Magdalena

კომპანია Gigabyte-მა წარადგინა GeForce RTX 3090 Aorus Master გრაფიკული ამაჩქარებლის ახალი ვერსია. ამ ვიდეო დაფის მთავარი მახასიათებელია ჰაერით გაგრილების უზარმაზარი ოთხსლოტიანი სისტემა. GeForce RTX 3090 Aorus Master დაფის საფუძვლად გამოყენებულია გრაფიკული პროცესორი NVIDIA GA102 - 10 496 CUDA ბირთვით. ვიდეო დაფას აქვს GDDR6X სტანდარტის 24 გბ ვიდეომეხსიერება. Gigabyte-ის განცხადებით, GPU-ის სიხშირე Boost-რეჟიმში არის 1785 მჰც. რეალურად, ამ გრაფიკულ პროცესორის აჩქარების რეალური პოტენციალი გაცილებით მაღალია მისი გაგრილების სისტემის ზომის გათვალისწინებით, მაგრამ, როგორც ჩანს, იგი შეზღუდული იყო კვების ნაკლებობით. ამით შეგვიძლია ავხსნათ მესამე 8-პინიანი კონექტორის გამოჩენა დამატებითი ენერგიის მისაღებად ვიდეო დაფის ახალ ვერსიაში, რაც ამ გრაფიკული ამაჩქარებლის თავდაპირველ ვერსიაში არ არის. გარდა ამისა, კომპანიამ განაცხადა, რომ საჭიროა უფრო მძლავრი კვების ბლოკის გამოყენება: თუკი ორიგინალი მოდელისთვის Gigabyte გირჩევთ 750-ვატიან კვების ბლოკს, განახლებული მოდელისთვის რეკომენდებულია 850 ვატი სიმძლავრის კვების ბლოკი. GeForce RTX 3090 Aorus Master-ის ზომები იგივე რჩება - 319 × 140 × 70 მმ. კომპანია არ მიუთითებს ვიდეო ბარათის წონაზე. ასევე, უცვლელი დარჩა გარე ინტერფეისების ნაკრები: ხელმისაწვდომია სამი DisplayPort 1.4a კონექტორი, ორი HDMI 2.1 და ერთი დამატებითი HDMI 2.0, რომელიც განთავსებულია ორ HDMI-ს შორის. როგორც ზემოთ აღვნიშნეთ, GeForce RTX 3090 Aorus Master-ის ერთ-ერთი მთავარი მახასიათებელია გაგრილების გიგანტური სისტემა, რომელიც მოიცავს უზარმაზარ რადიატორს და სამ ქულერს. ორი გვერდითი Wind Claw-ს ზომაა 115 მმ, ცენტრალურისა - 100 მმ. ამ უკანასკნელის განსაკუთრებულობა იმაში გამოიხატება, რომ იგი დანარჩენი ორის საპირისპირო მიმართულებით ბრუნავს ჰაერის ნაკადის უფრო ეფექტურად მიწოდების უზრუნველსაყოფად. რადიატორის საფუძვლად გამოყენებულია სპილენძის დიდი პლატფორმა, რომელიც გრაფიკული პროცესორიდან და მეხსიერების მოდულებიდან გამომავალი სითბოს გადაცემას უწყობს ხელს. პლატფორმა უერთდება ამაორთქლებელ კამერას, რომელზეც მიმაგრებულია ხუთი თბოგამტარი მილი. გარე ესთეტიკური თვალსაზრისით Aorus Master დაფარულია გლუვი, შავი გარსით, პრიალა შავი და ვერცხლისფერი ჩანართებით. RGB განათების სისტემა ასევე არის ჩაშენებული გარსში, ხოლო ვიდეო დაფის გვერდით ნაწილზე განთავსებულია თხევადკრისტალური დისპლეი. დისპლეიზე აისახება სხვადასხვა სასარგებლო ინფორმაცია ვიდეო დაფის მდგომარეობის შესახებ. გარდა ამისა, მას შეუძლია ასახოს ფოტოები, ტექსტი და GIF-გამოსახულება. GeForce RTX 3090 Aorus Master ვიდეო დაფის განახლებული ვერსიის გაყიდვაში გამოსვლის თარიღი კომპანიას ჯერ არ გამოუცხადებია. http://bit.ly/2M3JD7G

Hyundai-მ წარადგინა DAL-e, ახალი რობოტი-კონსულტანტი მომხმარებლების მომსახურებისთვის, რომელიც საპილოტე პროექტის ფარგლებში ტესტირებას გაივლის სეულში არსებულ Hyundai Motor-ის შოურუმში. კომპანიის განცხადებით DAL-e რობოტი შეიძლება გამოყენებულ იქნას იმ მომხმარებლების მოსამსახურებლად, რომელთაც სურთ შეამცირონ ხალხთან კონტაქტი COVID-19-ის პანდემიის დროს. რობოტ DAL-e-ს სახელი გახლავთ აბრევიატურა - „Drive you, Assist you, Link with you-experience“ (გაგიძღვებათ, დაგეხმარებათ, დაუკავშირდება თქვენს გამოცდილებას). ცნობილია, რომ რობოტი აღჭურვილია "უახლესი ხელოვნური ინტელექტით", რომელიც შექმნილია მომხმარებლების მეგობრული გამოცდილების უზრუნველსაყოფად და ენის დამუშავებისთვის იყენებს მანქანულ სწავლებას. მას შეუძლია სახეების ამოცნობა, ასევე საუბრის "გაგება", რაც მას საშუალებას მისცემს დაუკავშირდეს პოტენციურ კლიენტებს. Hyundai-ს თანახმად, რობოტს შეუძლია გაიგოს, როდესაც ვინმე შემოვიდა შოურუმში ნიღბის გარეშე და ურჩევს მას ატაროს. DAL-e-ს ასევე შეუძლია მოძრაობა ოთხი, ყველა მიმართულებით მოძრავი ბორბლის წყალობით, იგი მომხმარებლებს გაუძღვება შოურუმის ტერიტორიაზე გადაადგილებისას. მის ზედა ნაწილში განთავსებულია სენსორული ეკრანი, სადაც შესაძლებელია დამატებითი ინფორმაციის მიღება შოურუმში შემოთავაზებული მანქანების შესახებ. DAL-e-ს ასევე შეუძლია უსადენოდ დაუკავშირდეს დიდ ეკრანს კონკრეტული მოდელის ან გამოყენებული ტექნოლოგიის შესახებ მოცემული ინფორმაციის წარდგენისას და ვიზიტორებსაც სთხოვს მასთან სელფის გადაღებას. თუ საპილოტე პროექტი წარმატებული აღმოჩნდება, DAL-e რობოტები გამოჩნდება Hyundai-სა და Kia-ს სხვა შოურუმებშიც. http://bit.ly/36cK7zo

რეგულირებამ Bitcoin-ი უფრო მიმზიდველი და უსაფრთხო გახადა ინვესტირებისთვის. ამის შესახებ საინვესტიციო კომპანია SkyBridge Capital-ის ხელმძღვანელმა ენტონი სკარამუჩიმ CNN Business-ის საკუთარ რუბრიკაში დაწერა. მისი აზრით, ხელისუფლებამ აღმოფხვრა პირველ კრიპტოვალუტასთან დაკავშირებული მრავალი რისკი. ”უფრო მკაცრმა რეგულირებამ, უკეთესმა ინფრასტრუქტურამ და ფინანსური ინსტიტუტების ხელმისაწვდომობამ, რომლებიც ინვესტორთა ფულს ინახავენ, Bitcoin-ში ინვესტიციის გაკეთება ისეთივე უსაფრთხო გახადა, როგორც ობლიგაციებსა და ოქროში”, - განაცხადა სკარამუჩიმ. SkyBridge Capital-ის ოპერაციების მთავარმა დირექტორმა ბრეტ მესინგმა დაამატა, რომ ციფრული აქტივი გრძელვადიანი ინვესტორებისთვის სიცოცხლისუნარიანი ვარიანტი გახდა. პირველი კრიპტოვალუტის ფლობა ახლა ნაკლებად სარისკოა, ვიდრე ეს იყო რამდენიმე წლის წინ, აცხადებენ სკარამუჩი და მესინგი. ადრე SkyBridge Capital-მა 25 მილიონი აშშ დოლარი ჩადო Bitcoin-ში. დეკემბრის ბოლოს კომპანიის ინვესტიციებმა პირველ კრიპტოვალუტაში 182 მილიონ აშშ დოლარს მიაღწია. იანვარში ინვესტიციურმა კომპანიამ 310 მილიონი აშშ დოლარის Bitcoin-ფონდი აამოქმედა. შეგახსენებთ, SkyBridge Capital-მა განაცხადა, რომ მსხვილი ინვესტორები ციფრული ოქროს კურსს 500 ათას აშშ დოლარზე ზემოთ უბიძგებენ. http://bit.ly/2NAgscT

