Intel Panther Lake, Core Ultra Series 3 პროცესორები

[Magdalena]

Intel-ის აღმასრულებელმა დირექტორმა გამოფენა Lenovo Tech World-ზე მოულოდნელად აჩვენა Panther Lake სერიის პროცესორების ნიმუში. ეს ჩიპები იქნება კომპანიის პირველი სამომხმარებლო პროდუქტი, რომელიც დამზადდება მოწინავე 18A ტექნოპროცესის გამოყენებით. ჩიპი ძალიან განსხვავდება აქტუალური Lunar Lake-ისგან, რომელსაც   ინტეგრირებული ოპერატიული მეხსიერება აქვს. 

 

ფოტოს წყარო: youtube.com/@Lenovo 

Panther Lake პროცესორებს ექნება ჩიპლეტური განლაგება, რომელიც დაფუძნებულია Foveros ტექნოლოგიაზე - ჩიპი ხუთი კრისტალისგან შედგება. მომავალ პროცესორებში წარმოდგენილი იქნება ახალი Panther Cove P-ბირთვები და, ალბათ, აქტუალური Skymont E-ბირთვები. მნიშვნელოვანია აღინიშნოს, რომ ეს არის პირველი პროდუქტი, რომელსაც ექნება Xe3 გრაფიკა, თუმცა დაბალი სიმძლავრის (LPG) ვარიანტში. და ეს მოულოდნელი იყო, რადგან Intel-ს ჯერ კიდევ არ გამოუშვია Xe2-ზე დამყარებული დისკრეტული ვიდეო ბარათები. 

 

„და კიდევ ერთი რამ, სანამ სცენას დავტოვებ. იცით, ჩვენ ერთად ვიმუშავეთ Meteor Lake-ზე, Lunar Lake-სა და Core Ultra PC-ზე ბატარეის შესანიშნავი ავტონომიურობისთვის. CPU-ზე, GPU-ზე, NPU-ზე, მაგრამ ჯერ არ დაგვისრულებია, არა? ასე რომ, მინდა წარმოგიდგინოთ Panther Lake-ის პირველი ნიმუში. ეს არის ჩვენი შემდეგი 18A პროდუქტი, რომელიც შეავსებს იმ დიდ სამუშაოს, რომელზეც დღეს ვისაუბრეთ“, - განაცხადა Intel-ის გენერალურმა დირექტორმა Pat Gelsinger-მა. 

კომპანიას არ დაუკონკრეტებია რა წარმადობა აქვს Panther Lake ჩიპის ცენტრალურ და გრაფიკულ პროცესორებს, მაგრამ გელსინჯერმა პირობა დადო, რომ NPU-ის (ხელოვნური ინტელექტის ამაჩქარებელი) ერთეული ორჯერ უფრო სწრაფი იქნება Lunar Lake-ში (NPU4) არსებულთანდა, შესაბამისად, რვაჯერ უფრო სწრაფი Meteor Lake-თან (NPU3) შედარებით.  დაუდასტურებელი ინფორმაციით Intel-მა გააუქმა Arrow Lake Refresh ჩიპების გამოშვების გეგმები და მომავალ LGA 1851 სოკეტს მხოლოდ ერთი თაობის პროცესორების მხარდაჭერა ექნება. 

https://tinyurl.com/3ykc98x4 

 

[Magdalena]

თვეზე მეტია, კომპანია Intel ერთგვარ გაურკვევლობაშია გენერალურ დირექტორ პატრიკ გელსინჯერის მოულოდნელი გადადგომის გამო. CES 2025-ზე ამჟამინდელ მენეჯმენტს მოუწია დაედასტურებინა, რომ Intel 18A ტექნოლოგიის გამოყენებით პროდუქციის წარმოება სერიული მასშტაბით მიმდინარე წლის მეორე ნახევარში დაიწყება. 

 

ფოტოს წყარო: Intel 

Intel-ის გენერალური დირექტორის მოვალეობის შემსრულებელმა მიშელ ჯონსტონ ჰოლთჰაუსმა CES 2025-ზე განაცხადა: „Intel ცდილობს გააფართოვოს ხელოვნური ინტელექტის მქონე კომპიუტერის პროდუქტების პორტფელი 2025 წელს და შემდგომ, რადგან ჩვენ უკვე ვაწვდით Intel 18A ტექნოლოგიის ნიმუშებს ჩვენს მომხმარებლებს მანამ, სანამ დაიწყება წარმოება 2025 წლის მეორე ნახევარში“. 

