Magdalena

კოსმოსი ბაქტერიების გარეშე არსებული სტერილური ზონაა, მაგრამ კოსმოსური სადგურის შიგნით მიკრობები მაინც არსებობს. მკვლევარების ძალისხმევის მიუხედავად ასტრონავტებთან ერთად სადგურზე მაინც ხვდება ვირუსები და ბაქტერიები, რომლებიც კოსმოსურ პირობებში განსაკუთრებით საშიშია დაქვეითებული იმუნიტეტის მქონე ასტრონავტებისთვის. იმის გათვალისწინებით, რომ დახურულ სივრცეში მოხვდება გამძლე და ანტიბიოტიკებისადმი მდგრადი ბაქტერია - საფრთხე ორმაგდება. საბედნიეროდ, ახალი ანტიბაქტერიული საფარი, რომელიც რამოდენიმე თვეა გამოიყენება კოსმოსურ სადგურზე, მეტად ეფექტური საშუალება აღმოჩნდა მიკრობების განადგურებისთვის. დამცავ საფარს ეწოდება AGXX და იგი ვერცხლისა და რუთენიუმისგან (რუთენიუმი — დიმიტრი მენდელეევის პერიოდული სისტემის მეხუთე პერიოდის მერვე ჯგუფის თანაური ქვეჯგუფის ქიმიური ელემენტი, ატომური ნომერია 44. აღინიშნება სიმბოლოთი Ru (ლათ. Ruthenium). მარტივი ნივთიერება რუთენიუმი (CAS-ნომერი: 7440-18-8) — გარდამავალი მოვერცხლისფრო ფერის ლითონი. მიეკუთვნება პლატინის ჯგუფის ლითონებს). ეს კომპონენტები აქტიურად მონაწილეობენ ბაქტერიებისა და საფუარა სოკოების განადგურებაში - ეფექტურობა დამტკიცებულია ხანგრძლივი ექსპერიმენტის შედეგად. მკვლევარებმა შეამჩნიეს, რომ AGXX საფარში შემავალი ნივთიერებების გავლენით ბაქტერიების რაოდენობა მუდმივად მცირდებოდა. უდიდესი სხვაობა დაფიქსირდა საფარის დაყენებიდან 6, 12 და 19 თვის შემდეგ. სამწუხაროდ, საფარის ეფექტურობა დროთა განმავლობაში მცირდება, რადგან იგი სხვადასხვა ნარჩენითა და მტვრით იფარება. ზედაპირის სისუფთავის შეფასებამ აჩვენა, რომ ამ დროისთვის სადგურზე არანაირი საშიში მიკრობი აღარ არსებობს და ეს შედეგი იმედისმომცემია. თუმცა მეცნიერები თვლიან, რომ ეს მასალა გამოუსადეგარი იქნება მარსისკენ ფრენისას - მათ მოუწევთ გამოიგონონ უფრო მძლავრი მეთოდები ბაქტერიებთან საბრძოლველად, სულ მცირე - მოუწევთ იმუშავონ დამცავის ხანგრძლივად მოქმედ ვადაზე. ანტიბიოტიკებისადმი მდგრადი ბაქტერიები საერთაშორისო კოსმოსურ სადგურზე 2018 წლის ბოლოს აღმოაჩინეს. ესენი იყო ჩხირისებრი ენტერობაქტერიები (Enterobacter). https://hi-news.ru/space/novoe-pokrytie-zashhitilo-mks-ot-superbakterij.html

კომპანია Microsoft-ის დამფუძნებელი, მილიარდერი და ფილანთროპი ბილ გეითსი ხელოვნურ ინტელექტს მეტად საკამათო ტექნოლოგიად მიიჩნევს, რომელსაც, მისი აზრით, შეუძლია კაცობრიობისთვის მოიტანოს როგორც სარგებელი, ასევე ზიანი. სტენფორდის უნივერსიტეტში გამართულ კონფერენციაზე გეითსმა ხელოვნური ინტელექტი ბირთვულ იარაღს შეადარა. მისი აზრით, ადამიანებმა ხელოვნური ინტელექტი უნდა განავითარონ უფრო მშვიდობიან სფეროებში, მაგალითად განათლებასა და მედიცინაში. წინააღმდეგ შემთხვევაში შესაძლოა კაცობიობა უბედურების წინაშე აღმოჩნდეს. „მსოფლიოში ჯერ არასდროს არსებულა ამდენი ისეთი ტექნოლოგია, რომლებიც ერთდროულად მრავლისმომცემიცაა და მეტად საშიშიც“ - განაცხადა გეითსმა და მოიხსენია ატომური ენერგია, როგორც ერთ-ერთი სასარგებლო ტექნოლოგია, რომელიც აღმოჩენისთანავე უარყოფითი გახდა მის საფუძველზე ბირთვული იარაღის შექმნით. ამავე დროს, მან განაცხადა, რომ იმ სფეროებში, სადაც ხელოვნურ ინტელექტს კაცობიობისთვის ღირებული სარგებლის მოტანა შეუძლია, რეალური შედეგები ჯერჯერობით ძალიან მწირია. მისი აზრით, მედიცინა და განათლება - ეს ის სფეროებია, სადაც ხელოვნური ინტელექტი დიდ დახმარებას გაუწევდა კაცობრიობას. „ეს არის შანსი - სოციალური მეცნიერებები ახალ დონემდე ამაღლდეს და ყველაფერი უნდა დაიწყოს ყველაზე უმთავრესით - განათლებით“ - აღნიშნა გეითსმა, რომელიც უკვე მრავალი წელია მღელვარებას გამოხატავს იმ რისკებთან დაკავშირებით, რაც პოტენციურად გააჩნია ხელოვნურ ინტელექტს. ხელოვნური ინტელექტის განვითარების ტემპის დაჩქარებამ, ნეირონული ქსელების მხარდამჭერმა ტექნოლოგიამ, ადამიანის ტვინის იმიტაციამ უკვე მოახდინა გადატრიალება ტექნოლოგიის სფეროში. ამჟამად ხელოვნური ინტელექტი და ნეირონული ქსელი ბევრგან გამოიყენება: დაწყებული ადამიანთა იდენტიფიკაციის ბიომეტრიული სისტემიდან - დამთავრებული ელექტრონულ ფოსტაში ანტი-სპამ ფილტრებით. თუმცა გეითს არ სურს, რომ ხელოვნური ინტელექტისგან მიღებული უპირატესობით სარგებლობდნენ მხოლოდ ისეთი ტექნოლოგიური გიგანტები, როგორებიცაა Amazon, Google და Facebook. გეითსმა ტექნოლოგიის გამოყენების ერთ-ერთ დადებით მაგალითად დაასახელა ამერიკული კერძო ბიოტექნოლოგიური კომპანია 23andMe-ს შემთხვევა. იგი დაკავებულია გენეტიკური მონაცემების ანალიზით. გეითსის თქმით,ხელოვნური ინტელექტის გამოყენებამ კომპანიას საშუალება მისცა განესაზღვა კავშირი მიკროელემენტ სელენის უკმარისობის კავშირი აფრიკელი ქალების ნაადრევ მშობიარობასთან. უახლოესი 18 თვის განმავლობაში მკვლევარები გაარკვევენ, საჭირო თერაპიული პროგრამა როგორ გაამართლებს პროგნოზებს 20 ათასი აფრიკელი ქალის შემთხვევაში. „მოსალოდნელია, რომ მიღებული ზომების წყალობით 15%-მდე შემცირდება ნაადრევი მშობიარობის მაჩვენებლის დონე, რაც ჯამში მოგვცემს დაახლოებით 80 ათასი სიცოცხლის გადარჩენის საშუალებას და ეს მხოლოდ აფრიკის მაჩვენებელია“ - დაამატა გეითსმა. რაც შეეხება განათლებას, გეითსი იმედოვნებს, რომ ხელოვნური ინეტელექტის მეშვეობით შეიქმნება უფრო ეფექტური მეთოდები სწავლებისთვის. „სამწუხაროდ, ჯერჯერობით ჩვენ პრაქტიკულად ვაიგნორებთ განათლების სამოტივაციო ასპექტებს. არ ვცდილობთ შევიმუშავოთ პროგრამები, რომლებიც მიმართული იქნება სტუდენტების ინტერესის ამაღლებისა და სწავლით გატაცებისკენ. არადა ამგვარი რამ დაგვეხმარებოდა განათლების სისტემის გაუმჯობესებაში და შეამცირებდა სწავლის მიტოვების მსურველთა რიცხვს“ - აცხადებს გეითსი. მან ასევე აღნიშნა, რომ ამჟამად არსებული, ხელოვნურ ინტელექტზე დაფუძნებული სისტემების მოქმედება საკმაოდ გაურკვეველია - „მეტად მაწუხებს არსებული პროექტების უმეტესობის გაუმჭვირვალობა, რომლებიც მიმართულია ღრმა მანქანური სწავლების სისტემების განვითარებისაკენ“. https://hi-news.ru/technology/bill-gejts-sravnil-iskusstvennyj-intellekt-s-yadernym-oruzhiem.html

