Microsoft, Alphabet, Amazon და Meta მილიარდობით ინვესტიციებს დებენ ხელოვნურ ინტელექტში და აიგნორებენ ინვესტორების სკეპტიციზმს

[Magdalena]

უმსხვილესმა ტექნოლოგიურმა კომპანიებმა საგრძნობლად გაზარდეს კაპიტალური დანახარჯები მიმდინარე წელს, რამაც ჯამში შეადგინა 100 მლრდ აშშ დოლარზე მეტი - წინა წელთან შედარებით 50%-ით მეტი. გადაწყვეტილება მომდინარეობს ხელოვნური ინტელექტის განვითარების მიზნით ინფრასტრუქტურის შექმნის აუცილებლობიდან, მიუხედავად უოლ სტრიტის ინვესტორების მზარდი სკეპტიციზმისა მსგავსი ინვესტიციების ანაზღაურებასთან დაკავშირებით. 

 

Financial Times-ის ანგარიშის მიხედვით კომპანიებმა, როგორებიცაა Microsoft, Alphabet, Amazon და Meta, 2024 წლის პირველ ექვს თვეში ჯამში 106 მლრდ აშშ დოლარი დახარჯეს. ამ კომპანიების ლიდერები, საფონდო ბაზრის შეშფოთების მიუხედავად შემდეგი 18 თვის განმავლობაში გეგმავენ ინვესტიციების შემდგომ ზრდას.  

Meta-ს ხელმძღვანელმა მარკ ცუკერბერგმა განაცხადა: „ამ ეტაპზე მირჩევნია გავრისკო და დავამატო სიმძლავრე, რამდენიც საჭირო იქნება, რათა შემდეგ გვიანი არ იყოს“. იგი პროგნოზირებს, რომ Facebook-ის კაპიტალურმა ხარჯებმა წელს შეიძლება 40 მლრდ აშშ დოლარს მიაღწიოს. 

Dell'Oro Group-ის ანალიტიკოსები ვარაუდობენ, რომ 1 ტრლნ აშშ დოლარის ინვესტიცია შეიძლება განხორციელდეს ხელოვნური ინტელექტის ინფრასტრუქტურაში ხუთი წლის განმავლობაში. თუმცა, ინვესტორები ჯერ კიდევ არ არიან დარწმუნებული ამ ინვესტიციების უკუანაზღაურებაში და არ არიან მზად დახარჯონ მნიშვნელოვანი თანხები ხელოვნურ ინტელექტთან დაკავშირებულ პროდუქტებსა და სერვისებზე. 

ამერიკული საინვესტიციო კომპანია AllianceBernstein-ის ხელმძღვანელმა ჯიმ ტიერნიმ განაცხადა: „ინვესტორები კვლავ დაბნეულნი არიან ხელოვნური ინტელექტის ბიზნეს მოდელებისა და შემოსავლების შესახებ. ეს ქმნის მუდმივ გარემოს „გვენდეთ ჩვენ“, რომელიც დიდად დამამშვიდებელი არ არის ჯამური დანახარჯების გათვალისწინებით. ” 

წამყვანი ტექნოლოგიური კომპანიების (Big Tech) შემოსავლების შესახებ სიახლეები დაემთხვა უოლ სტრიტზე ოპტიმიზმის ზოგად ვარდნას. Nasdaq-მა კორექტირებები შეიტანა შეერთებულ შტატებში დასაქმების სუსტი მაჩვენებლების ფონზე. ნახევრაგამტარი კომპონენტების მწარმოებლების აქციების ღირებულება, მათ შორის AI-ჩიპების ლიდერ Nvidia-სი, განსაკუთრებით არასტაბილური იყო ბოლო კვირაში, რადგან ინვესტორები უფრო მგრძნობიარენი გახდნენ ხარჯვის გეგმების განაცხადების მიმართ. Intel-მა დაკარგა საბაზრო ღირებულების მეოთხედზე მეტი (26%) მას შემდეგ, რაც გამოაცხადა პერსონალის მასშტაბური შემცირება. 

https://tinyurl.com/2ujs9uzw