შეგახსენებთ, რომ საკუთარი საჭიროებისთვის კომპანია აპირებს გამოიყენოს Intel 18A ტექნოპროცესი Panther Lake სერიის პროცესორების, ასევე სასერვერო Clearwater Forest პროცესორების დასამზადებლად. გასულ აგვისტოში კომპანიამ ასევე დაადასტურა, რომ აპირებს პროდუქტის პირველი ციფრული დიზაინის შექმნას გარე მხარის მომხმარებლებისთვის Intel 18A ტექნოლოგიის გამოყენებით 2025 წლის პირველ ნახევარში. Panther Lake პროცესორებს ექნება ხელოვნური ინტელექტის აჩქარების ფუნქციები, რაც განმარტავს მინიშნებას კომპიუტერების სეგმენტში მსგავსი გადაწყვეტილებების დიაპაზონის გაფართოებაზე მიმდინარე წლის ბოლოს. 

https://tinyurl.com/7u47hnn2 

 

[Magdalena]

Intel-ის ხელმძღვანელობამ არაერთხელ განაცხადა, რომ დიდხანს არ დააყოვნებს მომხმარებლებისთვის Intel 18A ტექნოლოგიაზე წვდომის მიწოდებას მას შემდეგ, რაც დაეუფლება პროდუქციის წარმოებას საკუთარი საჭიროებისთვის. ახლა, თავის ვებ-გვერდზე, კომპანია იტყობინება, რომ მზად არის წლის მიმდინარე ნახევარში გარე მხარის მომხმარებლებს მიაწოდოს ციფრული პროექტები, რომლებიც შექმნილია 18A ტექნოლოგიის გამოყენებით. 

 

ფოტოს წყარო: Intel 

Intel-თან ამ სფეროში თანამშრომლობის დაწყების მსურველებს შეთავაზებული აქვთ გაგზავნონ განაცხადი ელექტრონული ფოსტის მისამართზე. შეგახსენებთ, რომ საფირმო Panther Lake პროცესორების ნიმუშები, რომლებიც იწარმოება Intel 18A ტექნოლოგიით, ფიზიკურად უკვე არსებობს და მათი სერიული მიწოდება წლის მომდევნო ნახევარში დაიწყება. სასერვერო სეგმენტში მომავალ წელს დაინერგება Clearwater Forest პროცესორები, რომლებიც ასევე დამზადდება Intel 18A ტექნოლოგიით. 

ტრანზისტორების სიმჭიდროვის თვალსაზრისით Intel 18A ტექნოპროცესი მზად არის კონკურენცია გაუწიოს TSMC N2-ს. წინამორბედ Intel 3-თან შედარებით მასში გაზრდილია წარმადობა თითო ვატზე 15%-ით და ამ შედარებაში ტრანზისტორების სიმჭიდროვე 30%-ით მეტია. ეს ნაწილობრივ განპირობებულია PowerVia ტექნოლოგიით, რომელიც მოიზარებს ენერგიის მიწოდებას სილიკონის ფირფიტის უკანა მხრიდან - ამ ტექნოლოგიას კონკურენტი TSMC-ს ჯერ არ დაუფლებია. Intel-ის 18A ტექნოპროცესი ასევე იყენებს მოწინავე RibbonFET ტრანზისტორების სტრუქტურას. 

მოსალოდნელია, რომ Intel 18A-ს მომხმარებლები იქნებიან არა მხოლოდ თავდაცვის სფეროს მომხმარებლები, როგორებიცაა Boeing და Northrop Grumman, არამედ ასევე შვედური ტელეკომუნიკაციის გიგანტი Ericsson და Amazon (AWS) და Microsoft (Azure) სასერვერო განყოფილებები. ჯერ ბოლომდე გაურკვეველია, მზადაა თუ არა Broadcom შეუკვეთოს Intel-ს ჩიპების წარმოება 18A ტექნოლოგიის გამოყენებით. ნებისმიერ შემთხვევაში, შეფერხებული რესტრუქტურიზაციის რთულ პირობებშიც კი Intel არ უარს ამბობს მომხმარებლებისთვის თავისი მოწინავე ტექნოლოგიების შეთავაზებაზე. 