როდესაც საქმე ეხება Samsung-ის დამკვეთებს საკონტრაქტო წარმოების არეალში, NVIDIA და Qualcomm, როგორც წესი, ჩრდილავენ Tesla-ს, რომელიც კორეელი კონტრაქტორისგან იღებს 14-ნანომეტრიან FSD ნეიროპროცესორებს საკუთარი ავტოპილოტირების სისტემებისთვის. კორეული მედიის ცნობით, ორი კომპანია მალე გააფართოვებს თანამშრომლობას, Samsung დაიწყებს 5-ნანომეტრიანი ჩიპების წარმოებას Tesla-სთვის. მიიჩნევა, რომ Tesla მალე მიიღებს Samsung-ისგან 5-ნანომეტრიანი ჩიპების ნიმუშებს, რაც ელექტრომობილების მულტიმედიური კომპლექსების საფუძველს შექმნის. Tesla წარსულში იყენებდა Nvidia Tegra პროცესორებს ავტოპილოტისთვის, თუმცა 2019 წლის ბოლოს დაიწყო საკუთარი ჩიპების წარმოებაც. Nvidia Tegra - სისტემების თაობა კრისტალზე (SoC — System-on-a-Chip) შემუშავებულია კომპანია NVIDIA-ს მიერ, როგორც პლატფორმა ისეთი მობილური ინტერნეტ-ნივთების წარმოებისთვის (Mobile Internet Device, MID), როგორებიცაა სმარტფონები, სმარტბუკები, კომუნიკატორები და ა,შ. Tegra კრისტალში გაერთიანებულია ARM-პროცესორი, გრაფიკული პროცესორი, მედია- და DSP-პროცესორები, მეხსიერებისა და პერიფერიული მოწყობილობების კონტროლერები, თანაც ამავე დროს ხასიათდება დაბალი ენერგომოხმარებით. Samsung-ი გეგმავს მანქანათმშენებელ კომპანიებს შესთავაზოს საკუთარი წარმოების პროცესორები, ასე რომ, რა კატეგორიაში შევა Tesla-ს ახალი პროდუქტები, ჯერჯერობით არ არის დაკონკრეტებული. http://bit.ly/39cBF4Y

კაცობრიობის მნიშვნელოვანი ნაწილი ცდილობს ამოწურვადი ენერგიის წყაროების განახლებადი წყაროებით ჩანაცვლებას. კორეელმა მეცნიერებმა მცირე ნაბიჯი გადადგეს ამ გზაზე - მათ შექმნეს პირველი, მათი თქმით, სრულიად გამჭვირვალე მზის ელემენტი. ახალ კვლევაში პროფესორი Joondong Kim აღწერს მეთოდს, რომელიც ეხება მზის ელემენტის ჰეტეროგადამყვანი ფენის ნოვატორულ ტექნიკას. კვლევების თანახმად, ნიკელის ოქსიდისა და ტიტანის დიოქსიდის ნახევარგამტარების კომბინაციამ შექმნა ეფექტური და სრულიად გამჭვირვალე მზის ელემენტი. ტიტანის დიოქსიდი (TiO2) ეფექტური ნახევარგამტარია, იგი ამჟამად გამოიყენება მზის ბატარეების ტექნოლოგიაში. იგი არის ეფექტური, არატოქსიკური და ეკოლოგიურად სუფთა და თანაც უხვად მოიპოვება დედამიწაზე. ნიკელის ოქსიდი (NiO) არის ნახევარგამტარი მაღალი ოპტიკური გამჭვირვალობის მახასიათებლებით. ამ ორი ელემენტის კომბინაციით წარმოიქმნება მზის გამჭვირვალე პანელები, რომლებიც მდგრადია და მარტივია გამოსაყენებლად. მზის ენერგია (ქარსა და წყალთან ერთად) დიდ იმედს იძლევა განახლებადი ენერგიის ენერგიაზე გადასვლის საკითხში, ამიტომ ამ სფეროში მრავალი მეცნიერი მუშაობს. ბოლო წლებში მზის ენერგია გახდა უფრო ხელმისაწვდომი და ეკოლოგიურად სუფთა, ულტრაიისფერი გამოსხივების ელექტროენერგიად გადაქცევის კოეფიციენტი იზრდება. ამასთან, თანამედროვე მზის პანელების ყოველდღიური გამოყენება მათი გაუმჭვირვალობის გამო შეზღუდულია. მზის პანელების ნახვა შესაძლებელია მხოლოდ სახურავებზე, შორეულ ადგილებში და საზოგადოების თვალისგან მოშორებით. კორეელ პროფესორს დიდი იმედი აქვს თავისი კვლევის - მეცნიერის აზრით, გამჭვირვალე ფოტოელექტრონული უჯრედების უნიკალური თვისებები მათი გამოყენების ფართო სპექტრის ხსნის. მომავალში სრულიად გამჭვირვალე პანელები გამოყენებული იქნება ფანჯრების კონსტრუქციასა და მობილურ ტელეფონებშიც კი. თუმცა ჯერჯერობით კომერციალიზაციაზე საუბარი ნაადრევია, რადგან შესწავლილი პანელების ენერგოეფექტურობის მაჩვენებელმა 2.1% შეადგინა. http://bit.ly/3iQO8yw

Global Times-ის ცნობით, ჩინეთის ძირითადი ქალაქები აპირებენ მხარი დაუჭირონ ქვეყნის სუვერენული ციფრული ვალუტის (DCEP) ტესტირებას. პეკინის მერმა განაცხადა, რომ დედაქალაქი დააჩქარებს ფინანსური ტექნოლოგიებისთვის განკუთვნილი ინოვაციური სადემონსტრაციო ზონების მშენებლობას 2021 წელს და ხელს შეუწყობს DCEP-ის საპილოტე გამოყენებას. შანხაის მერმა მუნიციპალური ხელისუფლების მუშაობის ანგარიშთან დაკავშირებით აღნიშნა, რომ იგი გააგრძელებს ფინანსური გახსნილობის პოლიტიკას და ხელს შეუწყობს ციფრული იუანის განვითარებას. Guangdong-ის პროვინციის გუბერნატორმა პირობა დადო, რომ ხელისუფლება ხელს შეუწყობს Shenzhen-ის DCEP-ის ინოვაციურ საპილოტე ზონად გადაქცევას. 20 იანვარს ქალაქმა დაიწყო ციფრული იუანის ტესტირების მესამე რაუნდი. 2020 წლის ოქტომბერში შენჟენის ხელისუფლებამ ხალხს ლატარიის საშუალებით დაურიგა 50 ათასი წითელი კონვერტი თითო 200 ციფრული იუანით. იანვრის პირველ ნახევარში ჩატარებული მეორე ექსპერიმენტის დროს ორჯერ მეტი ანალოგიური ლოტი გადანაწილდა. საქალაქო ციფრული ვალუტის ტესტირების მესამე ფაზაში მონაწილეობენ ლუნჰუას რაიონის მაცხოვრებლები, რომელთა შორის 100,000 "წითელი კონვერტი" გადანაწილდა ჯამში 20 მილიონი იუანით. შეგახსენებთ, რომ DCEP-ის მსგავსი მასობრივი ტესტირება ასევე ჩატარდა სუჟოუში. http://bit.ly/39drcWP

Intel-ის გენერალურ დირექტორ რობერტ სუონს (Robert Swan) ჯერ კიდევ არ გადაუცია თავისი უფლება-მოსილება მემკვიდრისთვის, ამიტომ კვარტალურ კონფერენციაზე იგი იძულებული გახდა კომენტარი გაეკეთებინა ადრეულ განცხადებებზე, რამაც ღონისძიებაზე მოწვეული ანალიტიკოსები დააინტერესა. ცოტა ხნის წინანდელ ინტერვიუში სუონმა მიანიშნა, რომ Intel-ს შეუძლია ლიცენზიით გამოიყენოს გარე მხარის ლითოგრაფიული ტექნოლოგიები. თავდაპირველად პრესის წარმომადგენლებმა ეს სიტყვები განმარტეს, როგორც Intel-ის მზადყოფნა სხვა კომპანიების ტექნოლოგიური პროცესის მთლიანად გადასატანად თავის კონვეირზე. რობერტ სუონს გასულ კვირას მოუწია ახსნა, რომ იგი გულისხმობდა ბაზრის სხვა მონაწილეებთან უფრო ფართო თანამშრომლობას. კომპანია მზადაა ურთიერთსასარგებლო საფუძველზე გაიცვალოს ინდივიდუალური ნამუშევრები, ტექნოლოგიები, სხვადასხვა სახის ინსტრუმენტი. თუ კონკურენტებს რაიმე უკეთ გამოუვათ, Intel-ი უყოყმანოდ სთხოვს დახმარებას. ამავდროულად, კომპანია იმედოვნებს, რომ რამეს თავის მხრიდანაც გაუზიარებს პარტნიორებს. ამ თვალსაზრისით კორპორატიული პოლიტიკა უფრო ღია უნდა გახდეს. http://bit.ly/39blNPZ