The Tie-ს ანალიტიკოსების აზრით, კრიპტოსავალუტო ბირჟების ბრუნვის თითქმის 90% შესაძლოა არასაიმედო იყოს. 97 ბირჟაზე მონაცემების შეგროვებისას მკვლევარებმა აღმოაჩინეს, რომ მომხმარებლების მიერ მოზიდული თანხების მოცულობა რეალურად უბრალოდ არ არსებობს. აღმოჩენა ეხება როგორც ნაკლებად ცნობილ ბირჟებს, ასევე ისეთ მსხვილ და სახელგანთქმულ კომპანიებს, როგორებიცაა Binance და Kraken. “საერთო ჯამში გამოვითვალეთ: ჩვენი შეფასებით ბირჟების 87 % იტყობინება, რომ სავაჭრო ბრუნვა პოტენციურად საეჭვო ჩანს და ბირჟების 75% მათზე რაიმე სახის საეჭვო აქტივობას ახორციელებს“ - წერს The Tie. ორგანიზაციამ ასევე დაამატა: „თითოეულ ბირჟას რომ ჰქონოდა ისეთი საშუალო ვიზიტი/სავაჭრო მოცულობის მაჩვენებელი, როგორც აქვთ CoinbasePro-ს, Gemini-ს, Poloniex-ს, Binance-სა და Kraken-ს, 100 მსხვილი ბირჟის ვაჭრობის მთლიანი მოცულობა დღეში 2,1 მლრდ იქნებოდა. ამჟამად კი ეს მაჩვენებელი 15,9 მლრდ აშშ დოლარს შეადგენს“. კრიპტო ბირჟები ხშირად ხვდება ბრუნვის მოცულობის შესახებ არასწორი მოხსენების გამო ბრალდებების ქვეშ: ანალოგიური შეტყობინება გამოქვეყნდა 2018 წლის მარტშიც, სადაც მოცემული იყო ხსენებული ბირჟებისადმი გაფრთხილება მსგავსი პრობლემის შესახებ. Binance-ის გენერალურმა დირექტორმა Changpeng Zhao-მ განაცხადა, რომ რესურსების დათვლისას დაბნეულობა CoinMarketCap-მა შეიტანა. „რატომ ახდენენ ბირჟები ბრუნვის მოცულობის გაყალბებას?“ - The Tie-ს ამ კითხვას Zhao-მ ამგავრად გასცა პასუხი: „CoinMarketCap-ი ყველაზე ხშირად მონახულებადი საიტია ჩვენს სფეროში და იგი ყველაზე დიდი რეფერალია ყველა ბირჟისთვის. CMC-ის მაღალი რეიტინგი უპირატესობას იძლევა მოიზიდოს ახალი მომხმარებლები, თუმცა პროფესიონალი მომხმარებლებისთვის სანდოობის შემცირების ხარჯზე“. Zhao-ს იგივე აქვს ნათქვამი CoinMarketCap-ის შესახებ გასული წლის დეკემბერში, როდესაც ფოკუსირება მოახდინა 25 საუკეთესო Bitcoin (BTC) trading pair-ზე. ამასთან, გასულ თვეში Cointelegraph-ისგან ცნობილი გახდა, რომ კრიპტო გაცვლების საერთო მოცულობა დაეცა 2017 წლის მაისის მინიმუმამდე. https://cointelegraph.com/news/new-report-warns-87-percent-of-cryptocurrency-exchange-volume-is-potentially-suspicious

ვის შეუძლია გადაადგილდეს 5,5 კმ/სთ სიჩქარით და აწიოს 90 კგ ტვირთი, ამასთანავე იმუშავოს მთელი დღე გაუჩერებლად? პოტენციურად ეს უკვე ნებისმიერ იმ ადამიანს შეუძლია, ვინც სპეციალურ ეგზოჩონჩხს „ჩაიცვამს“. სწორედ ამიტომ ამერიკულმა სამხედრო ძალებმა კომპანია Sarcos-ს შეუკვეთეს სრულზომიანი ეგზოჩონჩხები - Guardian XO: მათი დახმარებით 90 კგ ტვირთის აწევისას ადამიანს ექნება შეგრძნება, თითქოს 4,5 კგ უჭირავს! რაღა თქმა უნდა, ეს არ ჰგავს „რკინის კაცის“ კოსტიუმს. მიუხედავად იმისა, რომ ეგზოჩონჩხების წარმოებაში რეალური პროგრესი შეინიშნება ბოლო ათწლეულის მანძილზე, ისინი ჯერ კიდევ საკმაოდ მძიმე, ზომაში დიდი და მოუქნელია, ამავე დროს მცირე ავტონომიური სამუშაო დრო აქვთ. თუმცა, ასეა თუ ისე, შესაძლებლობა, რომ აწიოს 90 კგ ტვირთი და რამოდენიმე საათი ტრავმებისა და შეფერხების გარეშე დაუმუხტავად იმუშაოს, დიდი მიგნებაა სამხედრო პირებისთვის, რომელთაც უწევთ ხელით გადაიტანონ რაკეტები, საწვავის მძიმე მილები და დაშლილი ძრავის ან ტრანსპორტის ნაწილები. სწორედ ამიტომ სურთ ამერიკელ სამხედროებს Guardian XO-ს გამოყენება - ძირითადად მასალების ჩატვირთვა-გადმოტვირთვისთვის. ეგზოჩონჩხით შესაძლებელია 5,5-5,6 კმ/სთ სიჩქარით მოძრაობა, აგრეთვე შესაძლებელია მას გამოეცვალოს ბატარეა, რომელიც 8 საათიან მუშაობას უზრუნველყოფს. თუკი Sarcos-ის ეგზოჩონჩხი გამოცდას წარმატებით გაივლის, ის მაინც არ იქნება პირველი მოწყობილობა, რომელიც სამხედრო ეკიპირებისთვის გამოდგება. ჯერჯერობით მხოლოდ შესაძლებელია მას ანდონ მძიმე ტვირთის გადაზიდვა. თუმცა მოდელით უკვე დაინტერესდნენ BMW, Caterpillar და რამოდენიმე სამშენებლო კომპანია. მოწყობილობის კიდევ ერთი დადებითი თვისება ის გახლავთ, რომ მას შეუძლია შეაგროვოს სხვადასხვა ბიომეტრიული მონაცემები მომხმარებელზე: წნევა, პულსი, სხეულის ტემპერატურა და ა.შ, რათა მომხმარებელი გადატვირთვისგან დაიცვას. ამას გარდა, მოწყობილობაში ინტეგრირებული კომპიუტერი გააანალიზებს საქმიანობის ხასიათს, რათა მაქსიმალურად ეფექტურად გაუწიოს მხარდაჭერა სამუშაოს შესასრულებლად. სადემონსტრაციო ვიდეო: https://www.youtube.com/watch?v=g9rInLPw8YE https://hi-news.ru/robots/novyj-ekzoskelet-pomozhet-cheloveku-podnyat-gruz-vesom-90-kilogrammov.html

იაპონიის აეროკოსმოსური კვლევების სააგენტომ (JAXA) განაცხადა სამომავლო გეგმების შესახებ, რომელიც კოსმოსური აპარატის, Hayabusa-2-ის მისიას ეხება. ხსენებულმა აპარატმა გასულ თვეში მიაღწია ასტეროიდ რიუგუს და აიღო მისი გრუნტის ნიმუშები. როგორც ცნობილი გახდა, მომდევნო თვეში JAXA აპირებს ჩაატაროს საკმაოდ სარისკო ოპერაცია - ასტროიდს ესროლოს ფეთქებადი ჭურვი, რათა მის ზედაპირზე კრატერი წარმოიქმნას და შესაძლებელი გახდეს ზედაპირის ქვეშ არსებული გრუნტის ნიმუშების აღება და გამოკვლევა. მეცნიერების აზრით ამ ნიმუშების ანალიზი დიდ სინათლეს მოჰფენს ჩვენი მზის სისტემის ისტორიას. იაპონიის კოსმოსურ სააგენტოში განმარტავენ, რომ Hayabusa-2-მა 5 აპრილიდან ასტეროიდს უნდა ესროლოს ბეისბოლის ზომის 2 კილოგრამიანი ფეთქებადი იმპაქტორი. გარკვეული დროის შემდეგ კი კოსმოსური აპარატი შეაგროვებს ასტეროიდის სიღრმეში არსებულ გრუნტს, რომელიც არ მოქცეულა კოსმოსური და მზის გამოსხივების გავლენის ქვეშ. ოპერაციის მსვლელობისას, ჭურვის სროლის შემდეგ, კოსმოსურ აპარატს მოუწევს ძალიან სწრაფად გადაინაცვლოს ასტეროიდის საპირისპირო მხარეს, რათა აფეთების შემდგომ კოსმოსში გამოტყორცნილი ნასხლეტებით არ დაზიანდეს. Hayabusa-2-ის მისიის ხელმძღვანელი ტაკანაო საეკი აღნიშნავს, რომ „ოპერაცია საკმაოდ რთული იქნება“. როგორც კი აპარატი რიუგუს მეორე მხარეს გადაინაცვლებს, იგი გაგზავნის სპეციალურ კამერიან მოდულს, რომელიც გადაიღებს მომხდარს. ასტეროიდის მეორე მხარეს Hayabusa-2 რამოდენიმე კვირას დარჩება, შემდეგ კი აფეთქების ადგილზე დაბრუნდება, რათა განახორციელოს წარმოქმნილი კრატერის დათვალიერება-გამოკვლევა. ოპერაციის დაწყებამდე ერთი დღით ადრე Hayabusa-2 დაიწყებს ასტეროიდთან მიახლოებას 20 კილომეტრის სიმაღლეზე. შემდეგ კი ესვრის ფეთქებადი ნივთიერებით სავსე იმპაქტორს, რომელიც ასტეროიდს დაეჯახება 2 კმ/წმ სიჩქარით. სააგენტო JAXA იმედოვნებს, რომ შეძლებენ შექმნან 10 მეტრი დიამეტრისა და 1 მეტრი სიღრმის კრატერი. ხოლო თუკი ასტეროიდი უფრო მყარი გრუნტისგან შედგება, კრატერი უფრო პატარა გამოვა. სააგენტო გეგმავს წარმოქმნილ კრატერში მოათავსოს ზონდი, მაგრამ თუკი ამგვარი ოპერაცია საფრთხისშემცველად იქნება მიჩნეული, მასზე უარს იტყვიან. ხოლო თუკი მსგავსი რამ მაინც განხორციელდება, ეს იქნება პირველი შემთხვევა ისტორიაში, როდესაც ასეთი ზედაპირის მქონე ობიექტიდან აღებული იქნება მიწისქვეშა ნიმუშები. დაგეგმილია, რომ Hayabusa-2 კოსმოსურ მისიას დაასრულებს 2019 წლის ბოლოსკენ. შეგროვებული გრუნტის ნიმუშებს იგი დედამიწაზე 2020 წლის ბოლოს ჩამოიტანს სამომავლო ანალიზისათვის. ასტეროიდმა სახელწოდება მიიღო იაპონური ფოლკლორიდან - ზღაპარი მეთევზე ურაშიმა ტაროზე, რომელმაც მოინახულა ჯადოსნური წყალქვეშა სასახლე რიუგუ-ძიო - ზღვის სტიქიის მბრძანებელი დრაკონის - რიუძინას სამფლობელო. იქიდან მეთევზემ წამოიღო საიდუმლო ყუთი, რომელიც ზღვის მბრძანებლის შვილმა აჩუქა. ასტეროიდისთვის სახელის შერჩევისისა მკვლევარებმა ჩათვალეს, რომ ზღაპრის სიუჟეტი იკვეთება ზონდ Hayabusa-2-ის მისიასთან - წამოიღოს დედამიწაზე მისი გრუნტი, რომლის შემცველობაც უცნობია. ასტეროიდ რიუგუს დიამეტრი დაახლოებით 900 მეტრია. მისი ორბიტა იმყოფება დედამიწისგან 300 მილიონი კილომეტრის დაშორებით. https://hi-news.ru/research-development/yaponskij-zond-xayabusa-2-provedet-bombardirovku-asteroida-ryugu-5-aprelya.html

