Microsoft-მა წარადგინა Surface ლეპტოპი Arm-პროცესორ Snapdragon X Elite-ით და 22 საათამდე ავტონომიურობის დროით

[Magdalena]

კონფერენცია Build 2024-ის ფარგლებში Microsoft-მა წარმოადგინა Qualcomm Snapdragon X Elite Arm პროცესორზე დამყარებული Surface ლეპტოპი. ახალი პროდუქტის წინასწარი შეკვეთების მიღება დაწყებულია, ხოლო მოწყობილობის მიწოდება 18 ივნისს დაიწყება. მარტში მწარმოებელმა გამოუშვა Surface Laptop 6, მაგრამ Intel Core Ultra პროცესორებით. ახალი Arm laptop Surface Laptop შეიძლება ალტერნატიულ ვერსიად ჩაითვალოს. 

 

ფოტოს წყარო: Microsoft 

ახალი Surface Laptop ხელმისაწვდომი იქნება 13.8- და 15-დუიმიანი სენსორული ეკრანების მქონე ვერსიების სახით. კომპანია ამტკიცებს, რომ მოწყობილობას აქვს ყველაზე კაშკაშა დისპლეი (600 კდ/მ2) ნებისმიერ Surface მოწყობილობასთან შედარებით. მხარდაჭერილია HDR და Dolby Vision IQ ტექნოლოგია გამოსახულების ხარისხის გაუმჯობესებისთვის. 

 

ახალი Surface Laptop არის "80 პროცენტით უფრო ძლიერი წინა თაობის ლეპტოპთან (Surface Laptop 5) შედარებით" და უზრუნველყოფს "22 საათამდე მუშაობას ვიდეოს გაშვების რეჟიმში", აცხადებს Microsoft. ბრაუზერის გამოყენების რეჟიმში ლეპტოპის 15-დუიმიანი ვერსია უზრუნველყოფს ბატარეის 15 საათამდე მუშაობას, აღნიშნავს კომპანია. 

 

ახალ Surface Laptop-ს ექნება 16 ან 32 გბ ოპერატიული მეხსიერება და მყარი დისკი 256, 512 გბ ან 1 ტბ მოცულობით. ლეპტოპში წარმოდგენილია სენსორული პანელი უკუკავშირის მქონე თაჩპედით. მხარდაჭერილია სამ 4K მონიტორთან დაკავშირება და ყველა მათგანს ისევე, როგორც ლეპტოპის საკუთარ ეკრანს, შეუძლია ერთდროულად იმუშაოს. ეს მხარე მომგებიანად გამოარჩევს ახალ ლეპტოპს Apple M3 ჩიპზე დამყარებული უახლესი Apple MacBook Air-ებისგან, რომლებზეც მხარდაჭერილია ორ გარე დისპლეისთან დაკავშირება, თუმცა გარკვეული შეზღუდვით - ორი გარე ეკრანის დაკავშირებისას თავად ლეპტოპის დისპლეი გამორთული უნდა იყოს. როდესაც Air-ის ეკრანი ჩართულია, მხოლოდ ერთი გარე ეკრანი შეიძლება იყოს აქტიური, როგორც ეს ხდება M1 და M2-ზე დამყარებული Air მოდელების შემთხვევაში. 

 

Microsoft-მა Arm-ლეპტოპი პერსონალური კომპიუტერების ახალ კატეგორიას - Copilot Plus PC-ს მიაკუთვნა. ამ კატეგორიაში შედის კომპიუტერები, რომლებიც აკმაყოფილებენ გარკვეულ მახასიათებლებს. კერძოდ, მათ უნდა ჰქონდეთ მინიმუმ 16 გბ ოპერატიული და 256 გბ მუდმივი მეხსიერება, ასევე მათში წარმოდგენილი უნდა იყოს მძლავრი ნეირო თანაპროცესორი (NPU) - იგი აუცილებელია ოპერაციულ სისტემა Windows-ის ხელოვნური ინტელექტის ფუნქციების მუშაობისთვის. მაგალითად, ასეთია ახალი ფუნქცია Recall. იგი თვალყურს ადევნებს ყველაფერს, რაც ხდება კომპიუტერში (რა აპლიკაციები, დოკუმენტები და საქაღალდეები იხსნება) და საშუალებას აძლევს მომხმარებლებს მოიძიონ საჭირო ინფორმაცია Copilot-ის გამოყენებით. 

კომპანიამ ასევე განაცხადა, რომ გამოვიდა Adobe აპლიკაციების native-ვერსიები (Photoshop, Lightroom, Firefly და Express) Arm-ზე აგებული Surface ლეპტოპისთვის და ისინი უკვე ხელმისაწვდომია, ხოლო Illustrator და Premiere Pro სავარაუდოდ ივნისში გამოვა. Microsoft-ის თქმით Copilot Plus კომპიუტერები Windows AI-ის ახალ ფუნქციებს Intel-ზე დამყარებულ კომპიუტერებზე ადრე მიიღებენ. 

13.8-დუიმიანი Surface Laptop-ის ფასი 999 აშშ დოლარიდან იწყება, 15-დუიმიანის კი - 1199 აშშ დოლარიდან. 

https://tinyurl.com/2xafc6ac