IPhone 12-ის გამოშვების შემდეგ გასული წლის ოქტომბერში Apple-მა დაადასტურა, რომ ახალმა სმარტფონებმა შეიძლება გამოიწვიოს ელექტრომაგნიტური ხარვეზები ისეთ სამედიცინო მოწყობილობებში, როგორიცაა კარდიოსტიმულატორები და დეფიბრილატორები. ამჟამად კომპანიის ვებ-გვერდზე განთავსებულ Apple-ის დახმარების დოკუმენტში ამ საკითხთან დაკავშირებით მეტი ინფორმაცია გამოჩნდა. ”ისეთი სამედიცინო მოწყობილობები, როგორებიცაა იმპლანტირებული კარდიოსტიმულატორები და დეფიბრილატორები, შეიძლება შეიცავდეს სენსორებს, რომლებიც ახლო მანძილზე რეაგირებენ მაგნიტურ და რადიოგამოსხივებაზე. ამ მოწყობილობებთან პოტენციური ურთიერთქმედების თავიდან ასაცილებლად შეინახეთ iPhone და MagSafe აქსესუარები სამედიცინო მოწყობილობებისგან უსაფრთხო მანძილზე დაშორებით (15 სმ სტანდარტული გამოყენების დროს და 30 სმ - უსადენო დამუხტვის შემთხვევაში). უფრო კონკრეტული რეკომენდაციების მისაღებად უნდა გაიაროთ კონსულტაცია თქვენს მკურნალ ექიმსა და მოწყობილობის მწარმოებელთან ”, - ნათქვამია Apple-ის განცხადებაში. მიუხედავად იმისა, რომ ”MagSafe აქსესუარები” აღნიშნულია დამხმარე დოკუმენტში, Apple ხაზს უსვამს, რომ ისეთმა აქსესუარებმა, როგორებიცაა MagSafe დამტენი და MagSafe Duo უსადენო დამტენი, ასევე შეიძლება ხელი შეუშალოს სამედიცინო მოწყობილობებს მუშაობაში. ”ყველა MagSafe აქსესუარი (ცალკე იყიდება) შეიცავს მაგნიტს, ხოლო MagSafe და MagSafe Duo დამტენები შეიცავს რადიომოდულებს. ამ მაგნიტებმა და ელექტრომაგნიტურმა ველებმა შეიძლება ხელი შეუშალონ სამედიცინო მოწყობილობების ფუნქციონირებას “, - გვაფრთხილებს Apple. შეგახსენებთ, რომ მიმდინარე თვის დასაწყისში Heart Rhythm Journal-ში გამოქვეყნდა ამერიკელი ექიმების მიერ ჩატარებული კვლევის შედეგები, რომლის თანახმად ახალ iPhone 12-ს შეუძლია ხელი შეუშალოს იმპლანტირებადი სამედიცინო მოწყობილობების მუშაობას და შექმნას ელექტრომაგნიტური ხარვეზები ფუნქციონირების დროს. http://bit.ly/2KIuVlQ

ამერიკული უმსხვილესი კრიპტო ბირჟა Coinbase-ის ვერიფიცირებული მომხმარებლების რაოდენობამ 43 მილიონს გადააჭარბა. სავაჭრო პლატფორმაზე ციფრული აქტივების საერთო ღირებულება აღემატება 90 მილიარდ აშშ დოლარს. ეს ინფორმაცია მითითებულია კომპანიის ვებ-გვერდზე. განახლებულ განყოფილებაში ასევე ნათქვამია, რომ პლატფორმა ხელმისაწვდომია მსოფლიოს 100-ზე მეტ ქვეყანაში. Coinbase-ში დასაქმებულია 1200-ზე მეტი ადამიანი. 18 დეკემბერს Coinbase-მა შეიტანა განცხადება IPO-ს შესახებ. Messari-ს ანალიტიკოსებმა კომპანიის პოტენციური კაპიტალიზაცია საჯარო სტატუსის მოპოვების შემდეგ 28 მილიარდ აშშ დოლარად შეაფასეს. დერივატივების ბირჟა FTX-მა გამოუშვა ფიუჩერსული კონტრაქტები Coinbase Inc-ის სამომავლო აქციებზე. ფიუჩერსების კოტირებები Coinbase-ის აქციების სამომავლო ფასზე. წყარო: The Block, FTX. Polychain Capital-ის დამფუძნებელმა ოლაფ კარლსონ-ვიმ დარწმუნებულობა გამოხატა, რომ უოლ სტრიტის ანალიტიკოსები "მეტად აღფრთოვანებული დარჩებიან Coinbase-ის ფინანსური მაჩვენებლებით". ”ეს მართლაც მძლავრი ფინანსური მომსახურების ბიზნესია, რომელსაც ასობით მილიონი დოლარის შემოსავალი მოაქვს”, - თქვა კარლსონ-ვიმ The Scoop პოდკასტის ბოლო ეპიზოდში. იანვრის შემდეგ ბირჟა Coinbase-ის ვაჭრობის ბრუნვამ 83 მლრდ აშშ დოლარს გადააჭარბა. წყარო: The Block, Cryptocompare. ახლახანს Coinbase-მა აქციონერებს აცნობა აქციების მეორადის ბაზრის სამომავლო ამოქმედების შესახებ, აქციების კოტირება ხდება Nasdaq Private Market-ზე. ”ეს ნაბიჯი საშუალებას მისცემს ამჟამინდელ და ყოფილ თანამშრომლებს, რომლებიც კომპანიის წილს ფლობენ, გაყიდონ აქციები”, -განაცხადა ფრენკ ჩაპარრომ, The Block- ის ანალიტიკოსმა. შეგახსენებთ, რომ Coinbase-მა ახლახანს შეიძინა Bison Trails, ინფრასტრუქტურული ბლოკჩეინ-გადაწყვეტილებების მომწოდებელი. მანამდე ცოტა ხნით ადრე კომპანიამ შეიძინა ინსტიტუციონალური სტარტაპი Routefire და ჩადო ინვესტიცია მაინინგისთვის განკუთვნილი პროგრამული უზრუნველყოფის შემქმნელ Titan-ში. http://bit.ly/3iFEGOl

სამომხმარებლო გრაფიკული ადაპტერების ბაზარზე ვითარება კვლავ მწვავეა: მაინინგის ბუმი საცალო ქსელებში ვიდეო ადაპტერების დეფიციტს და ფასების შემდგომ ზრდას იწვევს, რაც ”ჩვეულებრივი” მომხმარებლებისთვის არც თუ ისე სასიამოვნოა. ამიტომ NVIDIA-მ გადაწყვიტა გავლენა მოახდინოს არსებულ ვითარებაზე ონლაინ მაღაზიებისთვის რეკომენდაციების მიცემით ფასების ფორმირების ზოგიერთი ასპექტის შესახებ. VideoCardz-ის თანახმად, საუბარი ეხება ცოტა ხნის წინ დაანონსებულ საშუალო დიაპაზონის მოდელ GeForce RTX 3060-ზე. წყაროს თანახმად, NVIDIA ცდილობს საცალო მოვაჭრეები დაავალდებულოს გაყიდონ GeForce RTX 3060 მოდელები რეკომენდებული ღირებულებით, როდესაც ახალი პროდუქტები გამოჩნდება გაყიდვაში. თუმცა, კითხვა - ეთანხმებიან თუ არა ონლაინ მაღაზიები ასეთ პირობებს და რა ვითარება იქნება მომავალში ფასებზე - უპასუხოდ რჩება, რადგან NVIDIA-ს წარმომადგენლებს არ აქვთ იურიდიული საფუძველი ასეთი მოთხოვნებისთვის, აღნიშნავს რესურსი. გარდა ამისა, ცნობილი გახდა GeForce RTX 3060 დაფის პირველი ნიმუშების პრესისა და გავლენიანი პირების ხელში გამოჩენის დროის შესახებ - საიტის თანახმად, ეს ღონისძიება 19 თებერვალს გაიმართება, ამიტომ ოფიციალური გამოშვება სავარაუდოდ ანონსიდან ერთ კვირაში უნდა იყოს მოსალოდნელი. შეგახსენებთ, რომ GeForce RTX 3060 ვიდეო ადაპტერი დაფუძნებულია GA106-300 გრაფიკულ პროცესორზე, რომელსაც აქვს 3584 აქტიური CUDA ბირთვი, ასევე 112 ტენსორული და 28 RT ბირთვი, ხასიათდება 1320 და 1777 მეგაჰერცი სიხშირით საბაზისო და Boost რეჟიმში, შესაბამისად. ახალ დაფას აქვს 12 გბ GDDR6 ვიდეო მეხსიერება ეფექტური 15 გჰც სიხშირითა და 192-ბიტიანი სალტით, TGP-ის დონე 170 ვატს შეადგენს. ახალი გრაფიკული ადაპტერის სარეკომენდაციო ფასი იწყება 329 აშშ დოლარიდან. http://bit.ly/364Up4b