აშშ-ის ენერგეტიკის სამინისტროს დაკვეთით კორპორაცია Intel-ი 2021 წლისთვის ააწყობს მსოფლიოში პირველ ექსაფლოპსურ (exaflops) სუპერკომპიუტერს - მოწყობილობა ისტორიაში ყველაზე მძლავრი და, როგორც მოსალოდნელია, ყველაზე სწრაფი სუპერკომპიუტერი გახდება. სიახლის შესახებ ცნობებს ავრცელებს New York Times. Intel-ის სუპერკომპიუტერი Aurora ამოქმედდება 2021 წელს, მისი წარმადობის მაჩვენებელი იქნება კვინტილიონი ოპერაცია წამში. მოწყობილობაში გამოყენებული იქნება Xeon Scalable პროცესორები, ასევე Intel Optane DC მეხსიერება. მიიჩნევა, რომ Aurora რვაჯერ სწრაფი იქნება დღესდღეობით არსებულ ყველაზე სწრაფ სუპერკომპიუტერთან - Summit-თან შედარებით. პროექტის ღირებულება 500 მილიონადაა შეფასებული. შედარებისთვის, წინამორბედი ყველაზე სწრაფი ამერიკული სუპერკომპიუტერ Summit-ის პროექტი 200 მლნ დოლარად იყო შეფასებული. Summit-ი აამოქმედა აშშ-ის ენერგეტიკის სამინისტროს ეროვნულმა კვლევითმა ლაბორატორიამ ოუკ-რიჯში 2018 წლის ზაფხულში. ამ სუპერკომპიუტერის მაქსიმალური სიმძლავრე აღემატება 200 კვადრილიონ ოპერაციას წამში - ეს მილიონჯერ მეტია ჩვეულებრივ კომპიუტერთან შედარებით. https://hightech.fm/2019/03/19/no-summit

კომპანია Apple-მა ოფიციალურად წარადგინა ახალი თაობის iMac დესკტოპ-კომპიუტერები „ყველაფერი ერთში“: მონობლოკებმა პირველებმა მიიღეს მეცხრე თაობის Intel Core პროცესორები. დაანონსებული კომპიუტერები წარმოდგენილნი არიან 1) 21,5-დუიმიანი დისპლეით, რომელიც შეესაბამება Full HD ფორმატს (1920 × 1080 პიქსელი) და 2) 4K Retina პანელით, რომლის გაფართოებაა 4096 × 2304 პიქსელი. საბაზისო კომპლექტაციის შემადგენლობაში შედის ინტეგრირებული გრაფიკული კონტროლერი Intel Iris Plus Graphics 640, ოფციურად კი შესაძლებელია დაყენდეს ამაჩქარებელი Radeon Pro Vega 20 4 გიგაბაიტიანი HBM2 მეხსიერებით. კომპანია ამტკიცებს, რომ წინა თაობის მოდელებთან შედარებით წარმადობა ორჯერ გაიზარდა. შესაძლებელია 6 ბირთვიანი Intel Core i7 ჩიპის გამოყენება, რომლის ტაქტის სიხშირეა 3,2 გჰც (Turbo Boost – 4,6 გჰც). ოპერატიული მეხსიერების მოცულობა ვარირებს 8-დან 32 გიგაბაიტამდე. მონაცემთა შენახვისთვის კონფიგურაცის შესაბამისად პასუხისმგებელია 1 ტერაბაიტიანი მყარი დისკი 5400 ბრუნით წუთში, ასევე 1 ტერაბაიტიანი დრაივერი Fusion Drive ან SSD-მოდული 256-დან 1 ტერაბაიტამდე მოცულობით. კომპიუტერის აღჭურვილობაში შედის HD-კამერა FaceTime, სტერეოდინამიკები, ქსელური კონტროლერი Gigabit Ethernet, ადაპტერები უსადენო კავშირებისთვის - Wi-Fi 802.11ac და Bluetooth 4.2, SDXC ბარათის კონექტორი, ოთხი USB 3.0 პორტი და ორი პორტი Thunderbolt 3 (USB-C). ამას გარდა, კომპანიამ წარადგინა iMac-ის 27-დუიმიანი ვერსია, რომელსაც აქვს Retina 5K ეკრანი გაფართოებით - 5120 × 2880 პიქსელი. ამ მონობლოკისთვის ხელმისაწვდომია 8 ბირთვიანი Intel Core i9 პროცესორი ტაქტის სიხშირით 3,6 გჰც (Turbo Boost – 5,0 გჰც). ოპერატიული მეხსიერების მოცულობა აღწევს 65 გიგაბაიტს, SSD მოდულისა კი - 2 ტერაბაიტს. ფასი: Entry-level - 21.5 დუიმი - 1,049 ევრო /1099 აშშ დოლარი Mid-level - 21.5 დუიმი, 1,249 ევრო /1,299 აშშ დოლარი Top-level - 21.5 დუიმი, 1,449 ევრო /1,499 აშშ დოლარი Entry-level - 27 დუიმი, 1,749 ევრო /1,799 აშშ დოლარი Mid-level – 27 დუიმი, 1,949 ევრო /1,999 აშშ დოლარი Top-level - 27 დუიმი, 2,249 ევრო /2,299 აშშ დოლარი. https://3dnews.ru/984457 https://www.macworld.co.uk/news/mac/imac-2019-release-date-3669589/#toc-3669589-2

Nvidia აქტიურად ახდენს ექსპერიმენტირებას მანქანური სწავლების სფეროში და საქმიანობის შედეგები საკმაოდ საინტერესოა. კომპანიამ GDC 2019-ზე განაცხადა, რომ შექმნა GauGAN - ინტელექტუალური აპლიკაცია ხატვისთვის, რომელშიც გამოყენებულია ღრმა მანქანური სწავლება უბრალო ნახატებიდან ფოტორეალისტური ვერსიების შექმნისთვის. აპლიკაციის სახელწოდება მომდინარეობს ფრანგ პოსტიმპრესიონისტ პოლ გოგენიდან (Paul Gauguin) და გამოყენებული პროგრამული უზრუნველყოფა GAN-იდან, რომლითაც ხდება რეალისტურად იმიტირებული გამოსახულების შექმნა. როგორ მუშაობს GauGAN? როგორც კომპანიამ განმარტა, აპლიკაცია ჰგავს „ჭკვიან ფუნჯს“, რომელიც ავსებს მომხმარებლების მიერ შესრულებულ ესკიზს (Nvidia ამას „სეგმენტაციის რუკას“ უწოდებს). რეალურად, უბრალო მომხმარებელი ან მხატვარი ქმნის მხოლოდ იმის გეგმას, რისი საბოლოოდ მიღებაც სურს, მონიშნავს თითოეულ სეგმენტს და მიუთითებს როგორი უნდა იყოს იგი. ამის შემდეგ საქმეში ერთვება GauGAN, რომელიც ნამუშევარს დეტალებით შეავსებს და ქმნის რეალისტურ ნახატს. მანქანური სწავლების მოდელმა შეისწავლა მილიონობით მხატვრული გამოსახულება, შედეგად კი ლანდშაფტს ავსებს შთამბეჭდავი (თუმცა ზოგჯერ იდეალურისგან შორს მყოფი) დეტალებით. თუკი დავხატავთ ტბორს, მასთან ახლოს არსებული დეტალები, ვთქვათ ხეები და ქვები - წყალში აირეკლება. საკმარისია შევცვალოთ სეგმენტის მონიშვნა „ბალახი“ და „თოვლით“, რომ მთლიანი გამოსახულება შეიცვლება და ზამთრის პეიზაჟად გარდაიქმნება, ხეები კი უფოთლებოდ წარმოგვიდგება. სადემონსტრაციო ვიდეო შეგიძლიათ იხილოთ ბმულზე: https://www.youtube.com/watch?v=p5U4NgVGAwg უნდა აღინიშნოს ისიც, რომ მიუხედავად GauGAN-ის მიერ გამოყენებულია სხვა ნახატებზე დაფუძნებული საყოველთაო ცოდნა - ფინალური სამუშაოები ორიგინალური გამოდის, რადგანაც აპლიკაცია ახდენს სრულიად ახლებური გამოსახულებების გენერირებას. Nvidia-ს ახალი ინტელექტუალური გრაფიკული რედაქტორი არ შემოიფარგლება მხოლოდ პეიზაჟებით - აპლიკაციას შეუძლია დაამატოს შენობები, გზები და ადამიანებიც კი. GAuGAN აგრეთვე საშუალებას აძლევს მომხმარებლებს - გამოიყენონ ფილტრები საჭირო სტილის გამოსახულების მისაღებად. ამგვარ ფილტრებს შეუძლია მოახდინონ კონკრეტული ფერმწერის სტილის იმიტაცია (მაგალითად, ვან გოგის სტილის: იხ. მომდევნო ფოტო) ან მართოს განათება - დღის გამოსახულება ღამისად აქციოს. ჯერჯერობით უცნობია, ოდესმე გახდება თუ არა GauGAN საყოველთაოდ ხელმისაწვდომი, თუმცა სავარაუდოდ ადრე თუ გვიან რიგითი მომხმარებლები შეძლებენ მსგავსი სასარგებლო ინსტრუმენტებით სარგებლობას, რომელიც მუშაობას გაუმარტივებს სხვადასხვა მიმართულებით: არქიტექტურიდან და ილუსტრირებიდან დაწყებული - თამაშების შექმნით დამთავრებული. რესურს NVIDIA AI Playground-ზე მსურველებს შეუძლიათ გაეცნონ მანქანური სწავლების ზოგიერთ შესაძლებლობას. მაგალითად, მასზე არსებული დემონსტრაციის - Artistic Style Transfer-ის მეშვეობით შესაძლებელია ნებისმიერი ფოტო ცნობილი მხატვრების სტილში დამუშავდეს. https://3dnews.ru/984465