https://tinyurl.com/ms5772hp 

[Magdalena]

Intel-მა წარმოადგინა Panther Lake სერიის პროცესორი გამოფენა Embedded World 2025-ზე. ახალ პროდუქტს ყურადღება მიიპყრო გერმანულმა გამოცემა PC Games Hardware-მა. კომპანიამ Panther Lake ჩიპი დეტალურად დაათვალიერა. ეს არ არის პირველი შემთხვევა, როდესაც მოხდა ამ ჩიპის საჯარო დემონსტრირება - Intel-ის ყოფილმა ხელმძღვანელმა Pat Gelsinger-მა პროცესორი წარადგინა გამოფენა Lenovo-ს Tech World-ზე გასულ ოქტომბერში. 

 

ფოტოს წყარო: PC Games Hardware 

რიგითი მომხმარებლისთვის პროცესორები, სახელწოდებით Panther Lake, ცნობილი იქნება, როგორც Core Ultra 300 სერია, მათში გაერთიანებული იქნება ახალი გამოთვლითი არქიტექტურა, რომელიც დაფუძნებულია Panther Cove P-ბირთვებსა და, შესაძლოა, Darkmont E-ბირთვებზე, ასევე ახალი გრაფიკული არქიტექტურა სახელწოდებით Xe3. 

 

Embedded World 2025-ზე ნაჩვენები Panther Lake ჩიპი ეკუთვნის Panther Lake-H სერიას. ეს პროცესორები მოიცავს ოთხ P-ბირთვს, 8-მდე E-ბირთვს და ოთხამდე დაბალი სიმძლავრის LP ბირთვს. ფლაგმანურ მოდელებში მოცემული იქნება 12-მდე Xe3 გრაფიკული ბირთვი. მსგავსი მახასიათებლების მქონე პროცესორები, მაგრამ ნაკლები GPU ბირთვით, განკუთვნილი იქნება გეიმინგ ლეპტოპებისთვის. 

 

მოსალოდნელია, რომ Panther Lake სერიის პროცესორებს (ყველა მოდიფიკაციის ჩათვლით) ექნება 16-მდე გამოთვლითი ბირთვი, 12-მდე Xe3 გრაფიკული ბირთვი, 12-მდე PCIe 5.0 არხის მხარდაჭერა და AI წარმადობა 180 TOPS-მდე (ტრილიონი ოპერაცია წამში). ქვემოთ მოცემულ ცხრილში შეგიძლიათ იხილოთ Panther Lake-ის ყველა მოსალოდნელი კონფიგურაცია. 

 

ფოტოს წყარო: VideoCardz 

Intel-მა დაადასტურა, რომ Panther Lake აგებულია Intel-ის 18A ტექნოპროცესზე - 18 ანგსტრემი ან 1.8 ნმ. მასში ასევე გამოყენებულია PowerVia ტექნოლოგია (კვების მიწოდება ჩიპის უკანა მხრიდან) და RibbonFET ტრანზისტორები. თუ ჩიპების განვითარება გეგმის მიხედვით წარიმართება, ისინი ლეპტოპებში მიმდინარე წლის მეორე ნახევარში უნდა გამოჩნდეს. 

https://tinyurl.com/dvaazfpc 

[Magdalena]

Intel წელს გამოუშვებს თავის ყველაზე მძლავრ Panther Lake პროცესორებს, ხოლო უფრო იაფი ვერსიები მომავალ წელს გამოვა 

კვარტალურ კონფერენციაზე Intel-ის წარმომადგენლებმა განაცხადეს, რომ მისი Panther Lake პროცესორების ძირითადი ნაწილი, რომლებიც Intel-ის 18A ტექნოლოგიაზეა დაფუძნებული, წარმოებაში მომავალ წელს ჩაეშვება. წლის ბოლომდე კი ახალი ჩიპების მეტად შეზღუდული ასორტიმენტი გამოვა. 