ილონ მასკი ცოტა ხნის წინ საცხოვრებლად ტეხასში გადასახლდა, სადაც ახალი კოსმოსური პორტი და ბატარეების ქარხანა შენდება. იგი ასევე აპირებს ბუნებრივი აირის მოპოვებას. SpaceX აპირებს ჭაბურღილების ამოთხრას კომპანიის გამშვები პუნქტის მახლობლად ბოკა-ჩიკაში. ამის შესახებ ცნობილი გახდა ტეხასის რკინიგზის კომისიის მოსმენაზე, სახელმწიფო ენერგეტიკის მარეგულირებელ სხდომაზე. საქმე ჯერ არ დაწყებულა SpaceX-ის შვილობილი კომპანია Lone Star Mineral Development-ის და სხვა ენერგეტიკული კომპანიის დაპირისპირების გამო. Lone Star-ის წარმომადგენელმა იურისტმა ტიმ ჯორჯმა (Tim George) მოსმენაზე განაცხადა, რომ SpaceX გეგმავს მიწიდან მოპოვებული მეთანის გამოყენებას სარაკეტო ობიექტებში ოპერაციებისათვის. ჯერჯერობით გაუგებარია ზუსტად რისთვის გამოიყენებს გაზს. ცნობილია ის, რომ SpaceX გეგმავს საწვავად გამოიყენოს გაცივებული თხევადი მეთანი და თხევადი ჟანგბადი Raptor ძრავებში. Starship და Super Heavy რაკეტებს ტესტირება უტარდებათ ბოკა-ჩიკაში და ამ პლატფორმიდან იგეგმება ორბიტალური ფრენები. დეკემბერში ილონ მასკმა განაცხადა, რომ ტეხასში გადავიდა, რათა ყურადღება გაამახვილოს მრავალჯერადი გამოყენების SpaceX Starship-სა და Tesla-ს ახალ Gigafactory-ზე, რომელიც ოსტინთან ახლოს შენდება. 2020 წელს დაარსებულმა კომპანია Lone Star-მა გამოისყიდა 326 ჰექატრი ფართობი ჰიუსტონში ბაზირებულ კომპანია Sanchez Energy-სგან, რომელსაც გაკოტრებასთან დაკავშირებული პროცედურების შემდეგ სახელად ეწოდა Mesquite Energy. გარიგების ფინანსური პირობები არ გახმაურებულა, მაგრამ SpaceX-ის შვილობილი კომპანია იურიდიული დავის სახის დაბრკოლებას შეხვდა Dallas Petroleum Group-თან, რომელიც საკუთრების უფლებას აცხადებს რამდენიმე უმოქმედო ჭრილზე, რომლებიც იმავე მიწაზეა განთავსებული. ილონ მასკის კომპანია მიიჩნევს, რომ სასამართლოში Dallas Petroleum-ის მიერ შეტანილი საჩივარი მხოლოდ SpaceX-ისგან ფულის გამოძალვას ისახავს მიზნად. Dallas Petroleum უარყოფს ბრალდებებს და აცხადებს, რომ ფლობს როგორც ჭაბურღილებს, ისე მათ მიმდებარე 10 ჰექტარს. http://bit.ly/3cdmiLD

კონფიდენციალურობაზე ორიენტირებულ ბრაუზერ Brave-ის დეველოპერებმა განახორციელეს IPFS („პლანეტათშორისი ფაილების სისტემა) პროტოკოლის მხარდაჭერის ინტეგრირება. ახალ 1.19 ვერსიაში ინტეგრაციის წყალობით Brave-ის მომხმარებლები კონტენტზე წვდომას მიიღებენ უშუალოდ IPFS-იდან. ამისთვის აუცილებელია დააყენონ პროტოკოლის სრული ნოუდი, ან დაუშვან ipfs:// ტიპის მისამართების გამოყენება. პროტოკოლი გახსნის დაბლოკილ ვებ-გვერდებზე წვდომას, დააჩქარებს მათ ჩატვირთვას და შეამცირებს ჰოსტინგის ხარჯებს. ”დღეს ტაილანდში ვიკიპედიის ზოგიერთ ნაწილზე შესვლა დაბლოკილია. 100000-ზე მეტი ვებ-გვერდი აკრძალულია თურქეთში. ჩინეთს არ აქვს მნიშვნელოვანი ინფორმაცია COVID-19-ის შესახებ. ამიერიდან Brave-ის ნებისმიერი მომხმარებელი IPFS-ის საშუალებით შეძლებს გადალახოს ეს შეზღუდვები ”, - განაცხადა პროექტის ხელმძღვანელმა მოლი მაკინლეიმ. კრიპტობრაუზერი ტექნიკური დირექტორისა და თანადამფუძნებლის, ბრაიან ბონდის თქმით Brave-მა პირველმა შესთავაზა მომხმარებლებს პროტოკოლის ინტეგრაცია. ”IPFS მომხმარებლებს საშუალებას აძლევს გადაჭრან ცენტრალიზებული სერვერების პრობლემა, რომელიც ქმნის უარყოფის ცენტრალურ წერტილს კონტენტზე წვდომისთვის”, - განმარტა მან. IPFS - ეს არის პროტოკოლი, რომლის მეშვეობით ერთრანგიანი ნოუდები ახორციელებენ მონაცემების შენახვასა და გავრცელებას ერთიან განაწილებულ ფაილურ სისტემაში არა სერვერთან მონაცემთა მისამართების დაკავშირებისთვის, არამედ უნიკალურ კრიპტოგრაფიულ ჰეშ-იდენტიფიკატორთან. შეგახსენებთ, რომ აპრილში IFPS-ის დეველოპერებმა წარადგინეს 0.5 ვერსია, რომელმაც გააუმჯობესა ინტერნეტში კონტენტის ძიების პროცესი. http://bit.ly/39NhSZ2

ამჟამად Core i5 სერიის ყველაზე დაბალბიუჯეტურ პროცესორად ითვლება Core i5-10400. რთულია მას ვუწოდოთ წარმადობის მხრივ რეკორდსმენი, თუმცა კარგ ვიდეო დაფასთან ერთად იგი შესანიშნავია, როგორც გეიმინგ კომპიუტერის საფუძველი. მას ჩაანაცვლებს ახალი პროცესორი Core i5-11400. იგი გამოჩნდა Geekbench 5-ზე, სადაც შესანიშნავი მაჩვენებლები დააფიქსირა. როგორც აღმოჩნდა, Core i5-11400 ჩიპს შეუძლია 4.4 გჰც-მდე აჩქარება ბუსტ-რეჟიმში, რაც მხოლოდ 100 მეგაჰერცით აღემატება ამჟამად მოქმედ მოდელს, მაგრამ წარმადობის ზრდა საკმაოდ შთამბეჭდავია. ერთბირთვიან ტესტებში ჩიპმა დააფიქსირდა დამატებით 12%, მრავალბირთვიან ამოცანებში კი - 9%. სინამდვილეში, ასეთი პროცესორისგან სასწაულების მოლოდინი არ უნდა გვქონდეს, რადგან ის კვლავ დაიკავებს პოზიციას პროდუქციის ხაზში და Core i5-10600K-ზე უფრო სწრაფი არ იქნება. აქ მნიშვნელოვანია იმის ცოდნა, თუ რამდენს მოითხოვს Intel-ი ახალი ჩიპისთვის. თუ ფასების პოლიტიკა არ შეიცვლება, ეს პროცესორი შეიძლება გახდეს ნამდვილი ბესტსელერი, რადგან დამატებით 10% არ არის ცუდი მაჩვენებელი და გამოადგება ყველას, ვისაც 2021 წელს ახალი კომპიუტერის აწყობა სურს. http://bit.ly/361LDUR