კრიპტოსავალუტო ბაზრის მონაცემების პლატფორმა CoinMarketCap-მა დაამატა ახალი საზომი კრიპტო პროექტების ფუნდამენტალური საფუძვლის შესაფასებლად. ახალი სარეიტინგო სისტემა, სახელად Fundamental Crypto Asset Score (FCAS), ზომავს კრიპტოვალუტების „ჯანსაღ“ პროექტებს მომხმარებლების აქტიურობის, დეველოპერების ქმედებებისა და ბაზრის მომწიფების საფუძველზე. ძირითადად, სერვისი იძლევა პროექტის ზრდა-განვითარების შესახებ წარმოდგენას: „ჩვენ ვიღებთ შესაბამისი პროექტების ნედლ, დაუმუშავებელ ბლოკჩეინ-მონაცემებს და ვაანალიზებთ. მას შემდეგ, რაც „გავასუფთავებთ“, გავაანალიზებთ და აღვადგენთ ნედლი მონაცემების ელემენტებს, მათ ვაერთიანებთ სხვადასხვა წყაროდან მიღებულ ბაზრის მონაცემებთან“. მომხმარებლის აქტიურობა მოიცავს მის ყველანაირ ქმედებას კონკრეტულ კრიპტოვალუტასთან მიმართებაში და მასში აგრეთვე ჩართულია პროექტის გამოყენების ფაქტორები და ქსელური აქტივობა. შეფასება გამოითვლება კონკრეტული ბლოკჩეინის აქტიურობის ანალიზითა და საფულეების მისამართების მარკირებით, რათა განისაზღვროს მომხმარებლების, ბირჟების, კონტრაქტებისა და სხვა მონაწილეების რაოდენობა. დეველოპერის ქცევა მიუთითებს აქტიურობისა და ეფექტურობის დონეზე მწარმოებელთა შორის და მოიცავს ისეთ ფაქტორებს, როგორებიცაა კოდის შეცვლა, კოდის გასწორება და თანამონაწილეობა ქომიუნითიში. ბოლო კრიტერიუმი - ბაზრის სიმწიფე - განისაზღვრება რისკის ფაქტორებითა და თანხის მიწოდების მასით. როგორც წესი, საზომი ასახავს იმას, რომ კრიპტო აქტივს შეუძლია უზრუნველყოს სტაბილური შემოსავლიანობა სხვადასხვა საბაზრო სცენარის განვითარების შემთხვევაში, რაც ხორციელდება საბაზრო რისკების შეფასებისა და ფულადი მასების სტაბილურობის ანალიზის გაერთიანებით თითოეული კრიპტოვალუტის შემთხვევაში. პროექტს მხარდაჭერას უცხადებენ კრიპტო სამყაროს ისეთი მოთამაშეები, როგორებიცაა წამყვანი ამერიკული კრიპტო ბირჟა Coinbase, ვენჩურული კაპიტალის კომპანია Digital Currency Group, აგრეთვე კომპანია True Ventures - სილიკონის ველიდან. სტატიის ბეჭდვის მომენტში 1–1,000 health points სკალა გვიჩვენებს, რომ ლიდერი კრიპტოვალუტა Bitcoin-ის „სიჯანსაღის“ (health) მაჩვენებელია 885, Ethereum-ისა კი - 909 პუნქტი. ბაზრის კაპიტალიზაციის სიდიდით მესამე კრიპტოვალუტა Ripple (XRP) health scale-ზე 751 ქულით ფიქსირდება. სტაბილური მონეტა (stablecoin) Tether-ის მაჩვენებელი, რომელმაც მცირე ხნის წინ განაცხადა, რომ მას უკვე აღარ შეუძლია მხოლოდ აშშ დოლარით იყოს გამყარებული, შეადგენს 435 ქულას, რის გამოც იგი შკალაზე “F” კატეგორიაშია განთავსებული. https://cointelegraph.com/news/coinmarketcap-introduces-new-metrics-for-crypto-fundamentals

შესაძლოა მომავალში ინტერნეტი გაიწმინდოს თაღლითებისგან და ჩვეულებრივ მომხმარებლებსაც მოუწიოთ გულმოდგინედ აკონტროლონ თავიანთი სიტყვები. ფლორიდის შტატის უნივერსიტეტის მკვლევარებმა შეიმუშავეს ალგორითმი, რომელიც შესანიშნავად ასრულებს პოლიგრაფის როლს და ახდენს სიცრუის გამოვლინებას მომხმარებლების მიერ გამოყენებული სიტყვებისა და წერის სისწრაფის საფუძველზე. ტესტირების შედეგებმა აჩვენა, რომ ალგორითმს უკვე შეუძლია გაარჩიოს ტყუილი სიმართლისგან 85% შემთხვევაში. შედარებისთვის, ამ დროისთვის არსებულ ნამდვილ სიცრუის დეტექტორებს შეუძლიათ ეფექტურად იმოქმედონ 60-70 % შემთხვევაში. იმისათვის, რომ სისტემისთვის ესწავლებინათ ტყუილ-მართალის გარჩევა, მეცნიერებმა მანქანურ სწავლებას მიმართეს. 40 პირისგან შემდგარმა მოხალისეთა ჯგუფმა მონაწილეობა მიიღო ტესტირებაში - ონლაინ-თამაშებში, რომელშიც შემთხვევითი შერჩევის საფუძველზე მონაწილეთა ნაწილს მატყუარის, ნაწილს კი მართლის როლი ერგო. 80 სათამაშო სესიის განმავლობაში მონაწილეები პასუხობდნენ კითხვებს, ხელოვნური ინტელექტი კი მათ პასუხებს აკვირდებოდა და სწავლობდა. აღმოჩნდა, რომ მართლები და მატყუარები სრულიად განსხვავებულ სიტყვათა ჯგუფებს იყენებენ და ბეჭდავენ სხვადასხვა სიჩქარით. მაგალითად, მატყუარები ხშრად იყენებენ სიტყვებს: „ყოველთვის“, „არასდროს“, რათა ხაზი გაუსვან თავიანთ დამაჯერებლობას და ამავე დროს პასუხებს ბეჭდავენ ძალიან სწრაფად. სიმართლის მთქმელი ადამიანები კი ხშირად იყენებენ სიტყვას „შესაძლოა“ და პასუხებს უფრო დაფიქრებით, ნელა სცემენ. ჯამში, სიტყვათა სიხშირეებსა და პასუხის სისწრაფეზე დაკვირვებით, ონლაინ-პოლიგრაფმა ისწავლა ტყუილის ამოცნობა 80-100% შემთხვევაში. მკვლევარები აცხადებენ, რომ ტესტირებაში მონაწილეთა რიცხვი მცირე იყო, თუმცა მაინც ცხადია, რომ ტექნოლოგიას დიდი პოტენციალი გააჩნია. ისინი აპირებენ ტექნოლოგია უფრო სრულყოფილი გახადონ და დაუკავშირდნენ სხვადასხვა Messenger-აპლიკაციების შემქმნელებს. „ამ საბაზისო კვლევამ ონლაინ-პოლიგრაფიის სისტემის მიერ სოციალურ ქსელებში კომუნიკაციის გაუმჯობესებისთვის დიდი პოტენციალი გვიჩვენა. მსურს მთელი მსოფლიოს ყურადღება მივაპყრო ამ იდეაზე, რათა შევძლოთ და იგი იმ კომერციულ პროდუქტად ვაქციოთ, რომლის Messenger-ებში დანერგვაც შესაძლებელი იქნება” – აცხადებს კვლევის ხელმძღვანელი. https://hi-news.ru/technology/sozdan-virtualnyj-detektor-lzhi-internet-stanet-bolee-chestnym.html

თებერვალში სარაკეტო ძრავმა Raptor-მა, რომელიც რაკეტა Starship-ისთვისაა განკუთვნილი, წარმატებით გაიარა გამოცდა. კომპანია წინ მიიწევს და ილონ მასკის თქმით უახლოეს პერიოდში რაკეტა თავის პირველ სატესტო „ნახტომს“ გააკეტებს ერთი ძრავით, მას კი შემდეგ მოჰყვება სუბორბიტალური ფრენები სამი ძრავით. SpaceX-ის დამფუძნებელმა აგრეთვე გამოქვეყნა დამცავი საფარის გამოცდის ამსახველი ვიდეო. საფარის წყალობით რაკეტა არ დაიწვება ატმოსფეროში დედამიწაზე დაბრუნების დროს. დამცავი ფარი განთავსებული იქნება რაკეტის მხოლოდ ცალ მხარეზე. იგი წარმოადგენს საფარს, რომელიც დამზადებულია ექვსკუთხიანი ფილებისგან. ინჟინრების არჩევანი ასეთ ფორმაზე იმიტომ შეჩერდა, რომ ფილებს შორის მიერთების ადგილებში არ რჩება პირდაპირი გზა ატმოსფეროს მწველი აირებისთვის. ყველა მეტად გაცხელებად ადგილებში გამოყენებული იქნება ტრანსპირაციული გაგრილების მეთოდი, სადაც მეთანი და წყალი აორთქლდება საფარის მეორე მხარის 10-მიკრონიანი სივრცეებიდან და შიდა ნაწილი კი გაგრილდება.  ცნობილია, რომ დამცავმა საფარმა წარმატებით გაიარა ტესტირება 1300 გრადუს ცელსიუსზე უფრო მაღალი ტემპერატურის პირობებში - ეს საკმარისია, რათა რაკეტამ გაუძლოს დედამიწაზე დაბრუნებისას. აღსანიშნავია ისიც, რომ რაკეტა მზად იქნება მორიგი ფრენისთვის დედამიწაზე დაშვებისთანავე - მას არ დასჭირდება რემონტი ხელმეორედ გამოყენებისთვის. „ტრანსპირაციული გაგრილება ყველგან დაემატება, სადაც კი დამცავი ფარის რღვევას დავინახავთ. რაკეტა კვლავ მზად იქნება ხელახალი ფრენისთვის დედამიწაზე დაბრუნებისთანავე“ - აცხადებს ილონ მასკი, SpaceX-ის დამფუძნებელი. ის ადგილები, რომლებიც განსაკუთრებით მაღალი ტემპერატურის გავლენის ქვეშ ხვდება, გამოვლენილი იქნება უახლოესი ტესტირებების მსვლელობისას. დიდი ალბათობით, გამოცდა ამავე კვირაში განხორციელდება იმის გათვალისწინებით, რომ 18 მარტიდან SpaceX-ის მიმდებარე ტერიტორია გადაკეტილია. https://hi-news.ru/space/spacex-ispytala-teplovuyu-zashhitu-korablya-starship.html

