დიდი ხნის განმავლობაში ითვლებოდა, რომ Zen 3 არქიტექტურის ბაზაზე აგებული AMD Ryzen 4000 პროცესორები გამოვიდოდა 2020 წლის ბოლოს-2021 წლის დასაწყისში და დაფუძნებული იქნებოდა TSMC-ის გაუმჯობესებულ 7-ნანომეტრიან ტექნოპროცესზე. ცოტა ხნის წინ გახდა ცნობილი, რომ Huawei ვეღარ მიიღებს ტაივანური კომპანიის ახალ ჩიპებს, შესაბამისად გამოთავისუფლდება საწარმოო ძალის უზარმაზარი წილი. უკანასკნელი ცნობებით, სწორედ მას დაიკავებს AMD.
სიახლეები დაუჯერებელია: ადრე მიიჩნეოდა, რომ Ryzen 4000 სერიის დესკტოპ პროცესორები წარმოდგენილი იქნებოდნენ 15-20%-იანი IPC წარმადობის ზრდით, ასევე არქიტექტურული ოპტიმიზაციით 7-ნანომეტრიანი ტექნოპროცესის ფარგლებში. თუმცა ის ფაქტი, რომ 7-ნანომეტრიანი ტექნოლოგიის ნაცვლად არჩეული იქნება 5-ნანომეტრიანი ტექნოპროცესი, ნიშნავს წარმადობის დამატებით ზრდას.
ამ დრომდე ვრცელდებოდა ცნობები, რომ გაუმჯობესებული 7-ნანომეტრიანი ტექნოპროცესის წყალობით AMD შეძლებდა დამატებით +200-300 მეგაჰერცის უზრუნველყოფას, რაც ახალ Ryzen 4000 სერიას ხელს შეუწყობდა მეათე თაობის Intel Core პროცესორებთან კონკურენციის გაწევაში. 5-ნანომეტრიან ტექნოპროცესზე გადასვლა კი იძლევა უფრო მაღალი სიხშირებისა და არნახული ენერგოეფექტურობის პერსპექტივას.
ცნობილია, რომ ახალი ჩიპების ანონსი სექტემბერში შედგება, მათი მასობრივი გაყიდვა კი 2021 წლიდან დაიწყება. როგორც ჩანს, ეს იქნება ყველაზე ძლიერი ხაზი ბოლო ათწლეულის განმავლობაში, რომელსაც აქვს პოტენციალი - „წითლებს“ ლიდერობა მოუპოვოს პროცესორების სეგმენტში.
https://bit.ly/2M7Yw5f