Apple-მა თითქმის დაასრულა ახალ iMac-ზე მუშაობა, აგრეთვე ამზადებს Mac Pro-ს საფირმო ჩიპზე და ახალ MacBook Air-ს

[Magdalena]

Bloomberg-ის ჟურნალისტი Mark Gurman აგრძელებს ინფორმაციის გაზიარებას Apple-ის გეგმებისა და მიმდინარე საქმიანობის შესახებ. ამჯერად მან ისაუბრა მონობლოკ iMac-ების გამოსვლის მოახლოებაზე, რომლებიც ამჟამად ტესტირების ეტაპს გადიან.  ინსაიდერმა ისაუბრა iOS-ის და iPadOS-ის შემდგომ განახლებაზე, აგრეთვე სხვა სიახლეებზე, რომლებზეც ამჟამად მუშაობს კომპანია. 

 

ფოტოს წყარო: Apple 

შეტყობინებაში ნათქვამია, რომ ამჟამად ახალი თაობის iMac კომპიუტერი ინჟინრული საკონტროლო გამოცდის ეტაპზეა (engineering validation testing, EVT). მოწყობილობას ექნება კვლავ 24-დუიმიანი დისპლეი ამჟამინდელი თაობის მსგავსად, რომელიც 2021 წლის აპრილში გამოვიდა. აგრეთვე ცნობილია, რომ ახალი iMac-ები წარმოდგენილი იქნება იმავე ფერთა პალიტრაში - გამოვა ლურჯი, ვერცხლისფერი, ვარდისფერი და ნარინჯისფერი კორპუსის მქონე კომპიუტერები. 

ახალი iMac-ები წინამორბედთან შედარებით უფრო მძლავრი იქნება, მათ საფუძვლად დაედება ახალი საფირმო პროცესორი, რომელიც ჩაანაცვლებს ამჟამინდელ თაობაში წარმოდგენილ M1 ჩიპს. შეიცვლება ზოგიერთი შიდა კომპონენტის განლაგება. J433 და J434 კოდური დასახელების მქონე ახალი iMac-ების შემუშავება უკვე გვიან სტადიაზეა, თუმცა მოსალოდნელია, რომ მათი სერიული წარმოება სამი თვის ვადაზე ადრე არ დაიწყება, რაც იმას ნიშნავს, რომ ახალი iMac-ების გაყიდვა წლის მეორე ნახევრამდე მოსალოდნელი არ არის. 

Gurman-ის ინფორმაციით Apple გეგმავს სამი ახალი Mac კომპიუტერის გამოშვებას გაზაფხული-ზაფხულის პერიოდში. დიდი ალბათობით, ესენი იქნება პირველი 15-დუიმიანი ლეპტოპი MacBook Air (J515), პირველი Mac Pro Apple M-სერიის საფირმო პროცესორით, ასევე 13-დუიმიანი MacBook Air (J513). მიიჩნევა, რომ Mac Pro-ში გამოყენებული იქნება მაღალი წარმადობის პროცესორი M2 Ultra 24 გამომთვლელი და 76 გრაფიკული ბირთვით, ასევე 192 გბ ოპერატიული მეხსიერებით.  

 

ცნობილია, რომ Apple მომავალ iMac-ს შეიმუშავებს იმავე ვადაში, რამდენშიც M3 პროცესორს. არ არის გამორიცხული, რომ სწორედ iMac-ში გამოჩნდება ახალი პროცესორი. ლეპტოპებთან დაკავშირებით ნაკლები რამ არის ცნობილი. თუ რამდენიმე თვეში ბაზარზე გამოვა M2 ჩიპის მქონე MacBook Air მოდელები, ისინი მალე მოძველდება. ასეთ შემთხვევაში 15-დუიმიანმა ვერსიამ შესაძლოა დააინტერესოს მომხმარებლები, თუმცა ახალი 13-დუიმიანი MacBook Air, სავარაუდოდ, ნაკლებად მიმზიდველი იქნება. ამიტომ დასაშვებია ვარაუდი, რომ 13-დუიმიან MacBook Air-ში შესაძლოა წარმოდგენილი იყოს M3, რომელიც ასახავს Apple-ის გადასვლას 3-ნანომეტრიან ჩიპებზე. ამ გადასვლის შედეგად მნიშვნელოვნად გაიზრდება წარმადობა და ენერგოეფექტურობა.  

გასულ წელს Apple-მა წარადგინა პროცესორი M2 ყოველწლიურ კონფერენცია WWDC-ზე ივნისში. თუ კომპანია ამ გრაფიკს შეინარჩუნებს, M3 პროცესორისა და განახლებული MacBook Air-ის წარდგენა WWDC 2023-ზე სავსებით ლოგიკური იქნება. შემდეგ, სავარაუდოდ, Apple წარადგენს ახალ iMac-ს M3 ჩიპით 2023 წლის ბოლოს, აგრეთვე MacBook Pro-ს 2024 წელს. M3 ჩიპი ასევე გამოჩნდება OLED-დისპლეის მქონე განახლებულ iPad Pro-ში, რომელიც, როგორც მიიჩნევა, 2024 წლის პირველ ნახევარში უნდა გამოვიდეს. ასევე, გამორიცხული არ არის, რომ 2025 წელს Apple-მა გამოუშვას პირველი MacBook OLED-დისპლეითა და სენსორული მართვის მხარდაჭერით.  

 

ამასთან, Apple ატარებს მოწყობილობებისთვის განკუთვნილი ოპერაციული სისტემების ახალი ვერსიების ბეტა-ტესტირებას. დეველოპერებისთვის უკვე ხელმისაწვდომია მეორე ბეტა-ვერსია iOS 16.4 და iPadOS 16.4, რომლებშიც ახალი ფუნქციებია რეალიზებული. მიიჩნევა, რომ ამ განახლებების სტაბილური ვერსიები აპრილში გამოვა. ასევე გრძელდება  WatchOS-ის, TVOS-ისა და MacOS-ის შესაბამისი განახლებების ტესტირება. 

Apple-ის აქციონერთა ყოველწლიური შეხვედრა გაიმართება 10 მარტს. გენერალური დირექტორი ტიმ კუკი და მისი მოადგილეები უპასუხებენ აქციონერების კითხვებს და ისაუბრებენ კომპანიის სიახლეებზე. ასეთ ღონისძიებებში, როგორც წესი, არ ანონსდება ახალი პროდუქტები. ასეთი შეხვედრების ფარგლებში ხშირად საჯაროვდება კომპანიის დირექტორთა საბჭოსთან დაკავშირებული მნიშვნელოვანი ინფორმაცია, მენეჯერების ანაზღაურება, შრომითი ურთიერთობები და ა.შ. 

https://tinyurl.com/2p8vckj5