One Netbook-ის გუნდი ემზადება ულტრაკომპაქტური One Mix 4 ლეპტოპის გამოსაშვებად: მოწყობილობა, რომელსაც ტრანსფორმირებადი დიზაინი აქვს, გაიყიდება გაზაფხულიდან, მაგრამ სამწუხაროდ ფასი ჯერ არ გახმაურებულა. ლეპტოპს აქვს 10.1-დუიმიანი დისპლეი. გამოყენებულია სენსორული პანელი, შესაძლებელია ზედა ნაწილის 360 გრადუსით მოტრიალება, რის შედეგად ლეპტოპი გადადის პლანშეტის რეჟიმში. კომპიუტერის საფუძველს წარმოდგენს აპარატული პლატფორმა Intel Tiger Lake. წარმოდგენილი იქნება მოდიფიკაციები ოთხბირთვიანი Core i5-1130G7 (4.0 გჰც-მდე) პროცესორით ან Core i7-1160G7 (4.4 გჰც-მდე) ჩიპით. ამ პროცესორებს გააჩნია მრავალნაკადიანი ტექნოლოგიის მხარდაჭერა, მათ შემადგენლობაში შედის გრაფიკული ამაჩქარებელი Intel Iris Xe. ეკრანის გვერდების შეფარდებაა 16:10, პიქსელების სიმჭიდროვე - 300 ppi, გაფართოება 2560 × 1600 პიქსელი და სიკაშკაშე 320 კდ/მ2. ოფციურად შემოთავაზებული იქნება სპეციალური ელექტრონული ფანქარი სენსორულ ეკრანზე სამუშაოდ. წარმოდგენილია განათების მქონე კლავიატურა და მოზრდილი ზომის თაჩპედი. ლეპტოპის შემადგენლობაშია SSD NVMe, Wi-Fi 6 უსადენო კავშირის ადაპტერი, microSD სლოტი და სამი USB Type-C პორტი. ფიზიკური ქსელური კავშირის მხარდაჭერა სავარაუდოდ გათვალისწინებული არ არის. http://bit.ly/392pZBG

აზიაზე მოდის მსოფლიო კრიპტო ტრანზაქციების 43%, Bitcoin-ის ჰეშრეითის 70% და ათიდან ექვსი ახალი სტარტაპი - ნათქვამია Messari-ს მიმოხილვაში. მკვლევარები აღნიშნავენ ინფრასტრუქტურული კომპანიების დაინტერესებას კრიპტო ბაზრის განვითარებით, რომელზეც მსოფლიო მოსახლეობის 60% მოდის. ამას ხელს არ უშლის ჩინეთის ხელისუფლების აკრძალვა Bitcoin-ბირჟებისა და ICO-ს ჩატარების შესახებ. "აღმოსავლეთ აზიაში (ძირითადად ჩინეთში) ტრანზაქციების 90% აღემატება 10 ათასი აშშ დოლარის ეკვივალენტს. ამ რეგიონს ჰყავს უფრო სპეკულაციური ბაზრის მონაწილეები, ვიდრე ჩრდილოეთ ამერიკას", - ნათქვამია მოხსენებაში. სხვა ფაქტორებად, რომლებიც აზიას კრიპტო ბაზარზე გამოარჩევენ, ანალიტიკოსებმა დაასახელეს: მსხვილი საფონდო ბაზრები (იაპონია, ჩინეთი და ჰონგკონგი მსოფლიოს ტოპ 5-ში); Wi-Fi-ს, სმარტფონებისა და მობილური ინტერნეტის გავრცელების დონე; ელექტრონული გადახდების პოპულარობა; ახალგაზრდა IT-სპეციალისტების მაღალი პროცენტულობა და Fintech-ის განვითარების დონე. აზიაში მდებარეობს შემდეგი კომპანიების შტაბ-ბინები - Tether, Cardano, EOS, Binance Coin და Tron. პროექტები შეადგენს ტოპ 20 კრიპტო ბაზრის მთლიანი კაპიტალიზაციის 42%-ს. ინდუსტრიის ტოპ 10 კომპანიიდან ექვსი ასევე მდებარეობს ამ რეგიონში. წყარო: Messari. ჩინეთში მოქმედებს მსხვილი მაინინგ-კომპანიები: Bitmain, Canaan და Ebang. აქ არის თავმოყრილი მსოფლიო Bitcoin-ის ქსელის ჯამური გამომთვლელი სიმძლავრის 65.1%. 4.3% მოდის მალაიზიაზე, რომელსაც მოსდევს ირანი (3.8%) და შედის ამ მაჩვენებლის მიხედვით ტოპ ხუთეულში აშშ-ის (7.2%), რუსეთისა (6.9%) და ყაზახეთის (6.2%) შემდეგ. წყარო: Messari. Bitcoin-ის ჰეშრეითის ლიდერი პოზიციების პარალელურად ჩინეთში მდებარეობს უმსხვილესი კრიპტო ბირჟები Binance, Huobi, OKEx და OKCoin. ამ პლატფორმებზე ჯამურად ინახება იმდენივე Bitcoin-ი, რამდენიც Coinbase-ზე. წყარო: Messari. ჰონგკონგი იურისდიქციად აირჩიეს კრიპტოდერივატივების უმსხვილესმა ბირჟებმა: FTX, BitMEX, OSL, აგრეთვე წამყვანმა ფონდებმა. მიზეზი იყო ინსტიტუციების უზარმაზარი ბაზა და მაღალი კაპიტალის მქონე პირები, დაბალი საგადახდო განაკვეთები და სპეციალისტები საინვესტიციო ბექგრაუნდით. Chainalysis-ის თანახმად, 2020 წლის ივნისის მონაცემებით აზიის კრიპტო ტრანზაქციებზე მოდიოდა 296 მილიარდი აშშ დოლარის 43%. ეს მაჩვენებელი შეესაბამება აშშ-ისა და ევროპის ჯამურ აქტივობას. წყარო: Messari. ადრე ჩინეთის ხელისუფლებამ მოქალაქეებს აუკრძალა 50 ათას აშშ დოლარზე მეტი უცხოური ვალუტის შეძენა წელიწადში. კაპიტალის კონტროლმა გააძლიერა Stablecoin-ების, განსაკუთრებით კი Tether-ის (USDT) პოპულარობა. სამხრეთ კორეაში ყოველი მესამე ინვესტორი პორტფელს კრიპტოვალუტებს უმატებს. იაპონური ბანკები ინვესტიციას დებენ საქმიანობის იმ სფეროებში, რომლებიც security-ტოკენების გამოცემის იდეას უწყობენ ხელს. შეგახსენებთ, რომ ადრე Jump Capital-ის ანალიტიკოსებმა ინდოეთი და ინდონეზია კრიპტოვალუტების მხრივ ყველაზე პერსპექტიულ ქვეყნებად დაასახელეს. http://bit.ly/3p3hxYz

2020 წლის მეოთხე კვარტალში ვიდეო დაფებზე მოთხოვნილებამ მკვეთრად იმატა - და არა მხოლოდ NVIDIA-სა და AMD-ს ნანატრ ახალ პროდუქტებზე, რომლებიც, სხვათა შორის, თავიდანვე უკვე დეფიციტური იყო, ასევე ძველ მოდელებზეც კი, რომლებიც საწყობებში უხვად იყო თავმოყრილი. ამ ყველაფერმა საბოლოოდ გამოიწვია ვიდეო დაფების ღირებულების მნიშვნელოვანი ზრდა, შემდეგ კი სრული გაუჩინარება.   ამ დროისთვის შედარებით ადვილია მხოლოდ GeForce GTX 1050 Ti-ს შეძენა, რომელსაც მეტად რთულია ვუწოდოთ გეიმერული, ასევე საკმაოდ მაღალია მისი ფასი. არსებულ სიტუაციას ორი მიზეზი აქვს: პირველი - მაინერები, რომლებიც დიდი ენთუზიაზმით ყიდულობენ ყველაფერს ნებისმიერ ფასად, რასაც შემოსავალი მოაქვს და მეორე - პანდემია, რომელმაც თავისი კვალი დატოვა ქარხნების მუშაობაში და შეამცირა საჭირო კომპონენტების წარმოება. შედეგად, ამ ფაქტორების ჯამმა ტოტალური დეფიციტი გამოიწვია. გარკვეულმა მედიასაშუალებებმა კომენტარისთვის მიმართეს შესაბამისი მოწყობილობების მსხვილ სავაჭრო დაწესებულებებს, რომელთა წარმომადგენლების პასუხი არ არის დამაიმედებელი - ვიდეო დაფების ბევრი ნაკადი არც კი აღწევს მაღაზიებამდე. გადამყიდველები და მაინერები, რომელთაც „საჭირო კავშირები“ აქვთ, პირწმინდად ყიდულობენ ყველაფერს. მაღაზიებში გამოთქვამენ პროგნოზს, რომ ამჟამად არსებული სიტუაცია ზაფხულამდე გაგრძელდება. ოდნავ ოპტიმისტური მოლოდინი აქვთ NVIDIA-სა და AMD-ს - მათი თქმით ვითარება აპრილიდან დასტაბილურდება. რეალურად, თარიღების მითითება არ ღირს, უპირველეს ყოვლისა საჭიროა ორიენტირება კრიპტოვალუტების კურსზე, თუ როდის დაიწყება გლობალური კორექცია. http://bit.ly/3bYGzEm