 

ფოტოს წყარო: Intel, 2023 

მსგავსად შეგვიძლია ვიმსჯელოთ Intel-ის პროდუქტების განყოფილების ხელმძღვანელ Michelle Johnston Holthaus-ის სიტყვებიდან: „Panther Lake ნამდვილად ემთხვევა Meteor Lake-ისა და Lunar Lake-ის ბაზარზე გამოშვების წესს, რომლის მიხედვით მომხმარებლები ჯერ ყველაზე მძლავრ პროდუქტს იღებენ, შემდეგ კი პირველ კვარტალში გამოდის დამატებითი მოდელები, რაც საშუალებას მოგვცემს კომერციული ბაზრისთვის ჩამოვაყალიბოთ ხაზი “. მან ასევე აღნიშნა, რომ Panther Lake კონკურენტული თვალსაზრისით ძალიან კარგად გამოიყურება და მომხმარებლები მის მიმართ საკმაოდ დიდ ინტერესს იჩენენ. 

მანამდე, გენერალურმა დირექტორმა Lip-Bu Tan-მა ასევე აღნიშნა, რომ Panther Lake-ის რამდენიმე პროცესორი წლის ბოლომდე გამოვა, ხოლო ყველა დანარჩენი 2026 წელს გამოჩნდება: „პირველ მოდელებს წლის ბოლომდე გამოვუშვებთ, ხოლო დამატებით მოდელებს - მომავალ წელს. ამიტომ, ამ ეტაპზე ამაზე ვართ ორიენტირებულნი“. 

სასერვერო სეგმენტში, როგორც Michelle Johnston Holthaus-მა განმარტა, 2026 წლის პირველ ნახევარში გამოვა Clearwater Forest სერიის პროცესორები. ეს უკანასკნელი უნიკალური შეფუთვის ტექნოლოგიის გამოყენებას გულისხმობს, ამიტომ ისინი გარკვეული შეყოვნებით გამოვა სამომხმარებლო Panther Lake პროცესორებთან შედარებით. Clearwater Forest პროცესორებში გამოყენებული იქნება ე.წ. E-ტიპის ბირთვები, რომლებიც ხასიათდება შემცირებული ენერგომოხმარებით, მაგრამ არქიტექტურულად ისინი Granite Rapids-ის წარმომადგენლები არიან. როგორც Intel-ის წარმომადგენელმა შეაჯამა, Panther Lake და Clearwater Forest პროცესორების გამოშვების დაგეგმილი თარიღებიდან გადახრები არ არის. 

https://tinyurl.com/46w54jsn 

[Magdalena]

Intel-ის Panther Lake ანგსტრემ პროცესორებს დეფექტების მასიური დონის გამო წარმოების ჩავარდნის საფრთხე ემუქრება 

Intel-მა მილიარდობით დოლარი დახარჯა 18A ტექნოპროცესის განვითარებაზე, მათ შორის რამდენიმე ქარხნის აშენებასა და განახლებაზე, რათა კონკურენცია გაეწია ტაივანურ ნახევარგამტარ გიგანტ TSMC-სთვის. თუმცა, ახალ ტექნოპროცესს, რომელიც ჩიპების წარმოების კონტრაქტებისკენ გახსნიდა გზას და Intel-ს, როგორც მოწინავე გადაწყვეტილებების მომწოდებლის, პოზიციას აღადგენდა, ხარისხის სერიოზული პრობლემები შეექმნა. 

 

თვეების განმავლობაში Intel ინვესტორებს ჰპირდებოდა, რომ გაზრდიდა ჩიპების წარმოებას 18A ტექნოპროცესის გამოყენებით. გასული წლის ტესტებმა მომხმარებლები იმედგაცრუებული დატოვა, თუმცა Intel-მა პირობა დადო, რომ 2025 წელს დაიწყებდა მობილური Panther Lake პროცესორების მასობრივ წარმოებას 18A ტექნოპროცესის გამოყენებით. ამ პროცესორების არქიტექტურა მოიცავს ახალი თაობის ტრანზისტორებს და ჩიპისთვის ენერგიის მიწოდების უფრო ეფექტურ გზას. 

როგორც ცნობილი გახდა, Intel-ის Panther Lake ჩიპების მხოლოდ დაახლოებით 5% აკმაყოფილებდა საჭირო მახასიათებლებს. ერთ-ერთი წყაროს თქმით, ამ ზაფხულისთვის ეს მაჩვენებელი დაახლოებით 10 პროცენტამდე გაიზარდა და აღინიშნა, რომ ეს მაჩვენებელი შეიძლება უფრო მაღალი იყოს, თუ Intel-ი გაითვალისწინებს იმ ჩიპებს, რომლებიც ვერ აკმაყოფილებენ ყველა დასახულ მაჩვენებელს. 

