ახალი მსოფლიო რეკორდი - Intel Core i9-14900KS-ის აჩქარება 9117 მჰც-მდე

[Magdalena]

ASUS ROG-ის გუნდმა გამოაცხადა, რომ დაამყარა ოთხი ახალი მსოფლიო რეკორდი უახლესი 24-ბირთვიანი Intel Core i9-14900KS პროცესორის გამოყენებით, რაც მოიცავს რეკორდული სიხშირის მიღწევას, ასევე სამ რეკორდულ შედეგს წარმადობის ტესტებში. ახალ პროცესორზე მხარდაჭერილია ავტომატური აჩქარება 6.2 გჰც-მდე ერთ ან ორ ბირთვზე, თუმცა ენთუზიასტებისთვის ეს მაჩვენებელი მხოლოდ საწყისი წერტილი აღმოჩნდა. 

 

ფოტოს წყარო: ASUS 

წინა ჯერზე CPU-ის ტაქტის სიხშირის აბსოლუტური რეკორდი 9044 მჰც დაფიქსირდა 2023 წლის 17 ოქტომბერს Core i9-14900KF პროცესორის გამოყენებით შვედ ოვერქლოქერ Jon "Elmor" Sandström-ის მიერ. CPU-ის სიხშირის ამჯერად დაფიქსირებული რეკორდია 9117.75 მჰც. იგი დამყარდა Core i9-14900KS პროცესორზე იმავე ოვერქლოქერისა და მისი გუნდის მიერ. აჩქარებისთვის ასევე გამოყენებული იყო ენთუზიასტებისთვის განკუთვნილი დედა დაფა ROG Maximus Z790 APEX Encore. 

 

გამოქვეყნებული ვიდეოს მიხედვით Core i9-14900KS-ის ტემპერატურა -231 გრადუსი ცელსიუსი იყო. ამავდროულად, ჩიპი მუშაობდა 1.85 ვოლტ ძაბვაზე. რა თქმა უნდა, ასეთი რეკორდის დამყარება მოითხოვდა ეგზოტიკური გაგრილების გამოყენებას - ამ შემთხვევაში გამოყენებული იყო თხევადი ჰელიუმი. 

გარდა ამისა, ASUS-მა გამოაცხადა, რომ Core i9-14900KS-მა დაამყარა სამი ახალი მსოფლიო რეკორდი PiFast, SuperPI 1M და PYPrime 32B ბენჩმარკებში, რაც მან მოახერხა შესაბამისად 6.79 წამში, 3.768 წამში და 97.596 წამში. სამწუხაროდ, არ გამოცხადებულა რა სიხშირეზე მუშაობდა პროცესორი ამ ტესტებში. 

https://tinyurl.com/36rps5ej