ბრენდი Redmi პირველ რიგში ცნობილია დაბალბიუჯეტური სმარტფონებით, თუმცა მას შემდეგ, რაც კომპანია გვევლინება, როგორც დამოუკიდებელი ბრენდი და არა Xiaomi-ს მორიგი სერია, ხსენებულმა ბრენდმა დაიწყო ნამდვილი ფლაგმანური მოწყობილობების წარმოებაც, რომლებიც ემყარება მოწინავე მობილურ პლატფორმებს. როგორც ცნობილი გახდა, უახლოეს პერსპექტივაში Redmi აპირებს აითვისოს კიდევ ერთი სეგმენტი - გეიმერული სმარტფონები. Redmi-ს გენერალურმა მენეჯერმა ლუ ვეიბინგმა (Lu Weibing) Weibo-ს გვერდის საშუალებით დაადასტურა, რომ „კომპანია გეგმავს თავისი პირველი გეიმინგ სმარტფონის გამოშვებას მიმდინარე წელს ძალიან მიმზიდველ ფასად”. მან დაამატა, რომ კომპანია აპირებს პირველი სმარტფონის წარდგენას ახალ ფლაგმანურ ჩიპსეტ MediaTek Dimensity 1200-ის ბაზაზე, რომელიც ახლახანს დაანონსდა. ლუ ვეიბინგის განცხადებიდან ბოლომდე გასაგები არ არის, საუბარია გეიმინგ სმარტფონზე თუ სრულიად სხვა მოწყობილობაზე - მაგალითად, Redmi K40 სერიის მომავალ ფლაგმანურ სმარტფონზე, რომლის შესახებაც ინფორმაცია ბოლო დროს სულ უფრო ხშირად ჩნდება. აღსანიშნავია, რომ ზემოთხსენებულ მობილურ პროცესორ Dimensity 1200-ში გამოყენებულია იგივე გრაფიკული ბირთვი, რაც გასული წლის Dimensity 1000+ მოდელში. თუმცა GPU წარმოდგენილი იქნება რეითრეისინგის პროგრამული მხარდაჭერით და იმუშავებს ეკრანებთან, რომელთა კადრის განახლების სიხშირე იქნება 168 ჰერცი. http://bit.ly/3qtT9j4

დიდი ხანია პირველი კრიპტოვალუტა Bitcoin-ი პრაქტიკულად არ კარგავს ღირებულებას. მისი მიმდინარე ფასი დაახლოებით 36 ათას აშშ დოლარამდეა. მისი მკვეთრი ზრდის გათვალისწინებით 40 ათასი აშშ დოლარიდან ამჟამინდელ დონემდე ვარდნა არ ნიშნავს შემდგომში ფასის 7-10 ათასამდე შემცირებას. მაგრამ სცენარს, რომ Bitcoin-ი დაუბრუნდება თავის წინა დონეს, უკვე განიხილავს გამომცემლობა Bloomberg. თეორია, რომლის თანახმად გამონაკლისის გარეშე ყველა კრიპტოვალუტა საპნის ბუშტია კონკრეტული დროის ტაიმერით, კვლავ გამოთქვა შვეიცარიის უდიდესმა ბანკმა UBS Group AG-მ. რამდენიმე დღის წინ ბანკმა მომხმარებლებს გაუგზავნა ელექტრონული წერილები, რომლებშიც ანალიტიკოსების იმედგაცრუების პროგნოზების მითითებით მან პრაქტიკულად "დამარხა" Bitcoin-ის კურსი. ყველაზე პოპულარული კითხვა, რომელიც ბანკს დაუსვეს კრიპტოვალუტების ზრდის დროს, არის: "არის ამჟამად მომგებიანი Bitcoins-ის ყიდვა?" ამაზე გარკვეული პასუხი არ გაიცა. ერთი მხრივ, ბანკის თანამშრომლები დარწმუნებულნი არიან, რომ კრიპტოვალუტის აბსოლუტურ ნულამდე დაცემის შანსი არარეალურია, ხოლო მეორე მხრივ, მათი აზრით მისი ყიდვა ფულის დაკარგვას უდრის. "ჩადეთ Bitcoin-ში იმდენი ფული, რამდენის დაკარგვისთვისაც ხართ მზად წარუმატებლობის შემთხვევაში". http://bit.ly/3ioQEM2

უფრო და უფრო მეტი მომხმარებელი ხვდება, რომ ერთი დისპლეი არ არის საკმარისი კომფორტულად მუშაობისთვის. თუ არ გსურთ მაგიდის გადატვირთვა რამდენიმე მონიტორით, Lenovo-ს აქვს შესანიშნავი გამოსავალი - ThinkReality A3 augmented reality სათვალე. მას შეუძლია ხუთამდე ვირტუალური ეკრანის პროექცირება. ThinkReality A3-ის წარდგენა ახლახანს შედგა გამოფენა CES 2021-ზე. კომპანიის თქმით, სათვალის შექმნის მთავარი მიზანი პროდუქტიულობის გაზრდა და ერთობლივი თანამშრომლობის გაღრმავებაა. ამისათვის სათვალე აღჭურვილია წყვილი 1080p დისპლეითა და ორი ფართოკუთხოვანი კამერით, რომლებიც გადაიღებენ მიმდებარე სივრცეს, რათა განისაზღვროს სად უნდა განთავსდეს ვირტუალური ეკრანები. 8-მეგაპიქსელიან კამერას შეუძლია ფოტოებისა და ვიდეოების გადაღება Full HD ხარისხში. როგორც სახელიდან ჩანს, სათვალე აგებულია ThinkReality პლატფორმაზე - ვირტუალური და შერეული რეალობის სისტემაზე, რომელსაც Lenovo რამდენიმე წლის განმავლობაში ავითარებს. ThinkReality A3 ჰგავს უფრო კომპაქტურ A6 ჰედსეტს, რომელიც კომპანიამ გასული წლის CES 2020-ზე წარადგინა. სათვალე ამჟამად უკვე ორ ვერსიად არის ხელმისაწვდომი: PC Edition უერთდება დესკტოპს ან ლეპტოპს USB-C სადენით და პროექცირებს ხუთ ერთეულამდე ვირტუალურ ეკრანს. Industrial Edition შექმნილია Motorola-ს ბრენდის სმარტფონებთან დასაკავშირებლად და ბევრად უფრო მობილური ვერსიაა. ეს სათვალე შესაძლებელია გამოყენებულ იქნას ქარხნებში, სავაჭრო სივრცეებში, სასტუმროებსა და სხვა საწარმოებში მონაცემთა ვიზუალიზაციისთვის, სხვადასხვა პარამეტრების მონიტორინგისა და პერსონალის ტრენინგისთვის. ThinkReality A3 ხელმისაწვდომი გახდება მიმდინარე წლის შუა პერიოდში, მოწყობილობის ფასი ჯერჯერობით არ გახმაურებულა. სადემონსტრაციო ვიდეო შეგიძლიათ ნახოთ ბმულზე: https://bit.ly/3p1BoHE http://bit.ly/3oZAY4f

კომპანია NVIDIA-მ ოფიციალური ანონსის გარეშე შეამცირა მოთხოვნები G-Sync ტექნოლოგიის მხარდაჭერის მქონე მონიტორების მიმართ. ხსენებული ტექნოლოგია გამოყენება მონიტორის კადრის განახლების დინამიური სინქრონიზაციისთვის და მიმართულია, რომ აღმოფხვრას გამოსახულების ხარვეზები კადრების ცვლილების დროს. ASUS PG32UQX G-Sync ტექნოლოგია გამოჩნდა უფრო ადრე, ვიდრე AMD-ს ანალოგიური ტექნოლოგია AMD FreeSync, და თავდაპირველად გულისხმობდა სპეციალური აპარატურით აღჭურვას. ამასთან, აღსანიშნავია, რომ AMD-ს ტექნოლოგია არ საჭიროებდა მონიტორში დამატებითი აღჭურვილობის გამოყენებას და ამიტომ სწრაფად მოიპოვა პოპულარობა მწარმოებლებსა და მომხმარებლებში. საბოლოოდ NVIDIA-ს მოუწია უფრო მოქნილად მოკიდებოდა G-Sync მხარდაჭერის ინტეგრაციას. მან შემოგვთავაზა ტექნოლოგიის სამი ტიპი: G-Sync Compatible (თავსებადია G-Sync-თან სპეციალური აპარატურის გარეშე), G-Sync-ის მხარდაჭერა (მონიტორი აღჭურვილია NVIDIA-ს მოდულით) და G-Sync Ultimate-ის სრული მხარდაჭერა (წინა ტიპის ანალოგიური, თუმცა განკუთვნილია მხოლოდ HDR მხარდაჭერის მქონე მონიტორებისთვის). G-Sync Ultimate-თან მიმართებაში კომპანიებს დაეკისრათ განსაკუთრებული მოვალეობები. მაგალითად, CES 2019-ზე კომპანიამ გამოაცხადა შემდეგი აუცილებელი მახსიათებლები G-Sync Ultimate მხარდაჭერის მქონე მონიტორებისთვის: ეკრანის სიკაშკაშე 1000 კდ/მ2 და მეტი; მაღალი გაფართოებისა და კადრის განახლების სიხშირის მხარდაჭერა; მატრიცის სწრაფი რეაქცია; მრავალზონიანი განათება; ფართო ფერთა გამა; NVIDIA G-Sync მაღალი წარმადობის პროცესორი; თუმცა, CES 2021-ზე ცნობილი გახდა, რომ სამმა ახალმა მონიტორმა მიიღო G-Sync Ultimate სერთიფიკატი. აღმოჩნდა, რომ ორი მათგანი არ აკმაყოფილებს თავდაპირველ მოთხოვნებს - მათ არ ჰქონდათ VESA DisplayHDR 1000 სერთიფიკატი. ამის ნაცვლად ფლობდნენ VESA DisplayHDR 600 სერთიფიკატს, ასე რომ ეს ეწინააღმდეგება NVIDIA-ს ადრეულ მოთხოვნებს G-Sync Ultimate სტანდარტის მიმართ. უფრო მეტიც, ცვლილებები აღმოჩენილ იქნა NVIDIA-ს ვებ-გვერდზე G-Sync განყოფილებაში. კომპანიამ წაშალა 1000 კდ/მ2 სიკაშკაშის მაჩვენებლის მოთხოვნა და მის ნაცვლად მიუთითა, რომ დისპლეის უნდა ჰქონდეს „რეალისტური HDR“ სტანდარტის მხარდაჭერა. სხვა სიტყვებით, ამჟამად G-Sync Ultimate ტექნოლოგიის მხარდაჭერა არ ნიშნავს 1000 კდ/მ2 და ზემოთ სიკაშკაშის მხარდაჭერას. MSI MEG MEG381CQR LG 34GP950G NVIDIA-მ განაცხადა, რომ G-Sync Ultimate ტექნოლოგიის მხარდაჭერა მიიღეს მონიტორებმა ASUS PG32UQX (მაქსიმალური სიკაშკაშე 1400 კდ/მ2), MSI MEG MEG381CQR (HDR 600) და LG 34GP950G (HDR 600). http://bit.ly/3nUNW1R

