლილა და კვლავ 8 გიგაბაიტს შეადგენს, თუმცა GDDR6 მეხსიერების სტანდარტის ნაცვლად RTX 3070 Ti მოდელში გამოყენებული იქნება უფრო მაღალი წარმადობის GDDR6X. მოსალოდნელია, რომ GeForce RTX 3080 Ti ვიდეო დაფის სავარაუდო სარეკომენდაციო ფასი დაახლოებით 999 აშშ დოლარი იქნება, RTX 3070 Ti დაფის ფასი ჯერჯერობით არ ხმაურდება. ადრე RTX 3080 Ti სატვირთო შეფუთვების ფოტოები განთავსდა ინტერნეტში და უკვე იგზავნება მსოფლიოს სადისტრიბუციო ტერმინალებში. https://bit.ly/2QwD2ES

Xiaomi-მ პრეს-კონფერენცია გამართა ახალი ინტელექტუალური საკუთრების, სტანდარტებისა და ტექნოლოგიური ინოვაციების შესახებ, რომელზეც მოიწვია მრავალი ექსპერტი სხვადასხვა ინდუსტრიიდან. პრეს-კონფერენციაზე კომპანიამ განაცხადა, რომ მას მრავალი მიღწევა აქვს ინტელექტუალური საკუთრების უფლებების სფეროში. Xiaomi-ს მონაცემებით, გასული წლის ბოლოსთვის კომპანიას მსოფლიოში 19 ათასი პატენტი ჰქონდა. კომპანიამ ასევე განაცხადა, რომ ამ პატენტების თითქმის ნახევარი მიღებულია ჩინეთის ფარგლებს გარედან. რაც შეეხება სავაჭრო ნიშნებს, გასული წლის ბოლოსთვის Xiaomi-მ განაცხადი შეიტანა 27000-ზე მეტ სავაჭრო ნიშანზე მთელ მსოფლიოში. სავაჭრო ნიშნის რეგისტრაციის განაცხადები მოიცავს 160-ზე მეტ ქვეყანას მსოფლიოს მასშტაბით. რაც შეეხება ახალ ტექნოლოგიებში ინოვაციებს, Xiaomi ლიდერია 100-ზე მეტი სტანდარტით ჩინეთში. ამას გარდა, Xiaomi-მ განაცხადა, რომ კომპანია მსოფლიოში 5G სფეროში მიღწევებით საუკეთესო 15-ეულის ჩამონათვალში შევიდა. კომპანიამ განაცხადა, რომ ის გააგრძელებს ტექნოლოგიებზე ორიენტირებას, წინსვლას და ინოვაციების გამოყენებას. https://bit.ly/2QkMRpH

შტატ ტენესის ქალაქ ჯექსონის ადმინისტრაცია შეისწავლის პირველი კრიპტოვალუტის პოტენციალს ფინანსურ სისტემაში მისი ინტეგრაციისთვის. ამის შესახებ განაცხადა ქალაქის მერმა Scott Conger-მა. მისი თქმით, ხელისუფლება განიხილავს საჯარო მოხელეების ციფრული ოქროთი ხელფასების გადახდის შესაძლებლობას. „ასევე აღსანიშნავია, რომ ჩვენ სერიოზულად ვსწავლობთ Bitcoin-ის მაინინგს ჩვენს ბალანსზე დამატებისთვის“ - აღნიშნა მერმა. მანამდე მაიამის მერმა ფრენსის სუარესმა ისაუბრა იმ გეგმების შესახებ, რომლელთა მიხედვითაც საჯარო მოხელეები ანაზღაურებას მიიღებენ პირველ კრიპტოვალუტაში. მან ასევე არ გამორიცხა ქალაქის ბიუჯეტის 1%-ის Bitcoin-ზე გადატანა. მოგვიანებით ქალაქის ხელისუფლებამ ხმა მისცა ციფრული ოქროს მუნიციპალურ ინფრასტრუქტურაში ინტეგრირების ვარიანტებს. მიმდინარე თვეში ცნობილი გახდა, რომ NBA-ს საკალათბურთო კლუბი Sacramento Kings გეგმავს გუნდის და დამხმარე პერსონალის მიერ Bitcoin-ში ხელფასების მიღების შესაძლებლობის რეალიზებას. https://bit.ly/3sOEtvJ