აპრილში Intel-მა განაცხადა, რომ მან მნიშვნელოვანი ნაბიჯი გადადგა 18A ტექნოლოგიაზე დაფუძნებული Panther Lake ჩიპების მასობრივი წარმოებისკენ, რომელიც ცნობილი იყო, როგორც „რისკიანი წარმოება“. კომპანიამ ასევე მაისში Computex 2025-ზე Panther Lake ჩიპებით აღჭურვილი რამდენიმე ლეპტოპი წარმოადგინა. 

 

ფოტოს წყარო: Intel 

ასეა თუ ისე, 18A ტექნოპროცესით დამზადებულ Panther Lake ჩიპებს წუნდებულის მაღალი მაჩვენებელი აღმოაჩნდა. „როგორც წესი, მუშა ჩიპების გამოსვლა დაბალი მაჩვენებლით იწყება და დროთა განმავლობაში უმჯობესდება“, განუცხადა Intel-ის ფინანსურმა დირექტორმა დევიდ ზინსნერმა (David Zinsner) Reuters-ს ინტერვიუში. „Panther Lake-ისთვის ეს მხოლოდ დასაწყისია“. 

ჩიპების მწარმოებლებისთვის პროგრესის გაზომვის ერთ-ერთი გზაა ჩიპის ერთეულ ფართობზე დეფექტების რაოდენობის გაზომვა, რომელიც შეიძლება განსხვავდებოდეს ნახევარგამტარი სტრუქტურის მიხედვით. ინფორმირებული პირების თქმით Panther Lake-ის ჩიპებში დეფექტების მაჩვენებელი დაახლოებით სამჯერ აღემატებოდა მასობრივი მოცულობის წარმოებისთვის დასაშვებ მაჩვენებელს. 

Intel-მა განაცხადა: „მუშა ჩიპების წარმოების დინამიკა რწმენასა გვინერგავს, რომ ეს იქნება წარმატებული გაშვება, რაც კიდევ უფრო გააძლიერებს Intel-ის პოზიციას ლეპტოპების ბაზარზე“. წარსულში Intel ცდილობდა წარმოების დაწყებამდე დეფექტების მაჩვენებლის 50 პროცენტზე ნაკლებ დონზე მიღწევას, რადგან დროზე ადრე დაწყება მომგებიანობის შემცირების რისკს შექმნიდა. კომპანია მოგების ლომის წილს მხოლოდ მაშინ იღებს, როდესაც მუშა ჩიპების მოცულობა დაახლოებით 70-80 პროცენტს აღწევს. 

 

არსებული ინფორმაციით Panther Lake-ის წარმოების მნიშვნელოვნად გაზრდა მეოთხე კვარტალში კომპანიისთვის გამოწვევა იქნება. Intel-მა 30 ივლისს ოფიციალურად განაცხადა, რომ Panther Lake „სწორ გზაზეა“, თუმცა არ დაუკონკრეტებია წარმოების ის ზღვარი, რომლის პირობებში ჩიპები მომგებიანი გახდება. 

Intel-ი ამჟამად საკუთარი ჩიპების წარმოებისთვის ნაწილობრივ კვლავ TSMC-ზეა დამოკიდებული. ივნისში Intel-ის ერთ-ერთმაა ხელმძღვანელმა განაცხადა, რომ Nova Lake ჩიპი, რომლის გამოშვებასაც კომპანია Panther Lake-ის შემდეგ გეგმავს, ნაწილობრივ TSMC-ის მიერ დამზადდება. Intel-მა განაცხადა, რომ შესაძლოა, საერთოდ უარი თქვას მოწინავე წარმოებაზე, თუ გარე მომხმარებელს არ მოიზიდავს 14A ტექნოპროცესით, რომელიც 18A-ს მემკვიდრე უნდა იყოს. 

https://tinyurl.com/bdd8y6et 

[George]

 

[Magdalena]

Intel-მა დაადასტურა, რომ იანვარში CES 2026-ზე Core Ultra 300 პროცესორებს წარადგენს 

Intel-მა დაადასტურა, რომ მისი ახალი Core Ultra Series 3 მობილური პროცესორები (კოდური სახელწოდებით Panther Lake) ლას-ვეგასში, CES 2026-ზე იქნება წარმოდგენილი. 