მწარმოებელი კომპანიების გარანტიების მიუხედავად ბევრი გეიმერი სავაჭრო დაწესებულებებიდან ვიდეო დაფების გაქრობაში მაინერებს სდებს ბრალს. გასაკვირი არ არის, რომ თითქმის ყველა გეიმერული Radeon RX და GeForce RTX ფაქტობრივად აღარ არის ხელმისაწვდომი. საუბარია არა მხოლოდ ამჟამად აქტუალურ ხაზებზე, არამედ 2 და 3 წლის წინ გამოშვებულ ვიდეო დაფებზეც კი. Bitcoin-ის ფასი იზრდება, მას მიჰყვება Ethereum, რომლის მოპოვება ვიდეო დაფების გამოყენებით ხდება. ბოლო პერიოდში კრიპტოვალუტის ფასი 600%-ით გაიზარდა. უნდა ველოდოთ თუ არა ვითარების გაუმჯობესებას? საინვესტიციო კომპანია Pantera Capital-ის ხელმძღვანელ დენ მორჰედის აზრით შემოდგომაზე Bitcoin-ის ფასი 100 ათას აშშ დოლარს გადააჭარბებს. ამჟამად შეიძლება ბევრმა ანალიტიკოსის ამ პროგნოზს არასერიოზული უწოდოს, თუმცა შეგახსენებთ - 2020 წლის შემოდგომაზე მან განაცხადა, რომ 2021 წლის 15 იანვარს Bitcoin-ის ღირებულება 38 ათასი აშშ დოლარი იქნებოდა. დენ მორჰედი აანალიზებს ბაზარს კრიპტოვალუტების გრძელვადიან კოტირებებზე დაყრდნობით. მისი თქმით, ამჟამინდელი სიტუაცია კარდინალურად განსხვავდება 2018 წლისგან, როდესაც ციფრული აქტივი ჩამოიშალა. პანდემიის დროს ბევრი ცდილობს დაეყრდნოს იმას, რაც სტაბილური ჩანს. ეს ნიშნავს იმას, რომ Bitcoin-ის ფასი ზრდას გააგრძელებს. თუკი ანალიტიკოსების პროგნოზებს გავიხსენებთ, გამოდის, რომ Bitcoin-თან ერთად Ethereum-იც გააგრძელებს ზრდას. ამ ეტაპზე 6 თვეში ან ნაკლებ დროშიც კი არის შესაძლებელი ვიდეო დაფის დანახარჯის ამოღება. თუკი ETH-ის ფასი 4 ათას აშშ დოლარამდე გაიზრდება, ხარჯის ამოღება ერთ თვეში გახდება შესაძლებელი, რაც გამოიწვევს მაღაზიებიდან გრაფიკული ჩიპების დიდი ხნით გაქრობას. http://bit.ly/3nWHzvd

ცოტა ხნის წინ მრავალი ამბიციური პროექტის ავტორმა და ინოვატორმა ილონ მასკმა კვლავ წამოჭრა თემა უსიცოცხლო მარსის ტერაფორმირების აუცილებლობის შესახებ. ახლა სწორედ საჭირო დროა - სანამ პლანეტა დაუსახლებელია, ყველაზე რადიკალური მეთოდების გამოყენებაა შესაძლებელი. მაგალითად, პლანეტის ორივე პოლუსზე ყინულის გასადნობად ათეულობით ატომური ბომბის სროლა. მასკის იდეა თავდაპირველად სამეცნიერო თვალსაზრისით შეუმდგარად მიიჩნეოდა, რადგანაც მარსის ყინულებში წყლის შემცველობა ძალიან ცოტაა საიმისოდ, რომ მნიშვნელოვნად შეიცვალოს პლანეტის ატმოსფერო. ამჟამად მარსის ატმოსფერო ორასჯერ უფრო გაუხშოებულია დედამიწის ატმოსფეროსთან შედარებით, ყინულის გალღობისა და წყლის ორთქლით გაჯერების შემდეგ იგი დედამიწის მაჩვენებლის მაქსიმუმ 7%-ს მიაღწევს, რაც მაინც კატასტროფულად მცირეა. თუმცა მთავარი სხვა რამეა - კაცობრიობას არ გააჩნია საკმარისი სიმძლავრის ენერგიის წყარო ამ იდეის განსახორციელებლად. მასკის წინადადების საპასუხოდ მათემატიკოსმა რობერტ უოკერმა თავისი გამოთვლები გამოაქვეყნა Science 2.0 ბლოგზე. აზრი არ აქვს მხოლოდ ყინულის აფეთქებას ძლიერი ბომბებით - ფრაგმენტები დარჩება პოლუსზე. იგი უნდა აორთქლდეს და თანაც ძალიან სწრაფად, რომ ტენმა ვერ მოასწროს ისევ კონდენსირება და წამოვიდეს თოვლის სახით. ატომური ბომბები ამისთვის საუკეთესო გამოსავალია იმ საშუალებებს შორის, რაც კაცობრიობას გააჩნია. თუმცა არსებობს ერთი პრობლემა: მძლავრი ბირთვული აფეთქების შედეგად წარმოქმნილი სინათლის გამოსხივება მხოლოდ 50 წამი გრძელდება. შემდეგ მოდის მარტივი გამოთვლები, რომლიდანაც გამომდინარეობს, რომ მარსის ყინულების დასადნობად საჭიროა ყოველდღიურად მოხდეს 3500 მეგატონა სიმძლავრის ატომური ბომბის აფეთქება. მთლიანი პროცესი შვიდი კვირის განმავლობაში გაგრძელდება და დასჭირდება ჯამში 180 გიგატონა სიმძლავრის ბომბები, რაც კაცობრიობას უბრალოდ არ გააჩნია. მაშინაც კი, თუ მარსზე აღმოაჩენენ ურანით მდიდარ საბადოებს და თავად მარსზე დაამყარებენ ატომური ბომბების წარმოებას, პროექტი მაინც ჩაშლისთვისაა განწირული, რადგან პლანეტის რადიაციული დაბინძურების დონე გადააჭარბებს ყველა წარმოსადგენ ინდიკატორს და იქ ცხოვრება მაინც შეუძლებელი იქნება. http://bit.ly/35S4Isr