მსოფლიოს წამყვან მეცნიერთა ჯგუფს სურს ჩატარდეს მორატორიუმი დნმ-ის რედაქტირებით გენეტიკურად მოდიფიცირებული ბავშვების შექმნასთან დაკავშირებით. მათი აზრით, ამ სფეროში ყველა ექსპერიმენტი უნდა კონტროლდებოდეს მსოფლიოს ჯანდაცვის ორგანიზაციის (World Health Organization: WHO) მიერ შექმნილი სპეციალური ორგანოთი. ამ სფეროში მიმდინარე აქტიურობის პარალელურად ექსპერტებს სურთ, რომ ქვეყნებმა თავიანთი გეგმები დაარეგისტრირონ და მათ შესახებ კოლეგებს აცნობონ. მათი აზრით, კვლევების რეგისტრირება უნდა მოხდეს საერთაშორისო ორგანოში, რომლის ხელმძღვანელიც იქნება მსოფლიოს ჯანდაცვის ორგანიზაცია. „ჩვენ გვსურს ვიხილოთ გონივრული და ღია გადაწყვეტილებები“ - აღნიშნავს ამერიკელი მათემატიკოსი და გენეტიკის სპეციალისტი, MIT-ის ბიოლოგიის პროფესორი, აშშ-ის ეროვნული სამეცნიერო აკადემიის წევრი ერიკ ლენდერი. – „გვინდა დავრწმუნდეთ, რომ არც ერთი ქვეყანა არაფერს აკეთებს საიდუმლოდ და მთელი მსოფლიოს მეცნიერები ამ სფეროში თავიანთ გეგმებს საჯაროდ განიხილავენ“. ლენდერს სხვა 16 ექსპერტთან ერთად სურს ჩატარდეს მორატორიუმი. ემანუელ შარპენტიემ და ფენ ჩჟანმა, რომელთაც მონაწილეობა აქვთ მიღებული გენების რედაქტირების ინსტრუმენტის - CRISP-ის შემუშავებაში, თავიანთი წვლილი შეიტანეს სტატიის დაწერაში. ამგვარი მოთხოვნა გაჩნდა ოთხი თვის შემდეგ იმის მერე, რაც ჩინელმა მკვლევარმა ხე ცზიანკუიმ განაცხადა გენმოდიფიცირებული ტყუპების, ლულუს და ნანას გაჩენის შესახებ: მათი დნმ გადაიწერა და შეიცვალა იმ მიზნით, რომ ტყუპები შიდსის ვირუსისგან ხელშეუხებელნი ყოფილიყვნენ. ცზიანკუი მეცნიერებისა და ტექნოლოგიების უნივერსიტეტიდან გაათავისუფლეს. იგი ასევე მოხვდა მწვავე კრიტიკის ქვეშ „უგუნური და არაეთიკური“ ექსპერიმენტის განხორციელების გამო. გენების რედაქტირების ინსტრუმენტები, მათ შორის CRISP-იც, მეცნიერებს საშუალებას აძლევს ცვლილებები შეიტანონ დნმ-ში. უამრავი მკვლევარი მიიჩნევს, რომ ამ მეთოდმა შესაძლოა რევოლუცია მოახდინოს ისეთ დაავადებებთან ბრძოლაში, როგორიცაა კუნთების დისტროფია და მუკოვისციდოზი (მემკვიდრული დაავადება, რომელიც ხასიათდება პანკრეასის, ნაწლავების ჯირკვლების და სასუნთქი გზების კისტოზური გადაგვარებით. ამის მიზეზია მათი გამომყვანი სადინრების დახშობა ბლანტი სეკრეტით. ვლინდება ქრონიკული პნევმონიით, საჭმლის მონელების დარღვევით. დაავადების დამემკვიდრება ხდება აუტოსომურ-რეცესიული ტიპით. - http://www.nplg.gov.ge). ასეთივე მიდგომა პოტენციურად შესაძლებელია გამოყენებულ იქნას ემბრიონის გენეტიკური დეფექტების გამოსწორებისთვის - პროცესი, რომელსაც ეწოდება „მზარდი ხაზის რედაქტირება“, თუმცა სავარაუდოდ, ეს იშვიათ შემთხვევაში გამოიღებს სასურველ შედეგს. მორატორიუმისკენ მოწოდებამ მხარდაჭერა მიიღო აშშ-ის ჯანდაცვის ეროვნული ინსტიტუტის მხრიდან. – „ჩვენ უნდა გავაკეთოთ რაც შეიძლება მკაფიო განცხადება იმის თაობაზე, რომ ეს არის ის გზა, რომლის გასავლელად ჯერ მზად არ ვართ“ - განაცხადა ინსტიტუტის დირექტორმა ფრენსის კოლინზმა. https://hightech.fm/2019/03/16/crispr-12

Apple iPad Air კომპანია Apple-მა ოფიციალურად წარადგინა ახალი პლანშეტი iPad Air, რომელსაც აქვს 10,5-დუიმიანი ხარისხიანი Retina დისპლეი. ეკრანის გაფართოება შეადგენს 2224 × 1668 პიქსელს, პიქსელების სიმჭიდროვეა 264 PPI. დისპლეი სენსორულია, მისი გამოყენება ასევე შესაძლებელია Apple Pencil-ით. პლანშეტი მუშაობს 64-ბიტიანი არქიტექტურის მქონე A12 Bionic პროცესორზე. გათვალისწინებულია ნეირონული მოდული Neural Engine და coprocessor M12. გაჯეტის არსენალში შედის 7-მეგაპიქსელიანი კამერა FaceTime HD მაქსიმალური დიაფრაგმით - ƒ/2,2. გარდა ამისა, პლანშეტს აქვს 8-მეგაპიქსელიანი ძირითადი კამერა მაქსიმალური დიაფრაგმით - ƒ/2,4. პლანშეტზე ხელმისაწვდომია ადაპტერები უსადენო კავშირებისთვის - Wi-Fi 802.11a/b/g/n/ac და Bluetooth 5.0, GPS/GLONASS სანავიგაციო სისტემების მიმღები, სტერეოდინამიკები, ელექტრო კომპასი, აქსელერომეტრი, გიროსკოპი, ბარომეტრი, განათების სენსორი და თითის ანაბეჭდის სკანერი Touch ID. გამოყენებულია ოპერაციული სისტემა iOS 12. ბატარეის ერთ დატენვაზე ავტონომიური მუშაობის დროა 10 საათი ინტერნეტში მუშაობის ან ვიდეომასალების ყურების დროს. Apple iPad Air პლანშეტის შეძენის მსურველებს შეუძლიათ არჩევანი გააკეთონ 64 ან 256 გიგაბაიტიანი ფლეშ-მეხსიერებების მქონე მოდიფიკაციებს, აგრეთვე 4G/LTE კავშირის მხარდაჭერის არ/მქონე მოდელებს შორის. პლანშეტი წარმოდგენია ფერის სამნაირ ვარიანტად - ვერცხლისფერი, რუხი და ოქროსფერი. ფასი 500 აშშ დოლარს შეადგენს. iPad mini კომპანია Apple-მა დააანონსა ახალი თაობის iPad Mini: მოწყობილობა უკვე ხელმისაწვდომია 400 აშშ დოლარად. iPad Mini-ს აქვს 7,9-დუიმიანი Retina დისპლეი, რომლის გაფართოება 2048 × 1536 პიქსელს შეადგენს, პიქსელების სიმჭიდროვე კი არის 326 PPI. Apple Pencil-ის მეშვეობით მომხმარებლებს შეუძლიათ დახატონ ან ჩაინიშნონ რაიმე. უნდა ითქვას, რომ ამ სტილუსის შეძენა მომხმარებლებს ცალკე მოუწევთ - იგი კომპლექტში არ შედის. პლანშეტი წარმოდგენილია მეხსიერების მოცულობის მხრივ ორ კონფიგურაციად - ხელმისაწვდომია 64 და 256 გიგაბაიტიანი ფლეშ-მეხსიერების მქონე მოდელები. მოდიფიკაციის შესაბამისად მხარდაჭერილია ან მხოლოდ Wi-Fi (802.11a/b/g/n/ac) უსადენო კავშირი, ან Wi-Fi და ქსელური კავშირი 4G/LTE. გარდა ამისა, გათვალისწინებულია ინტეგრირებული Bluetooth 5.0. პლანშეტში გამოყენებულია A12 Bionic პროცესორი, აქვს კამერა FaceTime HD 7-მეგაპიქსელიანი სენსორით და ძირითადი 8-მეგაპიქსელიანი კამერა. აუდიოქვესისტემა მოიცავს სტერეოდინამიკებს. სხვა დეტალებიდან აღსანიშნავია გიროსკოპი, აქსელერომეტრი, ელექტრო კომპასი, ბარომეტრი, გარე განათების სენსორი და დაქტილოსკოპიური სენსორი Touch ID. პლანშეტის გაბარიტებია 203,2 × 134,8 × 6,1 მმ, წონა - დაახლოებით 300 გრამი. ერთ დატენვაზე ავტონომიური მუშაობის დროდ გამოცხადებულია 10 საათი. https://3dnews.ru/984398

წარმატებები ვანო, ველი დაპირებულ აკუსტიკურ საღამოს

კომპანია Fisker-ი, რომელიც დაარსებულია ავტომობილების დიზაინერის - Henrik Fisker-ის მიერ, აპირებს გამოუშვას ქროსოვერი მთლიანად ელექტრო ძრავით. აღსანიშნავია, რომ Fisker-ს მონაწილება აქვს მიღებული ისეთი ავტომობილების შექმნაში, როგორებიცაა Aston Martin DB9, Aston Martin V8 Vantage, VLF Force 1 V10, VLF Destino V8 და BMW Z8. გარდა ამისა, Henrik Fisker-ი ჰიბრიდ Karma-ს „მამად“ ითვლება. პროექტირებადი ელექტრომობილის ტექნიკური მახასიათებლების შესახებ ინფორმაცია არც ისე ვრცელია. ცნობილია, რომ სტანდარტულ კომპლექტაციაში შედის 80 კვტ-იანი ბატარეა. ერთ სრულ დატენვაზე გასავლელი მარაგი დაახლოებით 500 კილომეტრია. ელექტრო ქროსოვერის პროტოტიპის დემონსტრირებას კომპანია Fisker-ი მიმდინარე წლის ბოლოს ან შემდეგი წლის დასაწყისში მოახდენს. თუმცა ელექტრომობილის კომერციული მოდელი 2021 წლის მეორე ნახევრამდე არ იქნება მზად. ნავარაუდევია, რომ Fisker-ის ელექტრო ქროსოვერის საბაზისო კომპლექტაცია 40 ათას დოლარზე ნაკლებ ფასად გაიყიდება. როგორც ითვლება, ხსენებული ელექტრომობილი კონკურენციას გაუწევს Tesla Model Y-ს. ეს უკანასკნელი Tesla-მ გასულ კვირაში წარადგინა. მისი ფასი 39 ათასი დოლარიდან იწყება, თუმცა ამ ფასის მქონე მოდელის გაყიდვები 2021 წლამდე არ დაიწყება. 2020 წლის შემოდგომაზე გაყიდვაში გამოვა Model Y-ის მხოლოდ 47 ათას დოლარიანი მოდელი. https://3dnews.ru/984395