ფოტოს წყარო: Intel 

კომპანიის ვებ-გვერდზე მითითებულია, რომ პროდუქტის პრეზენტაცია გაიმართება ორშაბათს, 5 იანვარს, წყნარი ოკეანის დროით 15:00 საათზე. ღონისძიებას წაიყვანს ჯიმ ჯონსონი, Intel-ის სამომხმარებლო კომპიუტერული ბიზნესის უფროსი ვიცე-პრეზიდენტი და სამომხმარებლო  გამოთვლების განყოფილების გენერალური მენეჯერი. 

 

Panther Lake წარმოადგენს Intel Core Ultra პროცესორების მესამე თაობას და პირველ სამომხმარებლო სისტემას კრისტალზე, რომელიც აგებულია Intel-ის 18A 18-ანგსტრემ ტექნოპროცესზე. ჩიპები იყენებენ მრავალელემენტიან არქიტექტურას, რომელიც აერთიანებს ახალ CPU ბირთვებს, განახლებულ ინტეგრირებულ გრაფიკას და ხელოვნური ინტელექტის ამაჩქარებელს ერთ პაკეტში. Intel-ი Core Ultra Series 3-ს წარმოგვიდგენს ერთიან პლატფორმად სამომხმარებლო და კომერციული ხელოვნური ინტელექტით აღჭურვილი კომპიუტერებისთვის, გეიმინგ მოწყობილობებისა და პერიფერიული გარემოსთვის. დაგეგმილია, რომ ახალი ჩიპები ხელმისაწვდომი 2026 წლის იანვარში გახდება.

CES-ზე Intel-ი ჩაატარებს სესიების სერიას, რომელიც მიეძღვნება Panther Lake-ის ინტეგრაციას მის ხელოვნური ინტელექტის მქონე პერსონალური კომპიუტერების სტრატეგიაში. 6 იანვრის პროგრამა მოიცავს პრეზენტაციებს ხელოვნური ინტელექტის ინფრასტრუქტურის მასშტაბირების, სამომხმარებლო კომპიუტერების რეალურ სამუშაო დატვირთვებზე ხელოვნური ინტელექტის აპარატურად გარდაქმნის და იმის შესახებ, რასაც Intel „აგენტურ ხელოვნურ ინტელექტს“ უწოდებს პერიფერიისთვის. 

Intel ასევე ჩაატარებს Core Ultra-ზე დაფუძნებული პროდუქტების ტექნოლოგიურ პრეზენტაციას 5-დან 8 იანვრამდე. სტუმრები იხილავენ Core Ultra პროცესორების ამჟამინდელ მოდელებზე დაფუძნებულ მოწყობილობებს და პარტნიორებისგან მოსალოდნელია, რომ წარმოადგინონ Core Ultra Series 3-ზე დაფუძნებული პირველი სისტემები. ახალ Panther Lake პროცესორებზე დაფუძნებული პროდუქტების მასობრივი წარმოება 2026 წლის პირველ კვარტალშია მოსალოდნელი. 

5 იანვარს ასევე ოფიციალურად დაანონსდება უახლესი გრაფიკული არქიტექტურა Xe3, რომელიც გამოყენებული იქნება Core Ultra Series 3 პროცესორებში. 

https://tinyurl.com/2n4yf85v 

[Power_VANO]

დადო ინტელმა Panther Lake პროცესორები CES-ზე. რამდენიმე ლეპტოპის პრე-ორდერი უკვე არის BestBuy და BHP-ზე. საინტერესო მოდელები დაანონსდა და კიდევ მეტი მოვაო.