Sony-ს აღმასრულებელმა დირექტორმა ჯიმ რაიანმა განაცხადა, რომ კომპანია დაკავდება ახალი სტუდიების შეძენით, რათა გაზარდოს ხარისხიანი AAA title-ების რაოდენობა PlayStation 5-ისთვის, რომელთა რიცხვი, მისი თქმით, გასული თაობის კონსოლებთან შედარებით მეტი უნდა იყოს. იმის გათვალისწინებით, რომ Microsoft-მა ხელი მოკიდა Xbox-ის განვითარების საკითხს და თავად დაიწყო დიდი სტუდიების შესყიდვა, Sony-ს შესაძლოა პრობლემები შეექმნას ამგვარ გიგანტთან კონკურენციის კუთხით. რამდენიმე დღის წინ Sony-მ გამოუშვა ვიდეო, სადაც კონკრეტულად იყო გადმოცემული PlayStation 5-ის უპირატესობები სხვა კონსოლებთან შედარებით. კომპანია თავის მთავარ უპირატესობად მიიჩნევს რეითრეისინგის, 120FPS-ისა და 4K გეიმინგის მხარდაჭერას. უნდა აღინიშნოს, რომ მომხმარებლები უპირატესობას ანიჭებენ სწორედ Xbox-ს მისი ხელმისაწვდომობისა და Game Pass გამოწერის განვითარების გამო. PlayStation 5 კონსოლების დეფიციტი ჯიმ რაიანმა მიაწერა პანდემიის პირობებს და აღნიშნა, რომ პრობლემა მიმდინარე წლის ბოლომდე მოგვარდება. https://bit.ly/3dJHf10

ილონ მასკი მარსზე ოცნებობს. ჯერჯერობით გაუგებარია, ასე რა იზიდავს მისკენ, რადგან პლანეტა მთლიანად მოკლებულია ატმოსფეროს, წყლის ძიება კი ღრმად გრუნტის ქვეშ არის საჭირო. ისიც კი არ არის დადასტურებული, საერთოდ არის თუ არა სიღრმეში წყალი, ასე რომ სხვა პლანეტებზე სითხის მოპოვება უფრო ექსპერიმენტალურად გამოიყურება, ვიდრე რეალურად. თეორიულად, პოლუსებზე შესაძლოა იყოს დიდი რაოდენობით წყლის მარაგი, თუმცა ამ შემთხვევაშიც არ არის ვითარება მარტივი: საჭირო იქნება წითელ პლანეტაზე რთული აღჭურვილობის გაგზავნა, რომელსაც შეეძლება ნიადაგიდან გამოყოს წყალი, რომელიც მას მილიარდობით წლის წინ შეერია. როგორც ჩანს, ილონ მასკმა უკვე მოიფიქრა როგორ უნდა გადაჭრას ყველა ეს და მრავალი სხვა პრობლემა, მათ შორის ელექტროენერგიის გამომუშავება და საკვების მოყვანა. ბოლო ინტერვიუში მან მართლაც ფანტასტიკური ინფორმაცია მოგვაწოდა. პირველი, რაც უნდა ვიცოდეთ: მარსი გახდება ადამიანების ახალი სახლი, სადაც აშენდება სრულფასოვანი ბაზები. SpaceX უზრუნველყოფს მოსახლეების ჩაყვანას, დღეში გაუშვებს სამ რაკეტას, რომელთაგან თითოეულს შეეძლება 100 ტონამდე ტვირთის წაღება. მასკმა აღნიშნა, რომ 26 თვეში ერთხელ მარსი დედამიწასთან ყველაზე ახლო მანძილზე იმყოფება და სწორედ ამ დროს განხორციელდება ფრენების მაქსიმალური რაოდენობა. მოსალოდნელია, რომ ორი წლის განმავლობაში მოხერხდება 100 ათასი ადამიანის გაშვება 1000 ერთეული რაკეტით. მასკმა განაცხადა, რომ პირველი გეგმაა აიგოს ბაზა 1 მილიონი ადამიანისთვის, ამის შემდეგ კი გარანტირებული იქნება კოლონიის სტაბილური განვითარება. საინტერესოა, რომ სწორედ 1 მილიონს უწოდებს იგი „ოქროს რიცხვს“ იმისთვის, რომ კოლონიამ შეძლოს დედამიწისგან დამოუკიდებლად არსებობა. ფაქტია, რომ რესურსების წარმოშობასთან დაკავშირებული კითხვები არსად გამქრალა, რადგანაც ამ რაოდენობის ადამიანისთვის საჭირო იქნება საკვებით, წყლით უზრუნველყოფა, გათბობა და დაბინავება. ჯერჯერობით მასკი ამ საკითხების იგნორირებას არჩევს, თუმცა ოდნავ მაინც შეეხო პირველი კოლონისტების ბედს. მისი თქმით, დიდი ალბათობით ისინი დაიღუპებიან. იგი ასევე დარწმუნებულია, რომ კოლონისტები უკეთესი მომავლის ძიებას არჩევენ, კაცობრიობის მდიდარი წარმომადგენლები კი მარსზე თავდაპირველად გამგზავრებას არ მოისურვებენ. მასკმა მარსის ათვისება შეადარა ანტარქტიდაზე პირველ ექსპედიციას და აღნიშნა, რომ ადამიანების ტექნოლოგიური განვითარების დონემ მათ გადარჩენის შანსი უნდა მისცეს. საინტერესოა, თავადაც დააპირებს მარსზე გაფრენას თუ პროცესებს დედამიწიდან დააკვირდება? შეგახსენებთ, ადრე ილონ მასკმა განაცხადა, რომ მარსისკენ პირველ ფრენებს 2030 წლიდან აპირებს. უცნობია, უკვე მიმდინარეობს გამოცდები ამ მიმართულებით, თუ პროცესი კიდევ ათწლეულები გაიწელება. https://bit.ly/2RV20hz