ბოლო რვა წლის განმავლობაში კრიპტო ბირჟების მესამედი გატყდა, თუმცა ჰაკერების ვინაობის დადგენა მხოლოდ მიზერულ შემთხვევებში მოხერხდა. ამის გამო რამოდენიმე ქვეყანას სურს ბირჟების კანონმდებლობით რეგულირება, რათა დაიცვას მოქალაქეების საკუთრება. რამოდენიმე ქვეყანაში მიღებულია კანონმდებლობა, რომელიც არეგულირებს კრიპტოვალუტების გაცვლით ოპერაციებს. ხელისუფლების წარმომადგენლები იმედოვნებენ, რომ ამ ძალისხმევით შემცირდება შეტევების რისკი და ამაღლდება ოპერატორების პასუხისმგებლობა იმ ზარალზე, რაც მომხმარებლებს მიადგებათ. ხელისუფლებას აგრეთვე აშფოთებს ისიც, რომ შესაძლოა მოპარული თანხა ფულის გამთეთრებლებს ან ტერორისტებს ჩაუვარდეთ ხელში. მიუხედავად იმისა, რომ კრიპტო ბირჟებს შეუძლიათ იმუშაონ როგორც ბანკებმა - ისინი პრაქტიკულად არ რეგულირდება. თანხის დამგროვებლების დაზღვევა არ არსებობს, მომხმარებლების ანონიმურობის გამო კი მეტად ძნელია მიაგნონ მოპარულ თანხებს. ზოგიერთ ქვეყანას, მაგალითად იაპონიას, სურს შემოიღოს მკაცრი წესები, რომლებითაც კრიპტო ბირჟები გაკონტროლდება. წესებში იგულისხმება მომხმარებლების დეანონიმიზაცია, სამუშაოში საკმარისი რაოდენობის პერსონალის მიღება, საბუღალტრო ბალანსის წარმოება და მომხმარებლების მთლიანი მარაგის მყარ დისკზე შენახვა, რომელიც ინტერნეტთან არ იქნება დაკავშირებული. ახალი კანონები ნიშნავს იმას, რომ თუკი ბირჟა გატყდება, ოპერატორები ანგარიშვალდებულნი იქნებიან იმაზე, თუ როგორ მართავდნენ თავიანთი კლიენტების საკუთრებას. ბოლო პერიოდის ერთ-ერთი უმსხვილესი შეტევა განხორციელდა ბირჟა Coincheck-ზე. ბირჟის მომხმარებლებმა მოგვიანებით აღნიშნეს, რომ მათი გატეხილი დეპოზიტები იმყოფებოდა ინტერნეტთან მიერთებულ „ცხელ საფულეებში“, რაც გამოწვეული იყო „პერსონალის სიმცირით“. მსგავსი კანონდარღვევები სამომავლოდ სასამართლო გამოძიებას დაექვემდებარება. კრიპტოვალუტების გაცვლის რეგულირების მსურველებიდან იაპონია ერთადერთი არ გახლავთ. ავსტრალიის ხელისუფლებამ განაცხადა, რომ ტრანზაქციების ანგარიშისა და ანალიზის ცენტრი ახალ უფლებამოსილებას მიიღებს Bitcoin-ისა და სხვა კრიპტოვალუტების მონიტორინგისთვის. ახალი კანონმდებლობის მიხედვით ბირჟები ვალდებულნი ხდებიან გაამხილონ ინფორმაცია ინვესტორებისა და გარიგებების შესახებ. https://hightech.fm/2019/03/17/hack-6

ბრიტანული კომპანიის, Reaction Engines-ის მიერ შექმნილი ინოვაციური ჰიბრიდული ზებგერითი საჰაერო რეაქტიული ძრავის - SABRE-ის შემუშავება ახალ ფაზაზე გადავიდა. ხსენებულ ძრავს შეუძლია ეფექტურად იმუშაოს როგორც ატმოსფეროში, ასევე კოსმოსური ვაკუუმის პირობებში. მცირე ხნის წინ კომპანიამ შეძლო ესკიზების პროექტის წარმატებით დაცვა ევროპულ და ბრიტანულ კოსმოსურ სააგენტოებში. როგორც ESA-ს (European Space Agency) საიტზეა მითითებული, უახლოესი 18 თვის მანძილზე მწარმოებლები ახალი ძრავის ცალკეული დეტალების გამოცდებს ჩაატარებენ. კერძოდ, უახლოეს თვეებში ბრიტანეთის Buckinghamshire-ის ახალ ცენტრში შედგება ძრავის გაზოგენერატორის დემონსტრატორის გამოცდა ატმოსფერულ ჰაერითა და თხევადი წყალბადით. ესკიზური პროექტი ნებისმიერი ტექნიკის შემუშავების პროგრამაში ერთ-ერთ პირველ ეტაპს წარმოადგენს. ამ ეტაპზე კონსტრუქტორები განსაზღვრავენ ტექნიკის შესაძლო გარეგნულ სახეს, ძირითად ფუნქციებს, ტექნოლოგიებს, რომლებიც მასში იქნება გამოყენებული, წინასაწარ კონსტრუქციულ გადაწყვეტილებებს. ახალი ძრავის განსაკუთრებულობა გამოიხატება წინასწარი გაგრილების რევოლუციური კამერის გამოყენებაში, რომლის ექსკიზზე მუშაობა დაახლოებით ათი წლის წინ დაიწყო. გაგრილების სისტემაში გამოყენებულია მსუბუქი, დახვეული მილების მასივი, რომლებიც თხევადი წყალბადითაა სავსე. ამგვარი კონსტრუქცია საშუალებას იძლევა გაგრილდეს ჰაერის ნაკადი +1000 გრადუსიდან -150 გრადუს ცელსიუსამდე 1/1000 წამში, ამის შემდეგ კი იგი ძრავში მოხვდება. ნორმალურ პირობებში ამან შესაძლოა გამოიწვიოს კონდენსატის განვითარება, რასაც შესაძლოა ძრავის გაყინვა მოჰყვეს. თუმცა კომპანიამ იპოვა ამ პრობლების თავიდან არიდების საშუალება. SABRE-ის ჰიბრიდული საჰაერო რეაქტიული ძრავის სქემა აფრენის დაწყებისას და აჩქარების დროს SABRE იმუშავებს ჩვეულებრივი რეაქტიული ძრავივით, ატმოსფეროს ჰაერსა და თხევად წყალბადზე. 5966 კმ/სთ სიჩქარის განვითარების შემდეგ კი გადავა სარაკეტო რეჟიმზე. მოლოდინი: ჰიბრიდული საჰაერო-სარაკეტო ძრავების ბაზაზე აწყობილი კოსმომფრენები მრავალჯერადი გამოყენების იქნება და ამასთან მათი ფასი გაცილებით ნაკლები იქნება ჩვეულებრივ რაკეტებთან შედარებით. SABRE-ის პროექტის მწარმოებლებს ფინანსურ მხარდაჭერას უწევენ კომპანიები - Rolls-Royce და Boeing. პროექტში თავისი წილი ფინანსები შეიტანა ESA-მაც (10 მლნ ევრო ) და ბრიტანეთის კოსმოსურმა სააგენტომაც (50 მლნ ევრო). როგორც ამჟამად ცნობილია, მთლიანად გამართული ძრავის გამოცდა 2020-2021 წლებში შედგება. https://hi-news.ru/technology/proekt-innovacionnogo-vozdushno-reaktivnogo-dvigatelya-sabre-poluchil-zelenyj-svet.html

რამოდენიმე დღის წინ კომპანია Tesla-მ წარადგინა ახალი ელექტო ქროსოვერი Model Y. აღმოჩნდა, რომ კომპანიის ერთ-ერთ სადემონსტრაციო ვიდეორგოლში დამალული იყო „სააღდგომო კვერცხი“ - მომავალი პიკაპის თიზერი, თუმცა იგი პრაქტიკულად ვერავინ შენიშნა. ამიტომ ილონ მასკმა გადაწყვიტა გაესაჯაროვებინა საიდუმლო გამოსახულება, შედეგად კი მომხმარებლები კიდევ უფრო საგონებელში ჩააგდო. თითქმის გაურკვეველია, სამომავლო ავტომობილის რომელი ნაწილია ფოტოზე გამოსახული, დიზაინერებმა კი გადაწყვიტეს დამოუკიდებლად ახადონ ფარდა საიდუმლოს. რამოდენიმე თვის წინ მასკი ამბობდა, რომ პიკაპის დიზაინი მას შთააგონა Blade Runner-ის კიბერპანკ-სამყარომ. ამასთან, განაცხადა, რომ არ აღელვებს, თუკი მეტისმეტად თამამი გადაწყვეტილებების გამო ეს ავტომობილი მომხმარებლებში დიდად პოპულარული ვერ გახდება. მასკი ამბობდა, რომ ფუტურისტული მინი-სატვირთოს გამოსვლის შემდეგ იგი გამოუშვებს უფრო მოკრძალებულ და ჩვეულებრივი დიზაინის მქონე მოდელს. რესურს Electrec-ს ერთ-ერთმა დიზაინერმა, შონ სპარლინგმა გაუზიარა სამომავლო ელექტრო პიკაპის საკმაოდ „უხეში“ 3D მოდელის მონახაზი. მისი აზრით, პიკაპს საკმაოდ გრძელი კაპოტი ექნება, თუმცა მცირე დეტალიზაციის გამო მომავალი ავტომობილის რაიმე განსაკუთრებელი მახასიათებლის გამორკვევა ჯერჯერობით შეუძლებელია. ზოგიერთი დიზაინერი მიიჩნევს, რომ Tesla-ს გამიზნულად შეჰყავს საზოგადოება დაბნეულობაში და გამოსახულების კუთხე შეცვლილია. სრულიად შესაძლებელია, რომ თიზერში საბარგულის მხარე ჩანს - თუკი შევადარებთ ორი წლის წინანდელ გამოსახულებას, საკმაოდ ბევრი საერთო მახასიათებლის პოვნაა შესაძლებელი. ასევე არსებობს აზრი, რომ ფოტოზე პიკაპის სატვირთო სივრცეა გამოსახული. დიზაინერების ერთ-ერთ ქმნილებაზე შესაძლებელია ვიხილოთ სამომავლო პიკაპის უფრო სტრანდარტული იერსახე, მეორე ნიმუში კი უფრო მეტად შეესაბამება კიბერპანკის სტილს. https://hi-news.ru/auto/novoe-izobrazhenie-pikapa-tesla-ozadachilo-dizajnerov.html