Dell-მაც XPS ხაზი გააცოცხლა.

https://www.techpowerup.com/344763/intel-launches-core-ultra-series-3-panther-lake-mobile-processors-on-intel-18a-node

[Magdalena]

Intel პორტატული გეიმინგ კონსოლებისთვის Panther Lake-ზე დაფუძნებულ Core G3 პროცესორებს ამზადებს 

VideoCardz-ის ცნობით, Intel პორტატული გეიმინგ კონსოლებისთვის Core G3 პროცესორების სპეციალური სერიის გამოშვებისთვის ემზადება. ახალი Panther Lake მობილური პროცესორების პრეზენტაციისას კომპანიამ სპეციალური სერიის სახელი არ გაამხილა, თუმცა მისი გამოშვების გეგმები დაადასტურა. 

 

ფოტოს წყარო: VideoCardz 

Panther Lake-ის ოფიციალური პრეზენტაციის დროს Intel-მა არ გაამხილა პორტატული კონსოლებისთვის განკუთვნილი პროცესორების მახასიათებლები, თუმცა ახსენა რამდენიმე მწარმოებელი, მათ შორის Acer, MSI, OneXPlayer, GPD და Microsoft, რომლებიც შესაძლოა დაინტერესებულნი იყვნენ ამ ჩიპებზე დაფუძნებული მოწყობილობების გამოშვებით. Microsoft-ის ჩართვა შესაძლოა იმაზე მიუთითებდეს, რომ კორკორაცია უკვე ამზადებს ახალ „პორტატულ Xbox“ მოდელს, ან რომ კომპანია უბრალოდ აქტიურად არის ჩართული მომავალი პლატფორმის პროგრამული უზრუნველყოფის მხარდაჭერაში. 

VideoCardz-ის წყაროებზე დაყრდნობით Intel-ის წარმოებულ, პორტატული კონსოლებისთვის განკუთვნილ ჩიპს შესაძლოა ჰქონდეს ინტეგრირებული Arc B380 გრაფიკა, რომელიც დაფუძნებულია 12 Xe3 გრაფიკულ ბირთვზე. Panther Lake-ის მობილურ პროცესორებში გამოყენებული Arc B390 ინტეგრირებული გრაფიკისგან განსხვავება შესაძლოა iGPU-ს დაბალი სიხშირით იყოს განპირობებული. შიდა ვერსიაში პროექტს Arc G3 ეწოდება. ჩიპი აღწერილია, როგორც საშუალო დონის გადაწყვეტილება. წყაროები ასევე ახსენებენ Arc B360 ინტეგრირებული გრაფიკის ვარიანტს, მაგრამ ჯერ არ არის ინფორმაცია მასში შემავალი გრაფიკული ბირთვების რაოდენობის შესახებ. მოსალოდნელია, რომ G3-ს ექნება ორი P-ბირთვიანი, რვა E-ბირთვიანი და ოთხი LPE-ბირთვიანი კონფიგურაცია. 

 

ფოტოს წყარო: Intel 

პორტატული კონსოლებისთვის სპეციალიზებული პროცესორების გამოშვება Intel-ს პორტატული მოწყობილობების დიდ ბაზარზე გაიყვანს, სადაც Core G3 კონკურენციას გაუწევს AMD-ის Ryzen Z2 პროცესორების ხაზს. PCWorld-თან ბოლო ინტერვიუში Intel-ის წარმომადგენლებმა AMD-ის გადაწყვეტილებებს „მოძველებული სილიკონი“ უწოდეს. ბოლო AMD Strix Point მობილური პროცესორები დაახლოებით 19 თვის წინ გამოვიდა. CES 2026-ზე AMD-ის ჩიპებზე დაფუძნებული ახალი პორტატული გეიმინგ მოწყობილობები არ იყო წარმოდგენილი, გარდა SteamOS-ზე მომუშავე Lenovo Legion Go 2-ისა. თუმცა, ეს უკვე არსებული კონსოლის Windows-ზე დაფუძნებული ვარიანტია. ასევე, შოუზე არაფერი იყო ნახსენები Ryzen Z3 პროცესორების პოტენციური გამოშვების შესახებ. 

ორი ინტეგრირებული გრაფიკული ვარიანტის (Arc B380 და B360) გამოშვების შესაძლებლობის გათვალისწინებით ლოგიკურია ვივარაუდოთ, რომ ასევე გამოვა ორი პროცესორის ვერსია, რომელიც ამ გრაფიკას გამოიყენებს. Intel-მა ჯერ არ გამოაცხადა, როდის დაანონსდება Core G3 სერიის ჩიპები. 

https://tinyurl.com/4kf9veu6