მომავალი წლის მეორე ნახევარში TSMC გვპირდება 3-ნანომეტრიანი პროდუქციის მასობრივი წარმოების დაწყებას. კომპანია ელის, რომ ახალი ტექნოლოგიური ნორმები მოიზიდავს არა მხოლოდ მობილური პროცესორების მწარმოებლებს, არამედ მაღალპროდუქტიული გამოთვლითი სეგმენტის წარმომადგენლებს. IDC-ის ანალიტიკოსების აზრით NVIDIA შეიძლება იყოს ერთ-ერთი მათგანი. Apple-ის "ლითოგრაფიულ ავანგარდში" ნახვა უკვე ჩვეულებრივი მოვლენაა, რადგან კომპანია ცდილობს მაქსიმალურად გამოიყენოს და სარგებელი ნახოს ახალ ტექნოპროცესზე გადასვლის შედეგად. როგორც წესი, ასეთი მიგრაცია გაზრდის პროცესორების წარმადობას ენერგომოხმარების შემცირების ან შენარჩუნების დროს. IDC-ის ექსპერტების აზრით, რომელთაც ციტირებს South China Morning Post, - Apple-ისა და Qualcomm-ის გარდა TSMC შეძლებს NVIDIA მიიზიდოს 3-ნანომეტრიანი ტექნოლოგიით, ყოველ შემთხვევაში იმ დროს, როდესაც საქმე ეხება პირველი ტალღის „მომხმარებლებს“. ექსპერტების მოლოდინით, TSMC-ის 3- და 2-ნანომეტრიანი ტექნოპროცესების გამოსვლის შედეგად გაიზრდება უფსკრული ტაივანურ კომპანიასა და Samsung Electronics-ს შორის, რომ აღარაფერი ვთქვათ ჩინურ SMIC-ზე. კორეელ კონკურენტს მინიმუმ ხუთი წლის დახარჯვა მოუწევს TSMC-თან ლითოგრაფიული უფსკრულის ამოვსებისთვის - მიიჩნევენ IDC-ის წარმომადგენლები. ამასთან, Samsung-ის აპირებს 3-ნანომეტრიანი ტექნოპროცესის საკუთარი ვერსიის მასობრივი წარმოების დაწყებას 2022 წელს, TSMC-ის პარალელურად. ზოგიერთი პროგნოზის თანახმად TSMC-ის 2-ნანომეტრიან ტექნოპროცესზე გადასვლა კომპანიას საშუალებას მისცემს გაზარდოს თავისი წილი საკონტრაქტო მომსახურების ბაზარზე არსებული 54-დან 56%-მდე, თუ ახალი ტექნოლოგია 2023 წელს იქნება ათვისებული. კომპანიის მოგების ნორმა 53%-მდე გაიზრდება, რადგან მას, როგორც ბაზრის დომინანტს, შეუძლია დამკვეთებს უკარნახოს ფასები. http://bit.ly/3bWqiQx

Goldman Sachs, მსოფლიოს ერთ-ერთი უდიდესი საინვესტიციო ბანკი, იკვლევს ციფრული აქტივების სამეურვეო სამსახურის დაწყების შესაძლებლობას. ამის შესახებ იუწყება CoinDesk საკუთარ წყაროებზე დაყრდნობით. რესურსის განცხადებით, ფინანსურმა კონგლომერატმა გასცა ინფორმაციის მოთხოვნა (RFI), რომელიც 2020 წლის ბოლოს გაუგზავნეს კრიპტოვალუტის შესანახ სივრცეში მოქმედ მინიმუმ ერთ ცნობილ მოთამაშეს. ”JPMorgan-ის მსგავსად ჩვენ გამოვუშვით RFI ციფრულ შენახვასთან დაკავშირებით. ჩვენ ინტენსიურად ვსწავლობთ საკითხს და ვწყვეტთ რა გავაკეთოთ შემდეგ “, - აღნიშნა ინსაიდერმა. მან აღნიშნა, რომ ინიციატივა "უფრო ფართო ციფრული სტრატეგიის" ნაწილია და დაეყრდნო ფულადი მიმოქცევის კონტროლის სამმართველოს (OCC) ბოლოდროინდელ გადაწყვეტილებას Stablecoin-ების შესახებ. კრიპტოვალუტებთან დაკავშირებული მომსახურების დაწყების დროსთან დაკავშირებით გამომცემლობას თანამოსაუბრემ უპასუხა, რომ ბანკის გეგმები "უახლოეს მომავალში გახდება ცნობილი". შეგახსენებთ, რომ Goldman Sachs-ს გარკვეული დროის წინ მიენიჭა საკუთარი Stablecoin-ის გამოშვების უფლება. http://bit.ly/3nRkTfP

გამოფენა CES 2021-ის დროს AMD-ს გენერალურმა დირექტორმა მცირე პრესკონფერენცია გამართა, სადაც განიხილეს მნიშვნელოვანი თემები კომპანიის მომავალსა და წარმოებასთან დაკავშირებით. ახლა, როდესაც AMD-ს მყარი პოზიციები უჭირავს, ლიზა სუ მიიჩნევს, რომ კომპანიამ უნდა გააორმაგოს საკუთარი ტექნოლოგიები და ინოვაციები და არ იღელვოს სხვა კომპანიებზე. დესკტოპ-პროცესორები AMD-ს ყველაზე ძლიერი მხარეა, ლეპტოპები და კორპორატიული პროცესორები კი - ორი უდიდესი ბაზარია, რომლებზე შეჭრის შესაძლებლობაც აქვს კომპანიას და არ აპირებს დანებებას. ლიზა სუ აცხადებს, რომ AMD დიდ ყურადღებას უთმობს სამომავლო Zen 4 და Zen 5 არქიტექტურებს და ელის, რომ ისინი იქნება მინიმუმ „მეტად კონკურენტუნარიანი“. ლიზა სუს ჰკითხეს, დარჩება თუ არა ცენტრალური პროცესორების ბირთვების მაქსიმალური რაოდენობა ისე, როგორც ამჟამადაა. ბირთვების რაოდენობა არ შეცვლილა ორი თაობის განმავლობაში: რვა ბირთვი მობილურ მოწყობილობებზე, 16 - დესკტოპ კომპიუტერებზე და 64 ბირთვი - სერვერებისა და სამუშაო სადგურებისთვის განკუთვნილ პროცესორებში. ლიზა სუმ აღნიშნა, რომ ბირთვების რაოდენობა არც ახლაა შეზღუდული, მომავალში კი ნამდვილად მეტი ბირთვი იქნება წარმოდგენილი. ამგვარი რამ გამოჩნდება მაშინ, როდესაც ამას მომხმარებლები მოითხოვენ და პროგრამულ დონეზე განხორციელდება შესაბამისი ოპტიმიზაცია. ერთ-ერთი მეთოდი, რომლის მიხედვითაც კომპანია Intel-ი გეგმავს პროცესორებში ბირთვების ორგანიზებას, გულისხმობს მაღალი წარმადობისა და მაღალეფექტური ბირთვების შერევას Alder Lake სერიის პროცესორებში. ლიზა სუს თქმით, AMD არ აპირებს ამ გზით სიარულს და აღნიშნა, რომ ამჟამინდელი ნამუშევრები „უკვე კარგად მასშტაბირდება საწყისი დონიდან კორპორატიულამდე და ხელმისაწვდომია სიმძლავრის, წარმადობისა და კრისტალის ფართობის სწორი შეფარდება“. AMD ნამდვილად ითვალისწინებს სპეციალიზაციის ზრდას "მომდევნო ორი წლის განმავლობაში", თუმცა კომპანიის ხელმძღვანელი თვლის, რომ ისინი უკვე მზად არიან გაუმკლავდნენ ამ გამოწვევებს. მან მიუთითა კონსოლებზე და თქვა, რომ AMD-ს გააჩნია ძლიერი ქვეგანყოფილება ამ შესაძლებლობების მისაღწევად. მან ასევე დაადასტურა თავისი რწმენა x86 არქიტექტურის მიმართ და უფრო მოქნილი Arm-ისგან განსხვავებით იგი აღწერა, როგორც ძლიერი ეკოსისტემა, რომელიც იმსახურებს დიდ ინვესტიციას. AMD ვერ შეძლებს ახალი პროდუქტების ინვესტირებას, თუ არ უზრუნველყოფს მათი წარმოების შესაძლებლობებს. კომპანიას მალე ექნება ახალი გრაფიკული პროცესორები და Epyc Milan პროცესორები. AMD ელის გარკვეულ დაძაბულობას წლის პირველ ნახევარში, რომელიც დაასუსტებს მხოლოდ მომდევნო თაობის პროცესორების და გრაფიკული პროცესორების რელიზს 2021 წლის მეორე ნახევარში. საბედნიეროდ, AMD ელის, რომ ფასები კლებას დაიწყებს და ნელ-ნელა შემცირდება Covid-19-ისგან გამოწვეული პრობლემები. პროდუქციის ხელმისაწვდომობასთან დაკავშირებულ პრობლემებზე საუბრისას ლიზა სუმ აღნიშნა, რომ კომპანია მუშაობს ამ პრობლემის მოგვარებაზე. მაგალითად, მომავალში მიწოდების პრობლემების თავიდან ასაცილებლად AMD-მ ინვესტიცია ჩადო ახალი ტექნიკისა და ობიექტების მშენებლობაში. კომპანია მზად იქნება შეხვდეს მოთხოვნის მზარდ დონეს მომდევნო თაობის ცენტრალური და გრაფიკული პროცესორების გამოშვებისას. http://bit.ly/39CvZ3f