ფრანგული კომპანია Lazareth-ის მოტოციკლები ცნობილია თავიანთი სტილით, გაბედული და აგრესიული დიზაინითა და სიმძლავრით. 2018 წლის ბოლოს კომპანიამ წარადგინა მფრინავი მოტოციკლი Moto Volante, რომელიც იმ დროს ფუტურისტულ მოდელად მიიჩნეოდა და რეალურ პირობებში გამოყენებისთვის არ იყო განკუთვნილი. თუმცა ამჯერად როგორც ცნობილი გახდა, იგი მართლაც ახდენს ფრენის დემონსტირებას - მოტოციკლს შეუძლია ერთი მეტრის სიმაღლეზე აფრინდეს და მსუბუქად დაეშვას უკან. ახალი მოტოციკლი წარმოადგენს ევოლუციას შთამბეჭდავი იერსახითა და სიმძლავრით, აქვს 470 ცხენის ძალის სიმძლავრის მქონე Maserati-ის ძრავი. Moto Volante-ის მთავარი ინოვაციაა რეაქტიული ტურბინები JetCat, რომელთა საშუალო ბრუნვის მაჩვენებელია 96 ათასი ბრუნი წუთში. ჰიდრავლიკურ აქტუატორებს საბურავები ვერტიკალურ მდგომარეობიდან ჰორიზონტალურში გადაჰყავს, რათა მათ შეძლონ კონსტრუქციის ჰაერში აწევა. კომპანიის წარმომადგენლის თქმით, Moto Volante-ის მფლობელებს შეეძლებათ იარონ ჩვეულებრივი გზით, სწორი ფართე ზედაპირის მოედნიდან კი შეძლებენ აფრენას. სტანდარტული სვლის რეჟიმიდან ფრენის რეჟიმზე გადართვას დაახლოებით 60 წამი სჭირდება - სწორედ ეს დროა საჭირო აფრენისთვის მოსამზადებლად. კონსტრუქცია 140 კილოგრამს იწონის, ამიტომ აუცილებელია ძრავმა უზრუნველყოს დაახლოებით 240 კგ გაწევა. მოტოციკლი Lazareth Moto Volante კიდევ ერთხელ წარდგება საზოგადოების წინაშე 2019 წლის ოქტომბერში დუბაიში გამართულ გამოფენა Gitex-ზე. ამავე დროს დაიწყება წინასწარი შეკვეთების მიღება - მოტოციკლის ფასი შთამბეჭდავად მაღალია და დაახლოებით 560 ათას დოლარს შეადგენს. https://hi-news.ru/auto/video-proekt-letayushhego-motocikla-lazareth-realen-on-podnyalsya-na-metrovuyu-vysotu.html

კომპანია Intel-მა წარადგინა თავისი პირველი 100-გიგაბიტიანი ადაპტერები ახალი ფორმ-ფაქტორით - OCP NIC 3.0. ამ დრომდე ამგვარი ქსელური ბარათები დემონსტრირებდა მხოლოდ Intel-ის კლიენტთა შეზღუდულ წრეში, ამჯერად კი კომპანიამ გადაწყვიტა პროდუქტი ყველასთვის ხელმისაწვდომი გახდეს. 100GbE ტიპის ადაპტერები რამოდენიმე მწარმოებლის ასორტიმენტში ჯერ კიდევ 2014-2015 წლებში გამოჩნდა, თუმცა Intel-ს ამგვარი გადაწყვეტილებები ამ დრომდე არ ჰქონია. მხოლოდ მრავალჰოსტიან FM10420 კონტროლერს შეეძლო უზრუნველეყო 100 გბიტი/წმ სიჩქარე, თუმცა მხოლოდ რამოდენიმე 50- ან 25-გიგაბიტური ინტერფეისით. ამჟამად Intel-ს უკვე აქვს კონტროლერები, რომლებიც უზრუნველყოფს 100-გიგაბიტიანი ინტერფეისის მუშაობას. Intel-ისგან შემოთავაზებულია ფორმ-ფაქტორ OCP NIC 3.0 მხარდაჭერა და შესაძლებელია ერთად რამოდენიმე სხვადასხვა ინტერფეისის ადაპტერების გამოყენება. ერთ-ერთი მათგანია ახალი ბარათი Intel 100GbE OCP 3.0 NIC (პირველი ფოტო). გარდა ამისა, Intel-მა მოახდინა 100GbE ქსელური ადაპტერის დემონსტრაცია სერვერ Dell EMC PowerEdge-ის შემადგენლობაში. ეს სერვერი შესაძლებელია დაკომპლექტდეს სხვადასხვა ტიპის ქსელური ბარათებით, მათ შორის PCIe ვერსიებით. რაღა თქმა უნდა, მოხდა ახალი ადაპტერის 100 გბიტი/წმ სიჩქარის დემონსტრირებაც. სიჩქარის გარდა ადაპტერის სხვა შესაძლებლობები ჯერჯერობით წარმოდგენილი არ არის. ჯამში, სასიამოვნოა იმის ხილვა, რომ Intel-ი შეუერთდა იმ კომპანიების რიცხვს, რომლებიც მომხმარებელს სთავაზობენ 100GbE ტიპის ადაპტერებს. აღვნიშნავთ, რომ მსგავსი ადაპტერი Mellanox ConnectX-5 VPI 100GbE გამოშვებულ იქნა 2016 წელს, მიმდინარე წელს კი მის შემცვლელად მოგვევლინება ახალი ConnectX-6. მიუხედავად იმისა, რომ ამ მიმართულებით კონკურენციაში Intel-ი ახლაღა ჩაება, კონკურენციის ზრდა ტექნოლოგიის განვითარებაზე დადებითად იმოქმედებს. https://servernews.ru/984324

ამერიკული კორპორაცია Lockheed Martin-ი გეგმავს შექმნას თანამგზავრების ქსელი, რომლითაც უზრუნველყოფილი იქნება სტაბილური ინტერნეტის მიწოდება სტიქიური უბედურებების ზონებში. პროექტი დაზარალებულებს საშუალებას მისცემს სწრაფად დაუკავშირდნენ ექსტრემალურ სამსახურებს ან ახლობლებს - წერს New Atlas. სტიქიური უბედურებებისა და ტექნოგენური კასატროფების ზონებში ხშირად ფიქსირდება კავშირის დარღვევა და გაუმართაობა. ეს პრობლემები შეიძლება გამოწვეული იყოს როგორც გადამცემი ანძების დაზიანებით, ასევე ქსელის გადატვირთვით. კავშირის არარსებობის გამო დაზარალებულები ხშირად ვერ ახერხებენ თავიანთი ადგილმდებარეობა აცნობონ სამაშველო სამსახურს - ამის გამო კი მსხვერპლი იზრდება. Lockheed Martin-ის გეგმის თანახმად, მომხმარებლები ავტომატურად მიუერთდებიან ახალ თანამგზავრულ ქსელს იმ შემთხვევაში, თუკი დედამიწაზე არსებული კავშირის სისტემა მწყობრიდან გამოვა. პროექტის დეტალებსა და რეალიზაციის ვადებს კომპანია ჯერჯერობით არ ასაჯაროვებს. https://hightech.fm/2019/03/15/lte-save https://newatlas.com/lockheed-martin-lte-satellite/58854/

ბრაუზერ Google Chrome-ის ზიანისმომტანი დამატება მომხმარებლებს აიძულებდა მონაწილეობა მიეღოთ კრიპტო ბირჟა Huobi-ს ყალბ airdrop-ში, რის შედეგადაც ხსენებული ბირჟის ორასზე მეტი მომხმარებელი დაზარალდა - ნათქვამია კომპანიის ოფიციალურ ბლოგში. ვებ-ბრაუზერ Chrome-ის დამატება, სახელად NoCoin, 230-ჯერ ჩამოიტვირთა, სანამ Google მას წაშლიდა - აცხადებს Harry Denley, იგი მართავს კრიპტო scam-ების ბაზას - EtherscamDB. Denley-მ აღნიშნა, რომ ჰაკერებმა გამიზნულად შენიღბეს ზიანისმომტანი დამატება, რათა მას მიეღო იმ ინსტრუმენტის სახე, რომელიც მომხმარებლებს იცავს მალვეარ პროგრამული უზრუნველყოფისგან ან ე.წ cryptojacking-ისგან, კრიპტოვალუტების ქურდობისგან. „თავდაპირველად ისე ჩანდა, თითქოს გააკეთა ის, რაც უნდა გაეკეთებინა - აღმოაჩინა კრიპტოების ქურდობის სხვადასხვა სკრიპტი... და გამოიყურებოდა, როგორც კარგი ინტერფეისი, რომელიც თავის მოვალეობას ასრულებს“ - განმარტავს Denley თავის ბლოგში. თუმცა ფასადს მიღმა ნათელი გახდა, რომ ბრაუზერის დამატება ითხოვდა პოპულარული საფულის ინტერფეისების, MyEtherWallet-ისა და (MEW) Blockchain.com-ის Private key-ებს. შემდგომში კი ისინი ჰაკერებთან იგზავნებოდა, რომელთაც შეეძლოთ საფულეები დაეცარიელებინათ. დამატება ჩადებული იყო ყალბი giveaway კამპანიის დასასრულს, თითქოს კრიპტო ბირჟა Huobi მომხმარებლებს სთავაზობდა Ethereum-ზე დაფუძნებულ ERC20 ტოკენებს. უცნობია, რა პერიოდის განმავლობაში იყო ზიანისმომტანი დამატება ხელმისაწვდომი Google Chrome-ის მომხმარებლებისთვის. ასეა თუ ისე, „ცუდი მოთამაშეები“, რომლებსაც მიზანში აქვთ ამოღებული სხვისი კუთვნილი კრიპტოვალუტები, სულ უფრო და უფრო უღირს მეთოდებს ეძებენ გამოუცდელი კრიპტო მფლობელების მოსატყუებლად. მიმდინარე კვირაში კრიპტო ჰაკინგის შესახებ ანგარიშში აღნიშნულია ჰაკერების სულ უფრო ფრთხილი მოქმედებები. თავად Google მწვავე კრიტიკის ქვეშ აღმოჩნდა, რადგან დიდი გულმოდგინება არ გამოუჩენია თებერვლის შემთხვევისას, როდესაც Google Play-დან წაშალა პოპულარული დეცენტრალიზებული აპლიკაციის - MetaMask-ის ყალბი ვერსია. როგორც Cointelegraph-ი იტყობინება, გასულ თვეში Electrum-ისა და MEW-ს საფულეების მფლობელებიც აღმოჩნდნენ ფიშინგური შეტევების პირისპირ Reddit-სა და Twitter-ზე გამოქვეყნებული პოსტებით. https://cointelegraph.com/news/google-deletes-crypto-malware-targeting-blockchaincom-myetherwallet-users

ჩინეთის ქალაქ Shēnzhèn-ის ხელისუფლებამ დაიწყო ახალი სისტემის ტესტირება, რომლის მიხედვითაც შესაძლებელია მეტროთი მგზავრობა ბილეთის გარეშე სახის ამოცნობის სისტემით. თუკი ეს ექსპერიმენტი წარმატებით ჩაივლის, უახლოეს რამოდენიმე წელიწადში ამგვარი სისტემა მთელ ქვეყანაში დაინერგება - წერს Tech in Asia. ექსპერიმენტული სისტემა საშუალებას იძლევა სრულიად გამოირიცხოს მეტროთი მგზავრობისთვის საჭირო საშუალებები - ბილეთები, ბარათები ან QR-კოდები. Shēnzhèn-ის მაცხოვრებლებს შეუძლიათ შეავსონ თავიანთი პერსონალური ანგარიში, საიდანაც მგზავრობის საფასური ავტომატურად ჩამოიჭრება მომხმარებლის სახის ამოცნობის შემდეგ. ექსპერიმენტის ხანგრძლივობის ზუსტი ვადები არ ხმაურდება. ჩინეთის ხელისუფლება არც იმას აკონკრეტებს, როდის დაიწყება ახალი სისტემის დანერგვა ქვეყნის მასშტაბით. 2018 წელს ჩინეთის ხელისუფლებამ 23 მლნ ადამიანს აუკრძალა ავია- და სარკინიგზო ბილეთების შეძენა. სააგენტო Associated Press-ის ინფორმაციით, რომელიც მან სახელისუფლებო ანგარიშის ასლით მიიღო, ამის მიზეზი გახდა ის, რომ ამ პირების „სოციალური რეიტინგი მეტისმეტად დაბალი იყო“. https://hightech.fm/2019/03/15/metro-face

კომპანია Huawei-მ ჩინეთში გამართულ ღონისძიებაზე, სადაც მოხდა სმარტფონ Nova 4e-ს წარდგენა, საზოგადოებას აგრეთვე გააცნო ორი ახალი სპორტული სამაჯური. ესენია Huawei Band 3 და მისი გაუმჯობესებული ვერსია - Band 3 Pro. ორივე მათგანს აქვს 0,95 დუიმიანი OLED პანელი გაფართოებით - 240 х 140 პიქსელი. ეკრანი მიმაგრებულია სამაჯურზე, რომელიც, მწარმოებლის თქმით, დამზადებულია ისეთი მასალისგან, რაც უზრუნველყოფს დიდ კომფორტს ხანგრძლივი გამოყენების დროს. პულსის გასაზომად მოწყობილობაში გამოყენებულია ტექნოლოგია TruSeen v3.0. მასში გაერთიანებულია ინფრაწითელი გამოსხივების მოწყობილობა ხელოვნური ინტელექტის ალგორითმით. როგორც Huawei ირწმუნება, გამოსხივება არანაირ უარყოფით გავლენას არ ახდენს მომხმარებელზე. ამავე დროს, ხელოვნურ ინტელექტს შეეძლება გამოავლინოს არითმია. Huawei Band 3 Pro-ს აქვს ტექნოლოგია TruSleep 2.0-ის მხარდაჭერა, რომელიც ახორციელებს ძილის მონიტორინგს. როგორც ცნობილია, ამ ნიმუშის ალგორითმები ჰარვარდის სამედიცინო სკოლის წარმომადგენლების მიერაა შექმნილი. TruSleep 2.0 ტექნოლოგიას შეუძლია გამოავლინოს უძილობის მიზეზები და მომხმარებელს მისცეს რეკომენდაციები ძილის გაუმჯობესებისთვის. გარდა ამისა, Pro მოდელს აქვს NFC ჩიპი და GPS მოდული. სამწუხაროდ, როგორც ჩანს, მასში გათვალისწინებული არ არის Google Play-ს მხარდაჭერა. წარდგენაზე კომპანიამ მხოლოდ Huawei Play ახსენა. ბატარეის მოცულობა ჯერჯერობით არ ხმაურდება. ამ მხრივ Huawei დაადგა Apple-ის გზას. ნათქვამი იყო მხოლოდ ის, რომ სრულად დატენილი ბატარეა ჩვეულებრივი გამოყენებისას საკმარისია თითქმის ორი კვირა მუშაობისთვის. იმ შემთხვევაში კი, თუკი მომხმარებელი უწყვეტად გამოიყენებს გულისცემის სიხშირის მზომს, ავტონომიურობა თითქმის ორჯერ მცირდება. ჩართული GPS-ით ვარჯიშის დროს სპორტული სამაჯური (Pro ვერსია) დაახლოებით 7 საათს მუშაობს. Huawei Band 3 წარმოდგენილი იქნება ყვითელ, თეთრ, ვარდისფერ და იისფერ ვარიანტებად. მისი ფასი დაახლოებით 40 დოლარია. Pro მოდელები კი გამოვა შავ, თეთრ და ლურჯ ვარიანტებად და მათი ფასი 60 დოლარს შეადგენს. https://overclockers.ru/blog/mpanasovsky/show/24962/sportivnye-braslety-huawei-band-3-i-band-3-pro-predstavleny-oficialno

დაპირებისამებრ, ილონ მასკმა წარადგინა ახალი ელექტრომობილი - კომპაქტური ქროსოვერი Model Y. იგი აწყობილია იმავე პლატფორმაზე, რაზეც „ბიუჯეტური“ სედანი Model 3 და მასზე არც ისე ძვირი ღირს, ყოველ შემთხვევაში, მისი საბაზისო მოდელი. მომხმარებლებს აქვთ საშუალება - არჩევანი გააკეთონ ახალი ელექტრომობილის ოთხ ვერსიაში: Standart Range, Long Range, Dual Motor AWD და Perfomance. საბაზისო მოდელი (Standart Range) 39 ათასი დოლარი ღირს. ტოპ-ვერსიის ფასი კი 60 ათას დოლარს აღწევს (ფუნქციებისა და ოფციების ჩათვლით). გამოცხადდა, რომ Standart Range მოდიფიკაციის წარმოება 2021 წელს დაიწყება. ეს ვერსია წარმოდგენილი იქნება 370 კმ გავლის მარაგით. Long Range მოდელის ფასი 42 700 დოლარიდან იწყება, მას შეუძლია 482 კილომეტრის გავლა ერთ დამუხტვაზე და იგი მომდევნო წელს გამოვა. ახალ მოდელზე წინასწარი შეკვეთების მიღება უკვე დაწყებულია. 3 ათასი დოლარის ღირებულების ერთ-ერთი ოფციით მყიდველს შეეძლება ელექტრომობილი აღჭურვოს დამატებით სავარძლებით, რომელთა რიცხვმა შესაძლოა შვიდს მიაღწიოს. ილონ მასკმა განაცხადა, რომ Model Y-ის ახალი წარმადობის ხაზები მიმდინარე წელსვე მზად იქნება. თუმცა თუ გავითვალსიწინებთ წინა გამოცდილებებს, ზუსტი თარიღი კითხვის ნიშნის ქვეშ დგება. კომპანია თვლის, რომ ახალი ქროსოვერი კარგად გაიყიდება. იანვარში ინვესტორებთან საუბრისას მასკმა განაცხადა, რომ დარწმუნებულია - კომპაქტური ქროსოვერი Model 3-ზე მოთხოვნადი იქნება. თუკი გავითვალისწინებთ აშშ-ის სტატისტიკას ჯიპის ტიპის ავტომობილების გაყიდვების შესახებ, ამგვარი მოლოდინი სავსებით რეალურია: ამერიკელებს ზოგადად პიკაპები და ჯიპები უფრო მოსწონთ, ვიდრე ჩვეულებრივი სედანი. Model Y-ის პირველი საპილოტე ნიმუში კალიფორნიაში მდებარე Gigafactory 1-ის კონვეირიდან გამოვა. მოგვიანებით კი Tesla-ს კომპაქტური ქროსოვერების გამოსვლა განხორციელდება ჩინეთის საწარმოში, რომელიც სახელად მიიღებს Gigafactory 3-ს. Model Y-ს აქვს ორი ელექტრო ძრავი და შემოთავაზებული იქნება სხვადასხვა მოცულობის აკუმულატორების კომპლექტაციები. 100 კმ/სთ სიჩქარის განვითარებისთვის საჭიროა 3,5 წამი, მაქსიმალური სიჩქარეა 240 კმ/სთ. ორძრავიანი Model Y Long Range ვერსიის მიერ 100 კმ/სთ სიჩქარე მიიღწევა 4,8 წამში, ერთძრავიანი მოდელით კი - 5,5 წამში. ქროსოვერს ტრადიციული გვერდითი სარკეები აქვს კამერების ნაცვლად. ასევე, Tesla-ს ინჟინრებმა გადაწყვიტეს უარი ეთქვათ საფირმო უკანა კარის გამოყენებაზე, რომელსაც კომპანია „შევარდენის ფრთებს“ უწოდებს. ილონ მასკის თქმით, ამგვარი გადაწყვეტილება მნიშვნელოვნად ართულებს ავტომობილის წარმოების პროცესს და ამასთანავე ზრდის მის საბოლოო ფასს. Model Y-ის აეროდინამიკური წინააღმდეგობის კოეფიციენტია 0,32. ელექტრომობილს აქვს პანორამული სახურავი. სალონში განთავსებულია 15-დუიმიანი დისპლეი, რომლითაც იმართება ელექტრომობილის ფუნქციათა უმეტესობა. https://hi-news.ru/auto/elektricheskij-krossover-tesla-model-y-oficialno-predstavlen.html